عادات سيئة في البيت السوداني

ان الحمد لله نحمده ونستعينه ونستغفره ونستهديه ، ونعوذ بالله من شرور انفسنا ومن سيئات اعمالنا يهده الله فلا هادي له ومن يضلل فلن تجد له ولياً مرشداً
قال المولى عز وجل في محكم تنزيله( ولنبلونكم بشئ من الخوف والجوع ونقص من الاموال والانفس والثمرات وبشر الصابرين(155) الذين إذا اصابتهم مصيبة قالوا انا لله وانا اليه راجعون (156)
قال رسول الله (ص) من سنّ سنّة حسنة او عمل بها كان له اجرها واجر من عمل بها الى يوم القيامة.
اليوم سوف اناقشكم في موضوع لابد الاهتمام به ومناقشته على مستوى الأسر في مراغة وفي دنقلا بل في الخرطوم وحتي البلاد في الوطن العربي والى امريكا وكل الدول.
هذا الموضوع لابد التفاكر والعمل به ، فان من مساوئ هذا الموضوع مضيعة الوقت ومضيعة المال وعقد الصفقات والاجتماع اللاموضوعي والبوبار.
عندما يتوفي شخص لدى أي اسرة ويتم دفنه تحصل الطامة الكبرى وتحل محلها العادة السيئة ألا وهي تجهيز الماء البارد على شرط ( موية بااااردة ) ويا حبذا عصير اورنجا ، وبعد ذلك ينصب اهل الميت صيوان كبير وكراسي وفرشات طبعا الفرشات دي لي ناس الحي والجيران والاهل الاقارب اما الكراسي القدام اي ( VIP) دي تبع الضيوف المهمين والشيوخ العندهم كلمة ،،،يعني حتى التعزية بتنقسم الى اثنين مثلا " ياتي واحد من ناس الحي او زول يكون ما مهم كدة يعني يقول الفااااااااتحة تلقى جزء من اهل الميت قام والتاني عمل نايم والفاتحة تكون باااااااايخة ويا الله الله رافع يدوا وينادي يا ولد جيب موية هنا ، وسريع سريع خارجوه.
اما اذا جاء ضيف بي عربية فارهةاو زول تقيل او شيخ كلمتوا مسموعة تلقى الناس قبل ما يقول الفاتحة قاموا جارين نحوه وراجنوا يقول الفاتحة وتعال شوف بعد داك كبكبة تقيلة واهتمام زايد عن اللزوم ويقوم زول كبير يمشي بي نفسوا يجيب موية ويسألوه اذا جاء وقت الوجبة والشاي في كبابي كيف كيف دة كلوا كلام فارغ.
الزول البجيك في مصيبة بجي عشان يواسيك ويخفف عنك ويقيف معاك في مصيبتك ، تقوم انت تفرق الناس دة موضوع قائم بذاته نتطرق اليه في موضوع منفصل تماماً.
وبعد مالناس شربت الموية ونصبوا الصيوان ينسوا الزول المات دة نهائي ويبقوا في تجهيز الفطور او الغداء ويلملموا العدة من البيوت ، وناس تمشي لشراء الخضار والخروف ، والعجب كمان اذا اهل الميت مرطبين يشتروا عجل طوالي ( الشغلة بقت بوبار ) بقى مافي استحاء خاااااالص اللهم يكفوا ضيوفهم وبس ، وبعدين في ناس مما يلقوا ليهم زول مات تاني النار ما بتقوم في بيتهم لمدة ثلاثة ايام ، وبعد دة يقولوا ليك ( والله كنا واقفين معاهم مساكين ربنا يصبرهم ) بالله الكلام دة ما حاصل يا ناس.
ثم بعد ذلك يعدوا الوجبات الثلاثة والشاي والقهوة ودة داير شاي تقيل ودة ما بشرب سكر تقيل ويا ولد جيب شاي هنا من غير سكر وتاس تجي راجعة من الشغل تجي لي بيت العزاء طوالي دايرين شنو دايرين غداء وشاي وركلسة وعدم موضوع والليلة الجاء منو والما جاء منو ، " طبعا هنا بذكروا الناس المهمين بس" ، وتمشي تدخل للنسوان ونسة وضحك وقطيعة في بعض .. حتى الرجال كمان ،
وبعد اضحك دة كلوا تجي واحدة من برة تبكي يقوموا يبكوا طوالي .. اول ما تنتهي من البكاء يقعدوا تااااااااااااني في الونسة الما عندها حد دي.
ويستمر هذا الحال لمدة واقصاها سبعة ايام أي ( يسميه النساء السابعة وال 15 وال 40 ، يعملوا فيها الصدقة من الصباح يمشوا يزوروا القبر ويجوا يعملوا الاكل وفي المساء يعملوا الزلابية والبليلة) دة بقى شئ ثاااابت بالنسبة للنساء.
طيب يا جماعة:
أين الشخص ، أي اين المتوفى الذي اجتمع الناس من اجله.
ويــــــــــــــــن يا فردة دي اسمها ( ميتــــــة وخــــــــــــراب ديــــــــــار)
في زول ما عارف المثل الشعبي دة.
أصحوا يا ناس ، أوعوا يا جماعة ، قولوا الصاح يا أمة محمد صلى الله عليه وسلم.
الكلام دة كلــــــــــــــــــــــــــــــــــوا بدعــــــــــة ، وكل محدثةٍ بدعة وكل بدعةٍ ضلالة وكل ضلالة في النــــــــــــــــــــــــــاااااااااااار

