هوووهوولي النبي ساااااالي

الفزع هولفظ يطلق علي النفير عند اهلنا وهو كان من اروع الخدمات الاجتماعيه عندنا التي نعتبرها اليوم تهالكت واصبحت تاريخ يجتره الانسان من زاكرته .
وكانت فكرة الفزع من صميم عمل الشباب وهي بند اساسي في حياتهم اليوميه وايضا كانت تعتبر وصمة عار تلازم الشاب الذي لا يلبي دعوة الفزعات لذا كانت هناك قدسية لتلبية الدعوة في هذا الشأن (لا من يقولوا ليك الليله فزع فلان وما تمشي الا تشوف ليك بلد تانية) .
وكانت هناك اشياء في نظر الشباب لاتتم الا بالفزع وواذا تمت بغير ذلك قد يستغربوا ومن تلك الاشياء علي سبيل المثال لا الحصر:
1.حش الفول والقمح
2.نساجة العرش ورفع النعال
3.ولياسة الحيطه بالمحاره
4.دق الطوب الاخضر
5.تكين البصل
6.وحش الققصب
7. ورفع الجدول والجسر
هذا عند الرجال وايضا كانت النساء تقمن ببعض الاعمال عن طريق الفزع وهي كثيره ايضا منها:
1.بربيش الجريد
2.بربيش المكادة وعواسة الابري الابيض والحلومر
3. ونضافة العيش وغربيل الدقيق قبل المناسبات
4. لياسة الحيطه باليد والجير
وهناك الكثير من الاشياء التي كانت تتم بواسطة الفزع وكانت هنالك فزعات لها مايميزها مثال حش الفول والقمح وكانت دائما تكون فيها (الهووهوولي )والهووهولي هو نوع من التشجيع علي العمل مثلا في حش القمح كان الشخص المنادي بالهووهوولي يجب ان يكون صوته عال وذو فكاهه حتي لايمل الناس من العمل. مثلا كان يردد(هووهوولي وفراد الفزع خلفه النبي سسااالي- فهو يقول ياناس بهري الافراد خلفه النبي سااالي-ياناس قبلي -النبي سااالي-ياناس شرقه -النبي سااالي-يا ناس غربه -النبي ساالي مهمد ساليه -النبي سااالي- توكون نيرمي -النبي سااالي - ياناس شرقه- النبي سااالي -توربي باروي-النبي سااالي-دونقي اوسوي- هامد إسنكو-النبي سااالي-تيندار نيربو -النبي سااالي ) ويردد مايخطر في باله من مدح او ذم او نكته فيكون بهذا قد اتنتهي العمل وانت لا تشعر به.
السؤال : اين ذهبت هذه الاشياء اليوم؟
ملحوظه:
ياجماعه انا ماعجوز الكلام ده كان قريب والله كنا بنمشي فزعات في كابتود والسليم خليك من مراغه واسألوا ناس استاذ ماهر ديل والله اشتغلوا فزعات لامن شردوا خلوا البلد

هههههههههههههههههههههههههه
ياقدوره الاصلي نحن لسه ماوصلنا مرحلة انعدام الفزع الجديد شنو قوي من عماراتنا ناطحات السحاب
بعدين البياكو 17 قراصة ملوحه وصحن بلح ديل لسه قاعدين وبي اكلم زاتو ومافي فزع انا امبارح شفت واحد منهم والفول والقمح لسه في وقعدين يحشوهم بي المنجل اسأل عامر لو انت ماعارف وفي حاجات كتيره محتاجه فزعات زي ماقال الاخ عبدالرحمن نصرالدين والشباب قاعدين في نفس ضل النيمه القبيييييل الجديد شنو وقول يالطيف زي ما قال الاستاذ

ابن خالتي طارق
رمضان كريم انا عارفك عارف المعاني كلها لكن لابد من التوضيح لمن لايعرف
البربيش للجريد : ازالة الصفق منه
البربيش في المكاده :فصل الحبوب من الكوداد
تكين البصل :شتل البصل في الارض
النبي سااالي :صلوا علي النبي
هووووهوووولي : والله الا بعدين نسأل حمزه عثمان علوبه

ارجو ان تتقبلني مرة اخري ابوجارو

نسيت ان اشكر كل الشباب الذين اتعبتهم بالفزعات لبناء منزلي بدنقلا...وكل طلابي الذين تم استغلالهم باسم (الفزع عند الاستاذ)
لهم مني كل الحب والتقدير

وقولوا يالطيف

لك التحيه ابو جارو
والله دق العيش دا ماشفنا هو لاكين سمعنا بيهو والاخ برعي نور الدين الله يطراه بالخير كان مثل يهتدي به في النشاط والهمه ماكان واحد من افراد الفزع بس هو كان دايما تلقاه في ادارة الفزعات وبعد دا كلو السوقه الفيها برعي كان بتخلص بدري

