وداعا مجدي حسن

سافر
مطارات الوداع ضجت قدامك وراك بيضا
وسماك غناي مساحات الأسى الفي عيونا تتفجر مدينة وناي
بطاقات دعوة الرجعة تساب عينين من الفرحة دموع للحاضرين فجت زغاريد
زعاريد غطت الدنيا وعاد فرح الرجوع منية...

النص..
يغادرنا الوجيه مجدي حسن غدا صباحا الي الدوحة منتقلا للعمل بالشركة العملاقة(قطر للبترول)
بالرغم من اننا سنفتقده كثيرا الا اننا نتمني له اقامة سعيدة وموفقة بقطر ولا ننسي ان نهنئه بالمولودة
الجديدة الشيخة(موزة) جعلها الله من بنات الوطن الصالحات

خارج النص
(يعني خلاص قررت تسافر تنزع فرحك من جوانا)

ونقول ليك كمان..
يا الشايل شمسك في جواك خليها تبين للناس تطلع
يا النازع فرحة والدة هناك غير حس آهاتك ما بتسمع
***
يا الناسي اللبقة المفتوحة دي بلاك طوريتك ما بتقرع
المنجل في راس التمرة ناسيهو وامك ما بتطلع
الكتقة وقعت والحملان في اللوبي بقت تجري وترتع
والزير الفي بيت الضيفان حرمان لا نزّ ولا نقع
***
يا السبت عقابك وروحت وحيات عز بلدك لا تنجع
الشتلة تقولك لاتنجع الواطة تقولك لا تنجع
الحوض الما رفعت سرابو ينادي يقولك لا تنجع
الحبل الما تميت وسيرو يهاتي يقولك لا تنجع
والنيل الفي واطاتنا ترع بيقولك ازرع ولا تنجع
***
ماك فاكر يوم داير ترحل وابوك الحاج شايلو عصا
لا حيلو وقف طقش الابريق اندفق سال فوق المصلاة
قام بارى الحيطة واتوكل ويقوم فد مرة ومية يقع
ويقولك يا المبروك ارجع
***
ارجع ارجع يا زول ارجع غير ارضك عاد ما بتلقى بطاح
شن داير في بلدا والناس ما فيهن حاس وما فيها صباح
الليل الويل مليان اتراح الويل الليل مليان اتراح
بياع بيقول افراح افراح زي البيقول تفاح تفاح
***
مجلوبة الفرحة ومفروشة من ضحك الناس دايرين ارباح
لو كان في ايدن ملك الكون كان لمّو عبير الزهر الفاح
كان علمو نفس الزول العاش في سدر الليل داير يرتاح
كان حجزوا الغيم في واطاتو وكان آمسكين باعو الارواح
***
وين تلقى الفرحة وتتهنى في دارا ضيقي ومافي براح
جم ناسا من عين العطشان تخطف ومضات البرق اللاح
***
سايب اهلك ونخلك راحل قول وين ماشي وين آ صاح
الشمس النايري ابت تطلع النيل يا زول اصبح رحراح
الضل قصر ما غتى رويس ولدا ساكب عرق الكتاح
الواطة ابت تديك الخير ولا انت عليك ما هابي رياح
***
قولي وين ماشي ووين غاشي ولي شن سايب بلد الصلاح
النسمة ان جاتك بتجيك ملياني عبير عند الفياح
الموية ان داير تلقاها نقاعا واطيب من الراح
ان درت نغيم الموج تلقى وان درت كمان الطير صداح
***
ارجع ارجع يا زول ارجع
الضحكة هناك من جوة الجوف الفرحة هناك ما فيها الخوف
الشقى ارحم في ضل النيم وبعيد من ناسا واقفة صفوف
جم ناس حبان تلقى المكسور مشيول في كتاف واحد مكفوف
الجن الاحمر فاقد الحيل في خلوة حاج الخير مكتوف
دكان الشيخ فوق الواطة كيمان كيمان ما فيهو رفوف

اقول ليك حاجة ياخ سافر منعول ابوها بلد او كما قال صلاح احمد ابراهيم

طريق ابيض والف سلامه للباشمهندس مجدي
وامنيات بالتوفيق وسداد الخطوات في مقبل الايام
شكرا هاني

تصل بالسلامة مجدي ورحلة عمل موفقة ان شاء الله ^_^

نفسي اعرف كيف ودعت الوالدة (الحاجة منى)
وشلت هم الخروف واللمة ولا لأ
الله يوفقك
مع امنتياتي لك بعيد اضحى مشرق ومبهج ان شاء
الله ولبابا ولكل المغتربين وما تنساه بقطعة لحمة معاك

هذه الرساله من مجدي
سلاااااامات استقرينا في قطر والحمد لله بعد رحله صعبه في السودان مع الشهادات
والنقه .. واخيرا بقينا احرار لكن نادي الاغتراب برضو حاااار تحياتي للجميع
نتمني لك التوفيق والغربه تعطيك وتأخذ منك الكثير والمشي في دروبها كالمشي علي حافة السيف
ونحن في انتظار وعدك الذي قطعته لنا بان العيد معنا
وفقك الله وسدد خطاك

الاخ هانى العمدة الف شكر على موضوعك ومتابعتك حتى استقرينا والحمد لله
ياسر .... عبدة .... ماهرون والله ناديكم دة صعب عديل كدة
وريم زاتا شفقانة معانا على حجة منى سرور الله يديها العافية
بينى وبينك ياريم الفراق حاااااااار
الواحد اتعود لكن الام صعب جدا تتنسى ولو للحظة
والحمد لله ......

كسرة: دة كلو من ناس ذنورين الله يديهم العافية بس .... قفلو الانبوب وحيرونا

الباشمهندس مجدي
عودتك للحوش الكبير تفرح الجميع
اقتل الغربه بتفاعلك مع ناس مراغة في حوشم الكبير وانت من المؤسسين

واصل وقول يالطيف