فالتعزية مشروعة، وفيها تعاون على الصبر والمصيبة، ولكن الجلوس للتعزية على الصفة التي ذكرت من قبل، واتخاذ ذلك عادة لم يكن من عمل النبي صلى الله عليه وسلم، ولم يكن من عمل أصحابه، فما اعتاده الناس من الجلوس للتعزية حتى ظنوه دينا، وانفقوا فيه الأموال الطائلة، وقد تكون التركة ليتامى، وعطلوا فيه مصالحهم، ولاموا من لم يشاركهم ويفد إليهم، كمن ترك شعيرة إسلامية، هذا من البدع المحدثة ، التي ذمها رسول الله صلى الله عليه وسلم في عموم قوله: " من أحدث في أمرنا هذا ما ليس منه فهو رد " متفق عليه، وفي الحديث " عليكم بسنتي وسنة الخلفاء الراشدين المهديين من بعدي عضوا عليها بالنواجذ، وإياكم و محدثات الأمور فإن كل محدثة بدعة وكل بدعة ضلالة " رواه أبو داود والترمذي وهو صحيح ، فأمر باتباع سنته وسنة الخلفاء الراشدين من بعده، فهم لم يكونوا يفعلون ذلك، وحذَّر من الإبتداع والإحداث في الدين، وبين أنه ضلال ، فعلى المسلمين أن يتعاونوا على إنكار هذه العادات السيئة والقضاء عليها إتباعاً للسنة ، وحفظ الأموال والأوقات، وبعداً من مثار الأحزان، وعن التباهي بكثرة الذبائح ، ووفود المعزين، وطول الجلسات، وليسعهم ما وسع الصحابة والسلف الصالح من تعزية أهل الميت، وتسليتهم والصدقة عنه والدعاء له بالمغفرة والرحمة.
" فتوى سماحة الشيخ عبد العزيز بن باز – رحمه الله – فتاوى علماء البلد الحرام ص . 763- ، فتاوى نور على الدرب -/369 "
ــــــــــــــــــــــــــــــــــــــــــــــــــــــــــــــــــــــــــــــــــــــ
ولا تحدد التعزية بثلاثة أيام لا يتجاوزها بل متى رأى الفائدة في التعزية أتى بها، وينبغي اجتناب أمرين وإن تتابع الناس عليهما :
أ - الاجتماع للتعزية في مكان خاص كالدار أو المقبرة أو المسجد .
ب - اتخاذ أهل الميت الطعام لضيافة الواردين للعزاء .
ولما احدثت الاجيال اللاحقة الاجتماع وصنعوا الطعام للمجتمعين قال الصحابي الجليل جرير بن عبد الله البجلي رضي الله عنه ( كنا - اي معشر الصحابة - نعد الاجتماع الى اهل الميت وصنيعة الطعام بعد دفنه من النياحة) رواه الامام احمد باسناد حسن. واما تقديم الطعام لاهل الميت من جيرانه او اقاربه - فهذا سنة ، لما روى ابو داوود عن عبد الله بن جعفر قال ( لما جاء نعي جعفر رضي الله عنه حين قتل قال رسول الله (ص) : ( اصنعوا لآل جعفر طعاما فانه قد اتاهم ما يشغلهم) ورواه الامام احمد والترميذي بن ماجه وحسنه الترميذي. وبقدم الطعام لاهل الميت في بيتهم ، لا للمجتمعين في السرادقات او الخيام المنصوبة ، لان المقصود من ذلك انه قد شغل اهل الميت الحزن عن صنع طعامهم فيقدم لهم الطعام.
فتوى اللجنة الدائمة للبحوث العلمية والإفتاء 9/137-138 . "
ـــــــــــــــــــــــــــــــــــــــــــــــــــــــــــــــــــــــــــــــــــــــــــ
نرجوا كل من قرأ هذا المقال ان يعمل به اولا على أسرته او اهل بيته والجيران ، والجار بالجنب والاصدقاء لكي تعم الفائدة على المسلمين.
اللهم وفقنا في عمل الخير واجعلنا نسير على سنة النبي صلي الله عليه وسلم وان يجعل الآخرة هي دارنا وان يغفر لسائر اموات المسلمين وصلي اللهم وبارك على سيدنا محمد (ص) وسلم تسليما كثيرا

