الي نسمة وفاء...تقولي شنو...تقولي منو؟

الي نسمة وفاء
الي من تدعي نسمة وفاء ولااعرف لها اسما غير هذا
الي وفاء التي لم توفي بحقي ولا حق ابي عليه الرحمة عندما قالت
ماهر عابدين دياب ده مابعرفه ولاسمعت بيه. وعابدين دياب ده يمكن اكون سمعت بيه, لتعرفي من نكون هاك من نحن
تقول لِى شنو !

-1-

تقول لِى شنو

وتقولى لِى منو ،

-2-

أنحنَا السَّاسْ

ونَحنا الرَّاسْ

ونحن الدّنيا جبناهَا

وبَنيناها..

بِويت ..فى بِويتْ

وأسْعل جدى ترهاقَا

وخلى الفَاقة .. والقَاقا

-3-

تقول لِى شنو

وتقول لِى منو ،

-4-

تَالا أبوى .. بعنخى لَزَمْ

وتَالا اللُمْ..أَبوىْ أوْلبَابْ

وأمى مهيرة بتْ عبودْ

وأخويا المهدى ..سيد السيفْ

والخلى النصارى تقيفْ

هناك ..فى القيفْ ،

-5-

تقول لِى شنو

وتقول لِى منو ،

-6-

ونحن الشينْ

ونحن الزينْ

ونحن العقبه والعتمور

ونحن القِبله .. والقرعانْ

ونحن الشانْ

ونحن النانْ

أتينا عشانْ

نسوى الدّنيا للإنسانْ

تقول لِى شنو

وتقول لِى منو ،

-8-

ونحن الصّافى

والوَافى ،

ونحن الشّافى

والكافِى ،

ونحن الزادْ

ونحن العِينه

والزِيّنه ،

ونحن – يمين – أهالينا

أهلى سرورْ

ووكَتين ينزل المستورْ

تَرَانَه النور

-9-

تقول لِى شنو

وتقول لِى منو ،

-10-

ونحن الجبنه واللبريقْ

ونحن قداحنا سَاوات ضيقْ

ونحن بيوتنا مفتوحاتْ

مَسَاىْ .. وَصباحْ

ونحن وشُوشنا

مطروحاتْ

مَسَاىْ وصباحْ

ونحن السَمحه

والقَمحه

ونحن الطله .. واللمحه ،

ونحن الصِيدْ

ونحن العيدْ ،

-11-

تقولى لِى شنو

وتقولى لِى منو ،

-12-

ونحن عُزَازْ

ونحن حَرَازْ

ونحن هَشَابْ

ونحن قُمُوحْ

ونحن تُمُورْ

ونحن عُيُوشْ

ونحن النيلْ

وَكضَاب – يا زويل – منْ قالْ

إنّك .. تانى لينا متيلْ ،

تقولى لِى شنو

وتقولى لِى منو ،

-13-

ونحن الحَجه والتوبه ،

ونحن الهِجره .. والأوبه ،

ونحن كُتَارْ

ونحن كُبَارْ ،

ونحن – يمين – جُمَال الشيلْ

ونحن – يمين –نَضِمنا قليلْ ،

-14-

تقول لِى شنو

وتقول لِى منو ،

-15-

ونحن مِحايه

نحن طِرايه

نحن فِدايه

نحن سِمايه

نحن حجاب

ونحن اللوحْ

ونحن شَرَافه فى الدنيا

ونحن كِتاب عِلمْ مفتوحْ

على كل البُلودات ..نُورْ ،

ونحن – يمين – مَداين نورْ ،

ووشنا نورْ ،

-16-

تقول لِى شنو

وتقول لِى منو ،

-17-

ونحن الحِنه والجرتقْ

ونحن الزفه والسيره ،

ونحن ..أبشرى والشبال ،

ونحن السَىْ

ونحن الوَىْ

ونحن الرقبه .. والتُمْ تُمْ

ونحن اللَمْ ..

