روعة وجمال العيد بالديار

عدد المساهمات : 1940 تاريخ التسجيل : 20/06/2010

أتت البشريات من ربوع البلد بان الاجواء أجواء عيد .. واجواء سفسفه ايضا لان الغيوم
حجبت الحراره التي كانت تلهب في مثل هذه الايام .. مما يخليك ماتلقي نفس تسفسف
وتعبئ جيوبك بالحلويات والخبيز وما تنسي تلف الخبيز في كيس نايلون لزوم مايخرب ليك
جلابية العيد .. وأولاد هذا الزمن هم من ابتكروا (اللف في كيس النايلون) لان في الزمن
الجميل جيوبنا كانت تفضحنا .. مع العلقه الساخنه لان جلابية العيد في اليوم التاني في خبر
كان .. أما الاخبار غير الساره التي اتتنا هي شلليات الزياره ومنذ الصباح بدات تبحث عن
ضل الحيطان والنيم والبرندات لزوم الكتشينه .. المرؤة قلت يااخوانا وماعادوا يلفوا البلاد
بطولها وعرضها دون كسل اوملل (من يوقف لنا هذا الزمن الردئ كي لاتسرق عاداتنا
وتقاليدنا السمحه .. وبالتأكيد لاننسي دور (الانترنتيات) التي ألزمت الشباب وقيدتهم حولها
لزوم تهنئة الاهل لساعات طوال. عاداتنا السمحه بدأنا تشييعها الي المقابر مع موتانا وهذه
مصيبة المصائب. طبعن اخوكم فاضي اليوم الثاني من العيد وهو لم يغادر غرفته حبيس
الحيطان الاربعه وهكذا كل اعياد الغربه وبدأ اخوكم ينتقد متخيلا مايحدث بالبلد لزوم الحساده
وكده لان الاخبار التي اتتني مبشره وجميله ورائعه والبلد بخير وعاداتنا بخير ... يلا
ياشباب اللي بالبلد
استاذ ماهر ودياب عابدين وصفيه عيسي ود نضار وسيف شهلي والجعلي ومحمد جعفر
ومجاهد حسن وياسر عبده أدونا تفاصيل اليوم الاول والتاني يديكم العافيه ودخلنا اليوم
الثالث ونحن في انتظار فيديو شاكر والاعضاء بالديار ليحكوا لنا

الاخ عبد الرحمن كل سنه وانت بالف خير وربنا يحقق امانيك واماني جميع المسلمين

كل سنة وانت بالف خير وربنا يحقق كل الاماني الممكنة والمستحيلة كمان والسنة الجاية تعيد في البلد عشان ما تحسد الناس وتلف عل كل ناس مراغة فوق وتحت وقبلي وبحري

المهم كل سنة وكل اهلنا الطيبين بالف خير وتبقي مشكلة يا عبدو لو الحاجات الحلوة انتهت

اصلا دي تقريبا الحاجة الوحيدة الفي البلد الفضلت ولو هي برضو انتهت تبقي يا مراغة عليك السلام

عدد المساهمات : 1940 تاريخ التسجيل : 20/06/2010

كل سنه وانتم طيبين الباقر ابوزيد .. ود بابكر
وين ياباقر بالعيد .. وأنت تبعد مني 25 كيلومتر فقط علي اية حال لعلك بخير والاسره
الكريمه والله يابابكر كما قلت اذا اختفت الزيارات علي الدنيا السلام .. نأمل ان لانحضر
هذا الزمن

والله موجودين بس معانا ضيوف من الرياض انت خفيف اتحرك تعال علينا

عيد سعيد على كل نجوم المنتدى
كل سنة وانتو طيبين ...
السنة الجاي كل امانيكم محققة بإذن الله تعالى ...

ظهرت في البلد عادة غريبة وجديدة ابتكرها الجيل الجديد
وهي عادة القطارات العمرية (قطارات بشرية حسب التصنيف العمري ) شفت الشغل هنا كيف

يعني يا الشيالة هيجيك القطر الاول (وهو قطر شفع الاساس ) اول عند طرفك وآخره في ميدان الوحدة (( هليلك .. هليلك)

طوالي بعد ما ينتهي القطر الاول ده .. الشيالة بتعلن طلب الامدادات

بتكون فلست خلاص .. عشان تستعد للقطر التاني وكده ..