ملحوظة:
هذا جزء من الحلقة الاولى لكي نناقش هذا البند وننتقل بعده الى الحلقة التالية

ترقبونا في الحلقة القادمة

هذا الموضوع فكرة الوالدة دولة عبد الفتاح عبد الماجد بخيت
وكان التنفيذ لشخصي

عادات سيئة في البيت السوداني Bva78086

عزيزي الابن محمود

لك التحية والود ولوالدتكم(متعها الله بالصحة والعافية) عاطر التحايا والاشواق ومليون مرحب عبركم.

وبحق الموضوع جد شيق ومهم وبحاجة لتسليط الضوء عليه بزوايه المختلفة لكون عادة سيئة وبحاجة لبتر من المجتمع.

وفيما يل أقدم قصة واقعية في ذات الشأن على لسان مغتربة سافرت الى السودان للعزاء ولكم هذه اللوحة وبعدين نواصل النقاش:

توفيت خالة من خالاتي العزيزات فقررت السفر لتقديم العزاء وهذا أقل شيء يمكن القيام به. أخواني ... أخواتي... .زميلاتي ( أمم متحدة)... جاراتي رغم أنكن فلسطينيات وأناالوحيدة بينك كالنقطة السوداء في الثوب الأبيض لكن معليش تعالو شوفوا البدع أكل من كل لون وصنف دا حتى التحليات أشكال وألوان من أم علي إلى الترايفل أما النسوان فحدث ولا حرج حنن , دهب , دخاخين , تياب آخر صيحة وكأن المرحومة خرجت في نزهة قصيرة على الشاطئي عيب ياجماعة والله عيب أهل الميت ماذنبهم ؟؟؟ لماذا لا نحترم مشاعرهم ونقدر ظروفهم التعيسة ؟ ليه ميتة وخراب ديار وعدم إحترام مشاعر ؟
استرقت السمع لأستمع لهذا الحوار:
* لكن ما تقولي لي يا سلوى حنتك ما رهيبة... ودخانك يقول يا ليل.!!!
- الحالة دي حنة بكاودخان على السريع ومال لو شفتي حنتي حقت العرس تقولي شنو؟ لكن تعالي هنا ياخاينةغيرتي دهبك وما قلت لي ؟
* والله غيرته من زمان وماجات أي مناسبة لمن سمعنا خبر المرحومة جريت جري على الدولاب وطلعته قلت دي مناسبة .
* أصبري يأختي إنت ود المرحومة الكبير صحي طلقت مرته ؟؟
- والله سمعت الخبر دامن بدري ولمن ما شفتها في البكا إتأكدت من صحته. اسمعي القاعدة هناك ديك مش بت أخت المرحومة الجات من أبوظبي ؟
_ ياها شوفيها حزنانة وبتبكي كأنه ما مات ليها زول قبال كدي هسي كما ساكت لزوم قطع التذاكر والجية شنو المرحومة الله يغفر ليهاويرحمها.
* والله باين عليها الروقة والترطيب ياختي ديل ناس مكيفات ساكت ونحنا الشمس هرتنا
- عليك الله ياختي خليني منهم يقعدوا معانا أسبوع واحد يبقوا زينا وأكتر. نظرت إليهن باستغراب فقامت أحداهن لتشرب كابتشينو بينما انصرفت الأخرى لتشرب نسكافيه بحليب أما أنا فبكيت مرتين مرة على خالتي التي تحول مأتمهاإلى فرح والمرة الثاتية على قيمنا .اللتي دفنت مع موتانا.