يكون فى الدنيا ..متلنا ..لمْ

-18-

تقولى لِى شنو

وتقول لِى منو ،

-19-

ونحن العَاجْ

ونحن الصَاجْ

ونحن البوشْ

ونحن الحوشْ

ونحن الناسْ

وكتين الديارا ..يباس

وإن درت العديل والزين

تعال يا زول ،

وإن كست الكعب والشين

أرح .. يا زول

-20-

تقولى لى شنو

وتقول لى منو ،

-21-

ونحن السورْ

ونحن الحُورْ ،

ونحن بناتنا محروساتْ

ونحن وِلادنا ضُلالاتْ

ونحن أُماتنا ياهِنْ ..ديلْ ،

وجِيب ورينى زيىِّ منو ،

وتقول لِى شنو

وتقول لِى منو ،

-22-

ونحن فَزَعْ

ونحن وجَعْ

ونحن اليُمه ..واليَابَا

ونحن أريتو بالتَابَه ،

ونحن – يمين – إذا حَرّتْ ،

نخلى الواطه ..رُقَابه ،

-23-

تقولى لِى شنو

وتقولى لِى منو ،

-24-

ونحن زَغَاوه والعطرونْ

ونحن الدُونَا ..مافيشُ دونُ

ونحن وِلاد مَلك خِرتيتْ

وسَابَ الجرْ

وحجَر السِكه ،

والتاكا ،

وسيّدنا الفى الجبل ..دَاكَا

ونحن – يمين – نضِمنا كُتُرْ

وشيَتنا كُتُرْ

وأسعَل ناس كَرن والطُورْ ،

وأسعَل كَررى .. والعَتْمُورْ

وأسعل – يا جنَاَ – الخرتُومْ ،

وشوف كيفن زعلنا كُتُرْ ،

وشوف كيفن فرحنا كُتُرْ ،

أنحنا الـ للرجال خُوسَه ،

ونحن –يمين – جِنَات موسى ،

-25-

تقولى لِى شنو

وتقول لِى منو ،

-26-

ونحن الدوكه

والضُلاله ، والدونكه ،

ونحن الدانقه ،

والراكوبه ، والواطه ،

ونحن الفَكَه

والشِبكَه

ونحن الحجزه .. والعكَه ،

ونحن الجُودْ ،

ونحن أسودْ ،

ونحن النَانْ ،

حديثنا إذا أرِدتو رُطَانْ

وحين دايرين ..نسوى بَيَانْ ،

-27-

تقول لِى شنو

وتقول لِى منو ،

-28-

ونحن الخَلوهَ والدايره ،

ونحن تَكيه العايره ،

ونحن الضُّلْ ،

ونحن الكُلْ ،

ونحن سبيل غريب الليلْ ،

ونحن صباح مسافر الليلْ ،

ونحن فَنَاجرةَ الدّنيا ،

ونحن حَبَابْ

حديثنا حَبَابْ

تعال شَرِف .. وشوفنى منو ،

وتقولِى شنو ،

وتقولِى منو ،

-29-

أقيف لِسَعْ

وأقيف وأسمعْ ،

ونحن صديرى منضوم ويلْ

ونحن القَرمصيص ..بلحيلْ ،

ونحن التوبْ

ونحن الووبْ

وناس حبوبْ

وناس حَرّمْ

ونحن إذا رأينا كبيرْ

نقيف طولنا ..ونقولْ لُه ..حَبَابْ

ونديه البُكَان ..ترحابْ

ونحن. اليَانَا ديل .. يا زولْ

وتسعلنى .. وتقول لِى منو

وتقولِى شنو ،

-30-

أقيف لسعْ

وأقيف .. وأسمعْ

ونحن التَايَهْ

والاندايَهْ

والزِريعهْ

والعيزومهْ

واتفضلْ ،

ونحن الرايَه مرفُوعه

ونحن الكُلفَه مرفُوعه

ونحن حلفتَ ... مدفوعه

-31-

تقول لِى شنو

وتقول لِى منو ،

-32-

وأما عجيبْ

وأما غريبْ ،

وأقيف لسعْ

وأقيف .. وأسمعْ ،

-33-

أنا الكَعَب البسوى الويلْ

وأنا الزول السَمِحْ ..بلحيل ،

وداير ..منَِّهُمْ .. يَاتُو ..،

تقولى لِى شنو

وتقول لِى منو ،

هييييييييييييييي انا قلتا ماهر مابعرفو وعابدين دياب زول معروف ودخلت البيت من بابو وعمتي جنب البيت

وانا مشيرة عبد اللطيف محمد احمد العمدة اكيد حتعرف عبداللطيف وماحترف مشيرة

وهلا بيك وامك الطيبة التحية ليها

والنخوة مافي عيلة الديابي بس بل في مراغة كلها شرقها وغربها والمعلقة دي لمراغة اسم ومسمى

وتاني مابعرفك هههههههههههههههههههههههه

انا بعرف قدروة اخوك اما انتا لا بي صراحة

محمود اخوي بتكلم عنو وصحبو شديد

شكرا لفك الطلاسم، الان يعرفك الجميع، قابلتك ايام السعوديه وانت صغيرة. لو كنت درست كل المراحل بدنقلا كنت حتذكري والسبب انه اكيد حاكون جلدتك في المدرسة واسالي عني كل بنات واولاد عمك داخل وخارج المنتدي.
بالمناسبة جدتي لابي اسمها امنه ابراهيم صالح نصر وهي والدة دياب طه, دياب طه جدي مش عم ياسر ابراهيم. لنا نصيب الاسد في ورثة العمد الخال نجم الدين يسن هو المسؤول عن جانبنا. لذلك اطرب دائما للدكتورة نضال عندما يغلب عليها حمية الجاهلية كما انا وتفخر باجدادها...وتقولي شنو؟ وتقولي منو؟
قولي يالطيف يابت عبد اللطيف
يعني مابتذكرو اسماءكم الحقيقية الا بالعين الحمره؟
بالمناسبة السموءل محمد يسن يمكن مايعرف القرابة له ولكل امريكي مراغاوي ولكل يانكي من عندنا التحية

