بعض الامثال في منطقتنا

عدد المساهمات : 154 تاريخ التسجيل : 07/07/2011

يعتبر هذا الموضوع مواصله لموضوع الاخ الكريم عبدالرحمن وتلبيه لطلب ابن خالتي طارق والامثال السودانية كثيره لا حصر لها وانا سوف اسرد بعض الامثال الشايعه عندنا في المنطقه علي سبيل المثال لا الحصر:
العميان شايل المكسر
العاضي الدبيب يخاف من جرة الحبل
الماعندو كبير يشتري كبير
الفاتك فوتو
الفقر يلقي العضم في الكبده
شايف الفيل وتطعن في ضلو
العشر قام ليهو شوك
ناس البكا استغفروا والجيران كفروا
الجمل مابشوف عوجة رقبتو
الماعندو لسان فقر وفلسان
الواقعه من السما تتحملا الوطه
طلع من المولد بدون حمص
دخول الحمام مازي مروقو
الفي البر عوام
الكلب ينبح والجمل ماشي
قبل النفاس الريحه نحاس
العاقل طبيب نفسو
البسأل مابتوه
بلدا مابلدك حوم فيها عريان
العامه مالقت اتنين الجري والطيران
جلدا ماجلدك جرو بالشوك
درب السلامة للحول قريب
النار تولد الهبوت
الجمره بتحرق الواطيها
من راقب مات هما
بلدا ما فيها تمساح يقدل فيها الورل
طلع منها زي الشعره من العجين
السايقه واصله
البقدم السبت بلقي الاحد
العمل القنطره يتحمل الدوسه
سيد البكا عضانو طرشه
سمح القول في خشم سيدو
السواي ماحداث
خت العقده في المشار
البيب بالاشاره يفهم
قوشكا دنقرير برير غالي
سيدو راضي شن حشر القاضي
عمر الشقي بقي
العين مابتعلي عي الحاجب
البطن بطرانة
سيد البدري سمين
وهناك الكثير والمثير يمكن للاخوه الكرام في المنتدي ان يساهموابما يخطر في بالهم منها

عدد المساهمات : 610 تاريخ التسجيل : 08/12/2010

طيب ممكن اجيب امثال من منطقتنا برضو Rolling Eyes

نٍمر كَان ماتت كُلو جلدايتو أرقطْ
كديسه ما بِنْشَال في طبق
أبَوالقَدح بَعْرفي مَحل بَعضي أخيّو
شَدَره كَان مَالت بِتَكي في أخيّوْ
دُنْيا دَبَنْقَا دَرْدقُو بِشيش
جَقْلّو مَامشِى عُرجّه
الديّك أجاويدو السّواَسيِو Laughing

أَبو جَنْقُور في فَاشر مَاعندوُ رأىَ
سَفْر خَرِيْف وأكل تَفَاتِيف وجِيْزة بِنىّ لَفيِف كُله منّو أقِيف
شَدَره كَان هُوزَزَتْ ولاَ وِحيْدو يا هَبُوبَاي يا أبلاى
ألْمى حَار مَا لِعبْ قُعُونْج
تِجخِجِخ سُنون بجيب دم
تِلصق طين في كِرعين ما بَبقى نِعلين
ما تعضى حَلوفُ وتملأ خَشمك صُوف
بَليلَة مباشر ولا ضبيحة مُكَاشر
الف سلام لى اهلنا فى دارفور وهى منطقة الامثال حيث تعتبر من اكثر مناطق السودان ضربا للامثال
وهذا نتاج لوجود الحكماء والحكامات فى تلك المناطق
والامثال تعتبر فى منطقة و تمثل الأمثال جانباً من الإقناع والحجة
وتعتبر الأمثال مهمة في أدب دارفور إذ هي مرآة تنعكس منها أخلاقياتهم وعاداتهم الجميلة

شغل نضيييف يا جنابو ياسر
ولكن لو شلت المادة دي كلها ونقلتها لبوست عبدو بكون-في رأيي- أجمل وأفضل وتعم الفائدة من بكان واحد
ولك الود