الحمد لله والصلاة والسلام على افضل خلق الله محمد صلوات الله عليه وسلامه
أستاذي الموقر: بكــــــري جعفــــــر
والله - هذه العـــادة لابد وان تبتـــر بتـــــراً من اعمق اعماق جذور هذه العادة التي كـــــادت ان تتغلب على شعائر الاسلام الحبيب.
وحل هذا المـــــأزق لابد ان يعقد له إجتماع سريع جدا بعد التفاكر والتشـــــاور فيه في هذا المنتدى.
لان الحاجة دي بقت حاجة عاااااااادية جدا جدا وحصلت قريييييييييب دة في وفاة احد من أقاربنا ، فلا بد ان ننهض ونقف متصديين لهذا الجسر المتين.
ربنا يوفقنا على الطريق السليم وان يلهمنا الصواب وان لا يجعل لنا عقبة ان شاء الله ، وصلي اللهم وبارك على سيدنا محمد (ص) وسلم تسليما كثيراً

هلا والله محمود منور المنتدى

طبعا خالتي دولة اتكلمت معاي في الموضوع دا وانا قلتا ليها خلي واحد من الاولاد يشترك ويشارك بيه ويناقشو
وبالجد موضوع مهم جدا .
بعد ماوقفو التشكيل في الاكل في مراغة شايفاهم تاني قعد يرجعو حبة حبة

موضوع داير وقفة

الحمد لله رب العالمين
والصلاة والسلام على اشرف خلق الله اجمعين
سيدنا محمد صلى الله عليه وسلم.
والله - يا مشيرة الموضوع دة داير وقفة من غير أي تردد.
وبعدين نحن اذا ما اهتمينا بالجانب الديني أولا - يبقى مافي داعي للمنتدى ولا لي لمتنا أصــــــــــلا
فالدين يســــــر
والاهتمام بالاسلام في حياتنا بسهل لينا حاجات كثيــــــــــــــــــــرة جداً في حياتنا العملية.
لان الرسول (ص) قال ( عليكم بسنتي) والرسول لا ينطق عن الهوى ، ان هو الا وحي يوحـــــــــــــى.
فلذا نرجوا من أعضاء المنتدي ان يتطرقوا للمهام الدينية أكثر وأكثر حتى يجعل الله لنا من امرنا يســـــرا.
وصلي اللهم وبارك على افضل خلق الله وسلم تسليما كثيرا

عادات سيئة في البيت السوداني Bva78086

موضوع: خاب ظنها السبت 12 فبراير 2011, 4:39 pm

السلام عليكم
وبعده
طرحت عليكم ، بل طُرح عليكم موضوع هام وعاجل
للتشــــــــــــــــــــــــــاور
ولكن لا أحد يجيب
تكتب بعض الردود فقط
تكتب المساهمات منسقة ومنمقة
يهتم الناس ببند يسمى ( الرتوش )
أستحلفكم بالمولى عز وجل
لماذا لا نقف على هذه العادات السيئة ونبترها
لماذا لماذا لماذا لماذا لماذا لماذا لماذا

لماذا لا نبدأ الطريق من داخل أسرنا ونتشاور !!!
ما ضروري نتناقش في المنتدى
ممكن كل زول يشوف القريب منو ويتناقشوا في هذه البدعة

ذهبت الى عدة أمكنة
ووجدتهم مشغولين
في شنو؟
والله ثم والله في أمور منطقتنا الحبيبة ( مراغة )
لكن دة ما بمنع اننا نحل الموضوع دة
والوالدة ما زالت تكتب وتفكر في انزال الحلقة الثانية
ولا على البـــــــــــــــــال
ذهبت الى العم عبد اللطيف أكرمه الله
وقال لي ( الحاجات دي بقت ماشة كويس الايام دي ، لان المآتم كانت
40 يوم وبدأت تتنازل حتى وصلت الى 2 يوم)
أرجوا من الإخوة الأكارم الاهتمام بالجوانب الاسلامية
حتى يعم الخير منتدانا ومنطقتنا

لكم العتبى ان كان قلمي حــاد عليكم

وتقبلووووووا مرووووووووووري

وصلي اللهم وبارك على نبينا محمد (ص)

وما زال المسلم
يطرق على أبواب
الخير
وتقبلوا مروووووووري

تقبلووووووووووووووووا مروري
وربنا يهدينا ويهديكم

» من عادات بلدنا
» العودة الي البيت الكبير
» الفلكلور السوداني...
» بيت البكاء فى المجتمع السودانى
» دعاء الجنيه السوداني