وأنا ما من النوع البجي بالعين الحمرا أسأل مني برضو

وما من النوع البدقى في المدرسة أبدا ابدا

هلا بيك مرة تانية

ومنور المنتدى بوجودك والكل كذلك

واما موضوع لكم نصيب الاسد دي مشكوك في صحتا ههههههههههههه

والعفو والعافية يا استاذ

بس السوط بعيد ههههههههههه

هاهاهاهاهاهاها الاستاذ القدير ادام الله عزك وطول فى عمرك وعطاءك
لله درك يا ابنة عمى ...انا اعرفك زات ادب وخلق فكيف خانك تادبك امام استاذى ومؤدبى ماهر وعمك وخالك فى نفس الوقت
المره دى خانتك حكمتك يا صغيرتى ..اسألى من غير كلمة دا ...فهى تقلل من شان الاخر هههههههههههههههههههه(كلو دا انا بحرر فى الشكله وبذيد الطين بله)
لكما العتبى ومشيرة رغم حداثة سنها فهى ماشاءالله كبيرة فهما ربنا يصلحها
الخال والاخ ماهر زى ما عهدتنى منذ حداثة سنى وانا النعرة راكبانى ومتخلله عظامى أعز بني الدنيا وأعلا ذوي العلا .. وأكرم من فوق التراب ولافخر هههههههههههههههههههه والحمد لله
والله ضحكت لمداخلاتكم حتى سالت دموعى

ههههههههههههههههههه نضار يابت في ناس كبار هنا ايةعدم الاحترام دا هههههههههههههه
في داعى تولعي النيران بدل تطفيها

وياجماعة انا زمان قلتا ليكم كل زول يعرف نفسو من بدري عشان الزول مايقع بردلب

والدليل عمو عبدالرحمن سبق دخلتو مستشفى المجنانين بتاعي وعملتا ليه جلسة كهرباء بعدين عرفتا الحاصل ولصقتا ليهو كلمة عمو على الدوام زي ماشفتا
_____________________
معليش من حساب صفاء لكن انا مشيرة

ويابنت العم اية الكلام الكبير دا كلو اي احترام وتأدب والله كنتا بهظر ساي

وما القصد من الكلام شئ

والبقراة كويس وبعرفني بفهم الكلام من اول برهه

ولك العتبى ياعمو ماهر حتى ترضى خلاص اتلصقت فيك عمو انتا كمان شيل الشيلة هههههههههههههههههه

_______________________
مشيرة

الليلة سوطين ونيم كمان يا لهوي ياجماعة ماكدا عمو دا طيب جدا

وباين من كلامو انتو مالكم مجرمين كدا لا حول الله منكم هههههههههههههههه مجارمة

القصيدة الفيس ما بتشيلا هههههههههههههه

________________
مشيرة

كيف الاحوال الاخ ماهر والله بعد القصيده الطويله دي برضو انا 1اتي ما عرفتك انت مين في اولاد العم دياب الفي لندن ولا الزارع بي شرقا ولا السايق حافله في الصحافه

ههههههههههههههههههه لا حولاااااااااا
محمود يا بن عمى شرطت عيننا سكت دهرا ونطق كفرا هههههههههههههههههههههههه نغطى بتاع مشيره تجى انت ناطى
عبداللطيف العمده بالغ معاك يا استاذ
الاستاذ ماهر هو اللى فى لندن" واحكى ليكم قصه على لسان نواهل اختى عن قفشات الاستاذ ماهر
كانت نواهل متميزه فى الرياضيات فى حصة من الحصص طلب الاستاذ من احدى زميلات نواهل وجاراتها فى الفصل والحلة ممن اعياهن فهم الرياضيات ...طلب منها حل المسأله فكانت فوقفت البت بتحل 0نواهل تمليها بصوت منخفض وهى تقول بصوت عالى ..وعندما انتهت المساله ..وضع ماهر يده فى راسه والاخرى على خاصرته...وقال بعد ابتسامة ساااخره :شااااااااااااااااااطره يا بت عبد الكريم ..اقعدى وضج الفصل بالضحك0كانه يقول بتستغفلونى ؟انا عااارف نواهل بتحل .ههههههههههههههههه
مشيرة انا بهذر معاك كنت بحرر الشكله وبذيد النيران كعادتى هههههههههههههه