والله العيد في البلد عندو روعة لا تعلوها روعة أبداً

الساعة 12 خلاص سخنت .. ونوينا الرجوع

شفنا قطر جايي .. وجيوبهم فاضحاهم ... سألناهم انتو ما شين تسووو شنو

انتو زاتكم بقيتو شيالات متحركة ...

واحد قال القلاب شحن ما شي يفرغ خلاص ..

نقول السلام عليكم .. بدل ما نشيل بقينا نخت الحلاوة !!!

مرة اخرى ..

كل سنة والجميع بألف صحة وعافية ..

كل عام و الجميع بالف خير

عدد المساهمات : 1940 تاريخ التسجيل : 20/06/2010

وهي عادة القطارات العمرية قطارات بشرية حسب التصنيف العمري شفت الشغل هنا كيف
يعني يا الشيالة هيجيك القطر الاول وهو قطر شفع الاساس اول عند طرفك وآخره في ميدان الوحدة هليلك. هليلك
طوالي بعد ما ينتهي القطر الاول ده .. الشيالة بتعلن طلب الامدادات
بتكون فلست خلاص .. عشان تستعد للقطر التاني وكده ..

الكلمات اعلاها من اخوكم محمد جعفر وهو ثرد رائع الاستيلاء علي شيالات الحلاوه والخبيز عندما ثردت مليء الجيوب ايام الزمن الجميل يبدو كنا دراويش لما يحدث الآن قطارات وقلابات قطارات بشريه حسب الترتيب العمري
تفرغ وترجع وتنظيم بالتأكيد كل شيء سيتغير لحد الاندهاش وفي انتظار اخونا شاكر لتنزيل
فيديو العيد والصلاة غرب المقابر وسلااااااامات الاهل فردا فردا

اخونا شريف الله يكون في عونكم .. يلا كلنا في الهواء سواء .. كل غربه في غربه والف
حمد الله علي سلامة الوالده اقامه طيبه بينكم

عدد المساهمات : 81 تاريخ التسجيل : 12/02/2011

كل سنة والجميع بألف خير وينعاد عليكم بالصحة والعافية

خالو بكرى وخالو عبدو الحاجات الحلوة عمره ما ينتهى من مراغه ربنا يدوم المحبة بين الأهل والأحبة

وشوقناااااااااااااااااااااااا لمراغة كبير

كل عام وأنتم بخير ..... وربنا يحقق كل الأماني .....

طبعاً نحنا عيدنا في الخرطوم - الكلاكلة - يحنن ......

مشينا صلاة العيد ..... إنتهت الصلاة والخطبة ....... أتلمينا زي ثمانية

أشخاص ..... خيطنا الشارع الأول والثاني في سكتنا للبيت ..... الجماعة قرصت معاهم ... قالو

الفطورأتلمينا نحنا وأحد جيرانا وفطرنا .... وهاك يا ترخيمة ....... ونومة عميقة .. خاخخخ خااااخ

إنتهي العيد ............

عدد المساهمات : 1940 تاريخ التسجيل : 20/06/2010

ونحن نودع احلي الايام من الشهر الفضيل وعيد الفطر المبارك وهذه الاطلاله من بنت اختي
عبير من ربوع بنغازي واخي الهميم رمضان من ربوع الوطن اقول لكم كل سنه وانتم بخير
وينعاد علي الجميع بالخير واليمن والبركات
عبير ماشرحتي لينا كيف قضيتم العيد وانتم منتشين بنجاح الثوره
اخونا رمضان بصراحه عيدك تعبان شديد خيطت شارعين ولمه
ونومه .. وين الزيارات وامبدات والحاج يوسف والكلاكلات
حليل العيد زمان ........