عمي العزيز الامين
رمضان كريم وتصوم وتفطر علي خير وجزاك الله خير للمرور الجميل والله فعلا الناس الزكرتهم في بداية حديثك هم مدارس ولا زال عطاؤهم مستمر وانا من هنا والله بناشد كل اعضاء المنتدي لاقتراح تكريم كل الشخصيات التي كانت لها دور فعال في معالجة كافة المشاكل التي تواجه مراغه في الماضي اي وضع تصورللتكريم حتي لو كان معنوي والموضوع ده انا بتكلوا عليك انت والاخ عبدالرحمن والاخ الاستاذ ماهر والله الناس ديل ماقصروا علي مر السنين الفاتت مامعقول يتخلوا ساكت كده وياحبزا لو يكون التكريم ايام العيد لانو الناس كلهم موجودين حتي لوكان بعدسنه

ابن عمتي التحفه ليك كل الود ورمضان كريم وموضوع جد شيق وجميل خاصه بالمشاركات الثره من الاستاذ ماهر وعمنا الامين والاخ عبد الرحمن لذا ارجو منهم ان لا يكتفو بهذه المشاركات بل يواصلو في سرد الزكريات الجميله الممتعه ولكم عاطر التحايا

الاخ العزيز قرشي
رمضان كريم وكل سنه طيب
والله كلامك في محلو ناس السليم قويين في الفزعات لاكين اقوي في مسائل الاكل
مره مشينا في عرس واحد دفعتنا قاموا ضيفونا قعدونا في غرفه علي حظهم التعيس
الغرفه وقعت جمب الناس البيوزعوا الصفر والعيش تلاته انفار يجيبوا العيش يردموا وزي سبعه انفار يعبوا الصفر وعشره يشيلو ويجرو لابره دفعتي من الجزيره مدني قال لي دا شنو ده ديل قعدين يودوا الاكل دا وين؟ خجلت قلت انحن في السليم البلد وسيع وناسا كتار خالص وكلهم رجلهم واصله وانا عارف انو الاكل داك ممكن يقضي الولايه الشماليه كلها لو الوضع عادي
ملحوظه
بعدين العيش عندهم [ندعوك للتسجيل في المنتدى أو التعريف بنفسك لمعاينة هذه الصورة] بالكتف يعني مابقول ياولد جيب كيس عيش بيقولوا يا ولد جيب كتف عيش

ابن خالي العزيز النزير
التحايا الطيبات والمباركات في شهر البركات
انا زاتي بنطلب نفس الطلب لمعرفتهم الواسعه حول الموضوع وطرائفهم
وانحن منتظرين ونقول يالطيف الطف بعبدك الضعيف

يا سلااااااام اخونا ياسر فؤاد والله موضوعك رجعنا سنين جميلة والمواقف الجميلة والحلوة كتييييرة لكن الواحد ما مذكره وهل ممكن حاجةذي دي ترجع تاني الله اعلم

تحية مسائية عاطرة ابن عمتى ..الله يديك العافية على هذه المادة الجميلة المعتقه من الزمن الجميل ونحن ناس زاك الزمان ..اندثرت تلك الظواهر الاجتماعية الطيبة واثرها كان كبير وقيمتها ايضا .وسردك مشوق جدا ورسمت بريشةفنان تلكم اللحظات ...هل يا ترى يناسب زمننا الحالى هذه الاشياء ..تفتكر هسه لو فى زول بنى بيتو بى فزع حيسلم من المعايرة والشماته؟؟؟؟
هذا هو الفرق
تحية الصحة والعافية

الاخ /العزيز جدا جدا هيثم
مشكور علي المرور الجميل ونكرر لك الشكر بدعوتك لي عمي الامين عشان يتحفنا بي
معلوماتو الرايعه عن ايام قبيل ونحن لسه في انتظار الاستاذ ماهر والاخ عبدالرحمن والله ياهيثم
انحن كنا بنتمني انو الناس القالم عمي الامين ديل يكونو مشاركين في المنتدي اكيد كانوا اضافو الكتير والمثير علي مر السنين الفاتت والحياه في بلدنا كلها زكريات جميله ومواقف طريفه عمي الامين بنشكرك للمره التانيه
الاخ الرايع / سيف شهلي
مشكوووووور وزي ماقلت انحن اخر جيل عاصر الفزع وهسي اي حاجه تشتريها بي قروشك
الدكتور / الخلوق بكري
نشكرك علي المرور والاطلاله الظريفه ونقول ليك رمضان كريم تصوم وتفطر علي خير
ابنة خالي الدكتوره/نضار
(المرأه الفضيه) اينما شاركت بقلمك الفضي اذداد الموضوع بريقا ولمعانا كلامك في محلو لكن في حاجات محتاجه للفزعات
لليله زي الحاجات العامه في القريه زي المزكز الصي والمدارس والمشروع وغيره

الاخت العزيزه النشطه دوما/ وصفيه
مشكووووووووره علي المرور والرد والتليق
نشكر لك مساهماتك الكثيره والمقدره في شبكة مراغة
ونتمني من المولي عز وجل الكثره من امثالك ونحن نعتبر دور
المراه مؤثر في كافة النواحي وايضا نشكر باقي الاخوات المشاركين
في المنتدي بصوره متواصله ولك التحيه علي وجودك الدائم