يامحمود...يامحمود...يامحمود...خربتها خالص. صورتك جميلة بالنضارة.لكنها تشوف البعيد قبل القريب. سنك ياهلك ان القريب اقصد الاهل. اولا والدي مااسمه عمو دياب,ثانيا الزارع شرق يااخي عندو اسم,وهو علم من اعلام البلد وانا حتي ماعارف شرق بتاعتك ده وين.بعدين ياخي علي الاقل كنت تقول عظم الله اجركم . الله يجازي السعودية تقول راميك جمل.
عزيزي محمود ده كانت مداعبه بس,يعني الكاميرا الخفيه. ماتشيل هم, انا ماهر وابوي عابدين دباب, والزارع بالشرق عامر ودياب بالسعودية مالك وحسين اصحاب حافلات في خط الصحافة,والك موظف برضه في شركة كهرباء.وقدوره الاصلي بين دنقلا والخرطوم. عطيات معلمه,هاجر موظفة بوزارة الزراعة دنقلا وحسينه طالبه ,الوالده اميره عثمان متعها الله بالصحه.احفظ الاسماء ده عشان ماتغلط تاني,صدقني عملت لي صداع.
ماجننتنا ياخلف الله؟
تحياتي لاخ هشام ولو عرف الموضوع حيضحك عليك, تحياتي لسموءل وكل من معكم
عرفت انا مين؟ اذن قول يالطيف.

الاخت والابنة صفاء عمو اسم حلو لكن قدوره حيزعل لانه شايف نفسه ولد صغير وقيافه وخاشي السوق وكده. حيقول كبرتني وخربت لي السوق.شكرا لمداخلاتك.
الاخ عبد الرحمن تحضرني المشاهد التي تدعو لابتسامه ساحكيها لصغارنا في المنتدي وكلها قديمه لطول الفراق
اول ماذكره عندما اشاهد صورتك هو عندما كان الثلاثي بمدرسة القولد الثانوية،يوم ان كان القولد سفر حقيقي.المصاريف وكراتين الزيادة والوداع والبكاء وكنا نرسل الخطابات مع عمنا يسن دردق والخال عكاشه عثمان عندما تم نقله الي مستشفي القولد مساعد طبي.وكان الاخ دياب كثير الحكاوي عن المعاناة .
الحاجة الاهم هي عبدالرحمن المطرب الفنان الذي يقلد عثمان حسين بصوت شجي يطرب له الجميع. كان هناك من يلقب عبدالرحمن ببلبل مراغة,كانت المدارس ومنزل عمنا ميرغني سيداحمد مسرح للفنون اعتي من المسرح القومي اليوم.اتذكر مسرحيات كان يقدمها محمد سرور وابايزيد ومجموعة اخري.وكان عبدالسميع جعفر ملك الكوميديا بلامنازع.قدم مسرحية همبون كداد بعدد من المسارح بدنقلا والبانجديد وارتدي. كانت هذه علامتها التجارة انتاج نادي الوحدة بمراغة. وهي مسرحية بالرطانة والعربي.اه يازمان.
الذكري الثانية هي عبدالرحمن اللاعب والهداف بنادي الوحده.يوم ان كان عبدالرحمن اخطر راس حربة ويرجح كفة الوحدة مع نادي اقجة قبل اسم الزهره.الاعجب عندما يدخل عبدالرحمن ومعتصم اللاعب الاحرف في تحدي قبل المباراة علي من يحرز اهداف اكثر,بالمناسبة مولانا معتصم هو الشقيق الاصغر لعبدالرحمن.
علي غير عادة اهل زمان كان عبدالرحمن مهذب وخجول ولبيس,يعني يلبس البنطلون والقميص. لذالك انا دائما اطالب بصوره حديثة عشان نتاكد عوامل التعرية وصلت عبدالرحمن ولا لسع
قولوا يالطيف