عدد المساهمات : 81 تاريخ التسجيل : 12/02/2011

والله عيدنا عيدين الحمدلله عيد الفطر المبارك وعيد تحرير من الطاغية واولاده ربنا فرجها عليهم ويفرجو على جميع المسلمين

بس خالو مهما يكون ما كيف عيد السودان بالذات عيد البلد ولمت الاهل بابا وعفراء بيحكو لينا سهفونا وشوقنا والله

عبيييييييييييييييييير كل سنة وانتي والاسرة بالف خير

حمد لله علي السلامة كويس والله انو الواحد اطمئن عليكم

كيف بالله عواطف تحياااااااااااااااااتي لها

عدد المساهمات : 1940 تاريخ التسجيل : 20/06/2010

ابن عمي د بابكر
عند اتصالي اليوم بالبلد أخوك ذوالنورين عامل برامج وضبائح من اليوم الاول ولمه في بيت التيجاني
(والعنصر النسائي ممنوع الاقتراب) طبيخ رجالي خالص .. يعني الجماعه مهيصيين
وهذه البرامج مستمره للآن .. واليوم مناسبة الاخ حسين عابدين وتعرف ماهر ودياب هناك
رقم دياب (0127905552) للتهنئه مجموعه كبيره هناك بس زي ماقلت مالاقين واحد
منهم يحكي مشغولين بالسفسفه والاعراس حتي فيدو شاكر غائب
الله يطوطحكم انشاء الله

عدد المساهمات : 81 تاريخ التسجيل : 12/02/2011

وانت طيب خالو بكرى ينعاد عليك بالصحة والعافية

وماما مشتاقه ليك كثير والله وبتذكر فيك وبتقول انا بكرى حقيتو وهو فى الثانوى انشاءالله ربنا يجمع شملنا يا رب

ماما بتسأل من حبوبة نسا كيفها وكيف صحتها انشاءالله كويسه

انشاءالله ربنا يجمع شملنا ونتلاقي في ساعة خير يا رب العالمين

وحبوبة نسا الحمد لله كويسة جدا بس الكبر. لحقتنا طبعا انا خلاص كبرت خالص حتي اكبر من حبوبة نسا

وربنا يدي العافية

عدد المساهمات : 719 تاريخ التسجيل : 25/05/2010

كل سنة وانتم طيبين ربنا يحقق الاماني لجميع اعضاء المنتدي فردا فردا انشاءالله السنة الجاية او في عيد اللحمة تكون معيدين معانا لكي يكتمل الفرح الاخ عبد الرحمن العيد في البلد مما ممكن يكون مسيخ مهما حصل والعيد هو ذاتو ما اتغير يكفي لمة الصلاة والناس تصافح بعض بشوق شديد وتهني وتبارك العيد فرحة ما ممكن تتوصف والناس بتعيد لي بعض زي زمان وهاك يا الخبائز والحلاوة من جميع الانواع والخبائز كل يوم شكل جديد وكل سنة وانتم طيبين

عدد المساهمات : 1940 تاريخ التسجيل : 20/06/2010

الاخت وصفيه
كل عام أنت والاسره والعائله بألف خير
تمنينا ان ياتي هذا العيد الذي مر كالطيف علي السودان علي وساده من الامن والسلام
غير ان مايحث علي الحدود مع الجارة المؤلمه لاتبشر باستقرار الاوضاع ..
وهنيئا لكم بفرحة العيد بالديار

تحياتي
الاخ عبد الرحمن والاخوة المتداخلون كل سنة وانتوا طيبين وربنا يحقق الامانى وانشاءالله من العايدين وينعاد عليكم بالصحة والخير وتاميييييييييييين ولامييييييييييين وزايدين
وفى امان الله

عدد المساهمات : 1940 تاريخ التسجيل : 20/06/2010

سلااااامات بالدكتوره
وسلااااامات للاطلاله بعد غيبه
وكل عام انت والاسره تامين لامين

» مراغة خضرة وجمال
» بشائر العيد
» العيد اهميته ومعناه
» خروف العيد(قصة ومعني)
» شهداء تلودي صباح يوم العيد