حنة محاسن الما شالت
لقيتو قاعد جنب باب الشقة حقتو جنبو أنبوبة غاز ... متفن في واطة الله ...
سلمت عليهو إزيك يا أخينا مالك قاعد هنا ؟
عاين لي وهو ياشر بايدو علي الشقة وقال لي الشقة مقفولة وأنا ما عندي مفتاح المفتاح جوه أصلها محاسن قاعدة جوه لكنها متحننه وما دايره تقوم وتخرب حنتها... قالت لي أنتظر لحدي ما الحنة تشيل وأخرتها وبعدين أجي أفتح ليك الباب......
أها أنا قاعد وراجي الحنة تشيل ...
لكن يا جني الحنة بشيل في كم ساعة ؟؟؟؟؟
عاينت ليهو وكلي شفقة علي هذا الزوج الأليف الوديع الذي أبدع الفكي بتاع محاسن في أن يخلق منو نعجة وقلت ليهو والله يا أخينا شيل الحنة ومدتو بتوقف علي عوامل كتيرة لكن أهمها نوع الحنة والمحلبية والصبغة .
إنتهيت من نضميني وشرحي الوافي عن العلاقة بين شيل الحنة والمدة الزمنية لذلك وعاينت ليهو ولقيت الهم عصف باين علي وشيشو وعلي وشك أن يزرف الدمع الثخين قال لي تعرف الحنة نمرة واحد جايانا مخصوص من الدامر والمحلبية أصلية ميسو محاسن ما قاعدة تستعمل الصبغة عندها حساسية الله يحفظها ويغطي عليها من عين الناس وبطن كرعين محاسن صلاتي علي النبي ما جضوم ليلي علوي وداخلات في سفنجة يعني بي نضمك دا حنتنا عشان تشيل دايرة ليها ثلاثة ساعات وأنا ماشي الشغل كيف الحل؟؟؟ قلت ليهو طيب يا أخي كلمها وخليها تفرتق الحنة وتقوم تفتح ليك الباب . عاين لي بإنزعاج وغضب ونهرني نهرة : يازول إنت ما نصيح ؟ داير حنتها تخرب وتطلع شينة والنسوان يقعدن يتقارصن ويتونسن بيها ؟ يا أخوي كلو شيء ولا زعل حسونتي دي إنشاء الله يرفدوني من الشغل بس هي حنتها تشيل وتطلع سمحة .
وإتلفت علي باب الشقة وقعد يكورك محاسن يا محاسن ما شالت؟؟؟ وجاء صوت من الداخل وكأنه صوت عسكري الحركة وبحدة شديدة قالت ليهو : يشيلك التمساح.. ما قنا ليك لسه كرهتني الحنة زاتها يا أخي . زولي هنا قعد يبلع في ريقو وضحك وعاين لي وقال: والله الله يهديها بس عصبية خلاص إلا طيبة طيبة والله وحنينة .
لملمت بعضي ونزلت ثلاثة عتبات إلا وأسمع ليك أخونا يغني ويدندن
الخميس 27 ديسمبر 2012, 10:09 am