عزيزي عبدالرحمن شكرا علي تفاعلك ودعنا نؤرخ سويا لايام زمان,صحيح انت اقدم مني, لكن عندي ذاكرة صغر قويه وهي ضعيفة جدا كلما قرب الزمان الي اليوم,وكنت مزامل الكبار لسبب ما.حتي اذكر دياب كان بيدفع لي اشتراكي معاكم في الكورة وهى كانت كورة الكفر ذو جيب بالجنب. ينفخ بالفم من انبوبة طويلة تدس بالجيب بعد النفخ,كثيرا ماكانت تتبعج,لذالك كان ممنوع الشوت ضفاري,يعني مخالفة عديل. اه من ايام زمان
الاخ محمود انا عارفه كويس,من زمن السعودية,وحتي بعد مااشر لامريكا جلس مده طويله في السودان قابلته مره وسالته بي نهره شديده انت قاعد لغاية هسع ليه؟تفاجا بالسؤال ودخل في كبكبة شديده. ما اضحكني بالامس طريقة الرد طريقة زول مامجمع اطلاقا,ولد دياب والزول الزارع شرق ويرجعنا للمربع الاول ويقول ماعرفتك.كانه صاحي من نوم عميق ومفتح عين ومغمض عين وقرا الموضوع بالقلبه.حبيت اشن هجوم مركز حتي يصحي. مجرد مداعبه اخوانية,حاولت ارد بي قصيده تانيه لكن خفت من تهمة الغرور كما اتهمت الدكتورة نضال.لان القصيدة كلها انا ونحن.واستبدلتها براجمه اف سكستين.
مشيرة حقيقة لم اكن اعرفها,رغم احساسي انها من المحيط القريب.واشاء الله حمارة عين لكل اسم مستعار حتي ينكشف المستور.
العزيزات صفاء والدكتورة نضال والاخ خالد ذكرتونا ايام التدريس الحلوه,وحقيقة لم اجد نفسي بعدها رغم تغير الزمن وكثرة الاسفار,وكما تساءل خالد ليه ايام زمان احلي,سؤال مهم ويحتاج الي اجابه.

الاخ مجدي حكاية السوط فكرة حلوة منك,واي واحد تشوفوه يستاهل جلد ارسلوه لي. لكن لان الجلد صار ممنوع وغير حضاري ويعمل عقد نفسية, حتي احكام الجلد في للشريعة وجد من ينظر لها. انا مكان وجودي ممنوع حتي ارفع صوتي عليه - الصوت المقصود هنا هي النهره مش الجلد - يالسخرية القدر - يعني شغل صبري عبدالعظيم بتاعة اربعة منو ممكن فيها اعدام. بي تلفون بسيط لمنظمة حقوق الانسان جناينه واراضيه كلها ماتكفي طالب واحد تعويض.
نسبة لكل هذه المتغيرات اقترح ان اكون جلاد المنتدي, لكن بي طريقه حضاريه شويه,طريقة تناسب تغيرات الزمن, جلد بالكلمة السخنه, بالهرشه, بي حمار العين, يعني كلام صفاء انه عمو ده راجل طيب يحتاج تدقيق شديد. الاخ مجدي ارفع الاقتراح للاداره اذا وجدت تثنيه
وقول يالطيف

والله صفاء مسكينة لسة ماعلمتها الشيطنة مني ههههههههههه

دا طبعا كلامي بس بي حسابة هي

انا عندي مشكلة في حسابي ولما اطلع وهي تخش ما بدخل لي بي سهولة فرديت من حسابة وكتبتا تحت مشيرة يعني لو رجعتو ولقيتو تحت مكتوب مشيرة يبقى انا ما صفاء هههههههههههههههههههههههه

ومحمود عارفك جدا ياعمو هههههههه كلمو عمو جميلة جدا ههههههههههههههههه

لانو قال لي شايف ماهر مرسل لي موضوع كامل قلتا لي دا كلو عشان قلتا لي ما بعرفك ههههههههه

ضحك وقال لي دا اخو قدورة يابت الكبير
قلتا لي برضو ماشفتو هههههههههههههههههه

والحمدلله ماكنت الوقت داك في عشان ما اخد سوطين كدا ههههههههه
من عمو ماهر

لا والله انا مسامح وراجل مسكين ورقيق حتي الجلد في المدارس سمعت بيه سمع حتي ماشفت لي واحد بيجلدوه,لاحول الله لو شاهدت منظر زي ده كان اغمي علي تماما, عمري مارفعت صوتي علي واحد. نباح الكلب ساكت بيعمل لي احباط وهلع وهلوسة بالليل, واذا واحد قال كلام غير كده ماتصدقيه
قولي يالطيف يابت عبداللطيف