مشكور جنابو

لكن ود خالتك طارق مفروض يعمل لي الزينا دكشنري

سبحان الله اول مره اعرف انه فه رطانه غير رطانتنا

نقول يالطيف

عدد المساهمات : 1940 تاريخ التسجيل : 20/06/2010

اخونا العزيز ياسر لك التحيه علي هذه الروائع
والاخوه الكرام الاعزاء هذه الامثال الكل علي علم بقيمتها لذا اسمحوا لي ان
اقوم بجمعها في بوست خاص بالمنتدي الثقافي وكل من يجد الجديد يقوم بتنزيله
مباشره باسم الجميع .. وأنوه للاخوه ياسر وطارق ورمضان الحقوق محفوظه
الي ان يتم التثبيت من قبل الاخوه في الاداره .. لرأي الاخ هيثم شهلي
باسم (اروع الامثال السودانيه *** مشاركة من الجميع ) بالقسم الثقافي
والشئ الجميل من الاخوه طارق ورمضان وياسر ان الامثال غير متشابه
وهذا يشجع ان يتم التوثيق والتثبيت

ودمتم

عدد المساهمات : 154 تاريخ التسجيل : 07/07/2011

الاخ عبدالرحمن/ نحييك علي هذه الفكرة الرائعه وليس بعيد عليكم يا ابو الدايمي استلهام الافكارحيث كانت لكم اليد الطولي في انشاء شبكة مراغه الاصاله والتاريخ لكم التحيه علي هذا البذل والعطاء المتجدد والممتد والشكر ايضا للاخ طارق والاخ رمضان للعروض الجميله من الامثال التي اضافوها ومشكوووور الاستاذ ماهر علي المرور الجميل ونحن في انتظار الاضافه من الاخوه في المنتدي
ملحوظه:
ياطارق الامثال الدارفوريه دي استاذ ماهر قال دايره ترجمه وانت تفهم ترجمتها كلها في مثل واحد ضحكني ماعارف زي البقول كديسه مابتشال في طبق ولاحاجه كده وانت زول متداخل في كل القبايل من زمان من خلال علاقاتك الممتده في الخرطوم وامدرمان وبحري

عدد المساهمات : 1940 تاريخ التسجيل : 20/06/2010

حقيقة اخونا ياسر بارك الله فيك ..اخوك عبدالرحمن (صفر دولي ) في هذه الامثال زي الجماعه
ياهم تعرفهم طبعا قريبك (طارق) طيب اذا مافهمتني ناس زريبة العيش العرضه شمال (التكتح)
لكن تواق لقراءة وتوثيق هذه الامثال وتم سرقة مساهماتكم هذه في دفتر خاص بي لانها صراحة
قمة في الروعه وهذه الامثال يعلم الجميع انها موجوده في البيت السوداني والشارع السوداني
وتأخرنا كثيرا لتدوينها .. كما اتمني مزيد من المشاركات وأكيد مابتقصروا والبوست مفتوح
للجميع للمشاركه . وأنوه للاخوه منير وشهاب للتثبيت بالله عليكم في اجمل من
(تعيس الحظ يلاقي العضمه في الفشفاش
والفقر يلقي العضم في الكبده
وياريت لولقينا بعض المفسرين .لاني حاولت تفسير مشاركة رمضان (حساب ولاكوار)
دون جدوي
دمتم في أمان الله

عدد المساهمات : 43 تاريخ التسجيل : 25/05/2011

الاخوه الاكارم رمضان كريم ابن الخاله طارق والله اهجت زكرياتي وبدايات عملي بغربية الجنينه وزالنجي والفاشر وازيدكم بالامثال الاتيه تكمله للاخ طارق ,,,ام صلمبويتي ولاكدكاية زول

جراديه في سروال ولا بسوي حاجه لكن قعادو ماحلو

الصلمبوي الفاره الصغيره الكدكاي الجقر ودمتم زخرا للتراث

عدد المساهمات : 1940 تاريخ التسجيل : 20/06/2010

الاخ عوض عزالدين بشير تحياتي
تم تخصيص موقع خاص (اروع الامثال السودانيه بالقسم الثقافي) نرجو ان تأخذ بوست
خاص بيك وتسجل هذه الامثال الرائعه وبانتظار مزيد من المشاركه والتنزيل

» أروع الامثال السودانيه ** مشاركه من الجميع