تحكي جيجي وتقول :
بتذكر أنا بت عمي كانت حلوة خلاس وكانت صحبتي ..... عرست راجلا دا بقصة حلوة جدا .... كانت ماشة في الشارع وجاء واحد ماشي وراها وبقى يشاغل ويعاكس فيها :
ايه الحلاوة دي .... ايه الجمال دا ..... عبرنا يا جميل ..... اخخخخخخخ منك انتي أكيد أمك نحلة جابت العسل دا
قامت بت عمي قبلت عليهو وضربتو كف ذي كف المسلسلات داك قالك طاااااااااااااخ ..... وعشان هو ابيضاني حلبي لمن يدها علمت على وشو ..... صاحبنا تاني يوم جاب اهلو ومشى اتقدم ليها وعرسا ولغاية هسة لمن تهيج بتمد ايدا عليهو علا هو طيب .... بيقول الكف الأخدو دا خلاهو اتأكد انها بت ناس طيبين ومن اصل طيب علا المسكين ليوم الليلة بنلقى جضمو محمر ووارم .....
أها انا قلتا أعمل زي بت عمي دي يمكن ألقى لي عريسن كااااارب حلو ..... المهم في يوم انا ماشة الشغل .... علا أحس لي بواحد ماشي وراي .... ألف بيجاي يلف وراي .... بقعر عيني كدا عاينت ليهو .... وبقيت أرجف من الفرحة .... دا زولن مو ساهل .... قاشر قشرة ولا ولد وزير .... وشايل في ايدو شنطة سمسنايت ..... باين عليهو ود عز وحنكوش ... بقيت أفكر وأقول في نفسي بس كدا الليلة دي يفتح خشمو واصرو ليك كف ما ينساهو طول عمرو ..... علا ود الناس ما فتح خشمو بس قاطرني وماشي وراي .... أفتح خشمك آآزول ان شاء الله يقطرك الكلب .... لما ما فتح خشمو مشيت وقفت في محطة الباص وجات حافلة وركبتا فيها ..... وصاحبنا ركب معاي واتحكر جنبي .... في الكنبة الورا .... قلت في نفسي في الحافلة الحكاية بتكون صعبة وما بقدر أديهو كف ..... أعمل شنو ..... وفي اثناء ما بفكر قام صاحبنا قال لي :
لو سمحتي ممكن أسألك سؤال ؟
قال لي لو سمحتي .... اتكلم بأدب ..... وأنا الكلام دا بيخليني عايشة في عالم تاني من النشوة ..... لأنو راسي بيكبر ..... استجمعتا قوتي وقلتا ليهو بتكشيرة : خير ؟
قال لي : انتي مرتبطة ؟
وووب علي دا كلام شنو .... دا كلام يتقال هنا ؟
قال لي : بصراحة لاحظت مافي دبلة في يدك تدل على انك مخطوبة أو متزوجة وانا بصراحة عايز اتقدم ليكي واخطبك
انا طرتا من الفرحة علا ما عايزة اظهر ليهو فرحتي قلتا ليهو .... الكلام دا تمشي لأهلي عديل مش تقولو لي هنا
قال لي : انا حبيت أسألك في الأول حتى لو لقيتك موافقة امشي لأهلك .... وعلى فكرة انا متابعك من فترة وعارف بيتكم بس بحدد بعد كلامك دا أمشي وألا لا .... قلتلو ... لو جاي بالباب حبابك ألف .... وفي عز نشوتي واستمتاعي بالكلام الحلو دا يقوم الكمساري يطقطق لينا بصباعو ويقول : هوي انتو ما ناوين تدفعو لينا ولا شنو ( الله يقطعك يايابا ما شايفني انا في عالم تاني طبعا الكلام دا قلتو في نفسي ) .... مديت يدي اطلع القروش من شنطة اليد .... إلا الزوول حلف يمين انو يدفع وقال لي كيف أخلي زوجة المستقبل أم أولادي تدفع القروش .... المهم دفع القروش ونزلنا .... بعد ما نزلنا قال لي
انا حبيت أنقذك قدام الكمساري لاني حسيت انك ما معاكي قروش
قلتو كيفن ؟ انا ما بطلع من بيتنا إلا وشنطتي دي فيها اقل شئ تلتمية ألف ..... استفزاني لقيتو بيضحك
بزعل فتحتا الشنطة وطلعتا القروش الى فيها وقلتو انا ما بكضب عليك ..... مدا أيدو وشال القريشات وقعد يعد فيهن
مية ألف ..... ميتين ألف .... ميتين وتمانين ألف ..... وبسرعة البرق دخلم في جيبو وهااااااك يا فكيك قام جاري .....
الله يقصك يا يابا ..... ان شاء الله ما تنفعك ..... تدخل عليك بالساحق والماحق .... دي قروش امي عايزاني اجيب ليها توب جديد .... هسة أقولها شنو انا
الأحد 14 نوفمبر 2010, 8:04 am