ياسلام يا استاذى وكل المجموعه فعلا ..انت اثريت النقاش وجلبت معك الفرح الى هذا المنتدى ...انا قهقهت طويلا وانا استنشق عبير كل كلمة من مداخلاتكم الانيقه ....ويسلام على الذكريات ..والله فعلا زمان ارجع يا زمان ..سؤال فى محله ليه كل ما الزمن تقدم ...بقت مسيخه والناس فقدوا حسهم الفكاهى ...؟؟؟
واكتر حاجه ضحكتنى كلمات الاستاذ ماهر لنسمه انو زول مسكين وما بيعرف يجلد وبمناسبة الجلد استحضر موقف حضرتو وموقف حدث لى وموقف سمعتو عن استاذين جليلين
الاول ..صفر بص شاكر على وكان ذا شجون فلبت طالبات الصف الثانى وبعض من الصف الاول وذهبن الى الرحلة (زواج احد اقربائى) وحضرن متاخرات الى الطابور ...وعينك ما يشوف الا النور ...الاستاذ ماهر ..سيف الدين ..ابشار والدنيا شتاء والسوط مبلول .. الاستاذ ماهر ينادى فيفى عبدو.....ثم ينادى الاسم ونضج بالضحك ثم ينهال السوط
ثم نجوى فؤاد...وينادى الاسم وتتوالى اسماء الراقصات والممثلات وكل واحده ولون فستانها فى الرحله ..انتهى !!
الموقف التانى كنا فى تالت متوسط وكنا عندنا اختبار جغرافيه وزع الورق وقف ابشار بطوله وسمرته يرعبنا ..انا حلفت انو اى واحده تسقط حتتجلد بعدد اخطاها ..واى واحده تجيب اقل من 20 حتتجلد عشرين جلده...وانا اتحدى اى واحده تفوت درجة ال19 فى الامتحان !!!واحترنا ..واذا بابى ينادى عليا انو هذه هديتك من ابشار لانك احرزتى درجة 28 ونص من 30
ذهبت فرحه اليه فاذا بالسوط ينتظرنى ...جلدنى 28 جلده وواحده خفيفه (النص يعنى) وقال لى انا مش قلت اتحدى اى زول يجيب اكتر من 19...ومن غيظى ودهشتى لم ابكى وانتهى الموقف بالاعتذار بعد اسبوع وبقينا اصحاب الى اليوم
يعنى اوعى من الجلد يا نسمه
ونحن ننصبك جلاد المنتدى درجه اولى
الموقف التالت:بعض ابناء العمد ركبوا حمير ابى وعمى نجم الدين الى السنما ومن شلاقة الحمير رجعوا بدرى !!والصباح الاستاذين لموا فى الجماعه المساكين وصفوهم وحدوا سنان سياطهم
فابتدر العم نجم الدين قائلا:من الذى امتطى جوادى الى دار الخيالة ليلة امس..فبهت الذى كفر...
وتم ضربهم ضربا مبرحا ..الجماعه جروا للفصول ..فاوقفهم ابى قائلا ..دا يااا داب الاستعراض ..الفيلم لسه ما بدا ..فاسقط فى يدهم وتم تدميرهم من قبل العدو..هههههههههههههه
تقولى شنو تانى يا مشيرة

ياسلام علي ايام زمان, الاستاذ عبدالكريم ونجم الدين جلدونا لكن العبره بالنتائج لم تكن هناك جامعات ,لكن تخرج جيل مسؤول,وماكان وسطنا واحدا مانكرب زنده, عندما قدمنا للتدريس سرنا علي ذات النهج, والعبرة بالنتائج ياسادة...تخرج اجيال اقل مافيهم علم في راسه نار.
الا يحق لاي فرد من تلك الاجيال ان يفتخر ويكثر من انا ونحن ملئ شدقيه حتي لو اتهم بما ليس فيه؟ يااخوانا ماقلنا كل شئ بي حقه
ياجماعة قولوا يالطيف- برضه يانسمة ماتصدقي كلام الدكتوره

ربنا يديم المحبة والود في كل ارجاء المنتدى يارب

ويبعد السيطان
ههههههههههههههههههههه

مداخلات جميله وثره وقفشات حلوه ادي للتعارف والتداخل والسيرة الذاتيه وشجرة العائله اكيد في ناس كثيرين في المنتدي عرفوا اشياء كثيرة من ناحية النسب والمصاهرة من المنتدي وربنا يدوم كل جميل واتمني التعارف يكون شامل وكامل
والله من وراء القصد
ابوعزام
ارفع راسك انت هلالابي (هس ولا كلمة)

مداخلات جميله وثره وقفشات حلوه ادي للتعارف والتداخل والسيرة الذاتيه وشجرة العائله اكيد في ناس كثيرين في المنتدي عرفوا اشياء كثيرة من ناحية النسب والمصاهرة من المنتدي وربنا يدوم كل جميل واتمني التعارف يكون شامل وكامل
والله من وراء القصد
ابوعزام
ارفع راسك انت هلالابي (هس ولا كلمة)

زو النورين مايسمعك عمو عبدالرحمن ههههههههههههههههه

عشان كدا كاتب بالازرق حيجي يكتب ليك بالاحمر اصبر ههههههههه

[color=red] اوعك يامشيرة (نمسة وفاء ) تكوني من (الخمير الحمر) اذا كنتي كذلك توبي واستغفري وانيبي الي الله في هذا الشهر المعظم وادعو الله التوبه الصالحة والقبول الحسن وارجعي الي (الله والوطن والهلال)
ارفع راسك انت هلالابي (هس ولا كلمة)[/color] ابوعزام

الاستاذ ماهر لك التحيه ونحن بمعيه منتصف الشهر الكريم
مطلوب منك ان تجمع بطابور الصباح
وتكون محضر للحصه
وقائل يالطيف
ودمت

اولا السلام عليكم جميعا...........ورمضان كريم علي الجميع

ثانيا -الحاصل شنو الكتاحة دي......وانا مافي ... دا كله منك ياحوتا الله يجازيك

ثالثا-يا ماهر انا قلت ليك انا مافي ما تمشي عشان ماحيعرفوك........ لكن مابتسمع كلام الصغير....

رابعا- يا نسمة وفاء دايما في الامتحان فكري في الاجابة.... قبل ما تكتبيها.....عشان ما تجوطي الشغلانة.

انتو ماهر دا منو ......,؟"|:><+_()*

اولا السلام عليكم جميعا...........ورمضان كريم علي الجميع

ثانيا -الحاصل شنو الكتاحة دي......وانا مافي ... دا كله منك ياحوتا الله يجازيك

ثالثا-يا ماهر انا قلت ليك انا مافي ما تمشي عشان ماحيعرفوك........ لكن مابتسمع كلام الصغير....

رابعا- يا نسمة وفاء دايما في الامتحان فكري في الاجابة.... قبل ما تكتبيها.....عشان ما تجوطي الشغلانة.

انتو ماهر دا منو ......,؟"|:><+_()*


عليك الله يا ابو عزام الدخل الهلال هنا شنو ... يعرفوكم كيف...تعبانين

ووووووووياتو السمح لون الدهب ولا القمح...عشت يا مريخنا....

ا الي من سمي نفسه قدولاة الاصلي... وهو ليس باصلي
ااولا ينسب الفرع الي الاصل ... لا الاصل الي الفرع
للذالك ينسب الصغير الي الكبير...لا الكبير الي الصغير
عندما تقول نصر الدين ابو ذوالنورين...خطأ فادح, لانه خارج نطاق الادب
الصحيح هو ذو النورين ولد نصر الدين...عملا بقاعدة الاصل والفرع
يعني قدورة اخو ماهروليس العكس... فهمت؟ لو مافهمت السوط جاهز...وجلاد الموقع جاهز...في ناس في المنتدي اتجلدو في المدارس, لكن انت ياكافي البلا في البيت وفي المدرسة...ياولد قول زي ماعلمتنا حبوبتك يالطيف...يالطيف ... يالطيف.

ياقدورة هسي في داعي للعملتو دا

شيل الشيلة
انا اقول ليك هم حلين وماعندهم رابع

اما تعمل نايم وماتخش تاني

او تعمل مفتجح وتخش وتزوغ بلباقة ودي اشك تقدر عليها مع الانا بعرفن ديل ههههههههههه

واما تخلي لي الموضوع وتقول يالطيف هههههههههههه

هسي لو رجعتا للحلول حتعرف الفهم من التعداد ولقيتك مفتح ههههههههههههههه

والعربي ممكن لاني بفهم مابعرف احفظ لكن رياضيات انا البروف

من اساسيات الخبر الصحفي الخبر غير المتوقع. مثلا خبر عاجل : عض الثعبان فلان خبر عادي جدا.

ولكن ان يقول لك .. عض فلان الثعبان فهذا خبر غير عادي.. لذلك يسمي خبطة صحفية.......

وبهذا المنطق .. قدورة الاصلي اخو استاذ ماهر خبر عادي جدا ...............

ولكن استاذ ماهر اخو قدورة الاصلي خبر غير عادي..........

لذا لذم التنويه......

ولكن يا ابو وليد انا ذاتي تعبتة من الشهرة ...عشان كدة حأتنازل شوية
........

السنين العشتة فيها معاك هنايا............. اقوي من قول العوازل واسمي من كلمة وشايا


واخيرا.

الخيل والليل والبيداء تعرفني ............. والسيف والرمح والقرطاس والقلم

(وياتو السمح لون الدهب ولا القمح.....عشت يا مريخنا موفور القيم)

ويالطيف...يالطيف...يالطيف

والله ماتفرح شديد ياسيد البيداء والخيل لانو برضو مابعرفك

مجرد اسم من محمود برضو هههههههههههههه

وقولو يالطيف ا ولاد عم عابدين دياب رحمه الله

fقدورة انت عايش في اوهام قديمة,الاخبار غير المتوقعة في هذه الايام اكثر واقعية, يعني تلقي بنت لابسه هدوم اولاد, ولد لابس هدوم بنات او سلسل او حلق, بنت حالقة شعرها زي الاولاد, ولد رابي شعره زي زي البنات, واحد نص متعلم في وظيفة ادارية كبيرة وسايق اخر موديل, موظف كبير راكب ركشة, واحد ماهيته خمسمية الف وبني عمارة او فلة من ماهيته, بنت تعبانة تزوجت والاحسن منها مالاقية, موظفين دولة سودانيين يمتلكوا شقق في ارقى احياء لندن وبرايتن وبيرمنجهام ومانشستر, طبيب حقوقه مهضومه ومقربين جهلة يحددوا للطبيب حقوقه, الضياع باسم الانقاذ, التذوير في الانتخابات باسم النزاهة والديمقراطية, مشروع الانفصال باسم الوحدة, نادى اللا وحدة باسم الوحدة
اما موضوع اساسيات الخبر الصحفي وحكاية عض فلان الثعبان... شكلك ماسمعت حكاية السكران في شارع المورده ايام الكلاب المتوحشة في الخرطوم...صاحبنا من زمان سامع بي حكاية الكلاب المتوحشة ومصدق القصص وزعلان من الكلاب المتوحشة شديد...صاحبك يوم وهو سكران طينة لقي واحد سايق كلبه في شارع الموردة, والكلب كلب منزلي دلوعة وحنكوش, علي حسب السكرة جري وراء الكلب وقع فوقه وعض الكلب عضه شديده حتي صرخ الكلب وسالت دماؤه, بعد تعب فلت منه الكلب وهرب, صاحبك جاري وراء الكلب وهو يقول ليه...ماقلت متوحش..ماقلت متوحش..ماقلت متوحش
ياقدورة الناس عضت الكلاب واكلت الثعابين...تقول لي عض فلان الثعبان خبطة صحفية...
بااخي قول يالطيف...[/font]

يالطيف يالطيف يالطيف ....
ياماهر انت تستحق جلاد المنتدى بدون رجوع للادارة .........
ياقدورة زى مانسمة نصحت بان تكب الزوغة احسن تتخارج لانك مابتقدر تصارع الافيال دى رغم انك اجتهدت بشدة
لكن طلعوك فكك ساى ................ ههههههههههههه

يالطيف الحاصل شنو الهجوم كلو علي قدورة

صفاء لكن هو ما يستاهل يصارع افيال على قول مجدي وقاعد هههههههههههه

الاخت صفاء...الهجوم لي قدورة لانه انا بلعب في خانة الهجوم بس - يعني زول جلد سااااااااااكت. وقدورة ماعنده مخرج الا يتحملني , لو شفقانه عليه ممكن يحصل تغيير بين الشوطين اذا كان لياقتك عالية وروحك رياضية, وماتعملي زي نسمة تدخلي الميدان بدون تمارين لياقة بدنية. اذا كان خيارك المجازفة حددي طريقة موتك.... عايزة صاروخ ارض ارض ولا ارض جو, حتي السلاح النووي اندينا.
نضار عارفه الحاصل ولامه نفسها...

حليل ياصفاء اختي انفدي بي جلدك يابت خليني ليهم انا

اأخى وابن عمى الاستاذ ماهر لقد استمتعت أيما استمتاع بهذه المساجلات بينك وبين آل عبد الطيف وانت تعلم ان منبعكم واحد وهم لايعلمون والعتب اكيد على الزمن أما قولك أنى لا علم لى بقرابتك لى فقولك مردود فأنا اعلمها جيدا حتى قبل ان احضرالى دنقلا لأنى مهتم جدا بحكاية القرابة والاهل وان كانت هنالك بعض جفوة فالعتب ايضا على الزمن والمشاغل وربنا يثبت المحبة فى القلوب

والله ياقدوره يابن عمى اولاد عبد اللطيف انتهو منك وخلوك تقليدى تايوانى تجميع بحرى الجدول
ا اهو دا البتلقاهو من محمود
العم نجم الدين يسن دايما يحي لينا من طرف المرحوم العم عابدين دياب له الرحمه
قال مره فى واحد من كابتود اسمو عبد الله وكان فتوه وقوى ومشهور بالمشاكل فى الحفلات
مره عبدالله دا راكب حمارو وجاى من السنما نص الليل لمن جا قصاد بيت المرحوم لقى زول لابس سروال بس راكب تور كبير قرونو كبار جاى من تحت قاطع الطريق ماشى فوق .عبدالله طوالى رجع غير الشارع ومشى حكى قال اناشفت شيطان راكب تور
قالو ليهو دا ماشيطان دا عبدين دياب. قال والله الناس فى كابتود ساى شايلين حسى يقولو انا فتوه وطيب عابدين دا يكون شنو
اللعم عابدين ربنا يرحمو و يغفر ليهو ويجعلو من الشهداء والصديقين ويجعل البركه فى اولاده