نداء الرجوع

الأخت الدكتوره أعدتينا الى زمان غير الزمان الى مكان غير المكان ...تذكرنا (الهيوب)تذكرنا (الألس).
أعدتينا الى الجمعه اليتيمه(أن ديلقى أرحميرو أن غايبى جميرو)الى (اليخنى)الى الدعوات التى تستقبلنا وتودعنا فى كل بيت.
أعدتينا الى أعيادنا التى لا تشبه أعياد الناس (جن انكرى حول انكرى انين طيبا امباب طيبا اودينقدى).
والله الذى لا اله غيره الآن كل أهلنا من مات منهم ومن بقى أراهم أمامى بطيبتهم وصدقهم ودعواتهم النابعه من القلب.
ياليتنا لو عشنا وفنينا فى أحضان هؤلاء ...ماكنا عرفنا هذه المراره وماكنا عشناها.
ولايسعنا الا أن نقول ياريت اللى جرى ماكان.
والحمدلله على كل حال.

خلاص جيتي راجعه انا ما قلتا خلاص رحلتو
الفلم الهندي دا ما تنزلو الترجمه بتاعتو

اها بدانا فى العنصرية ........................ ذى ماقال اخي محمود وين الترجمة يادكتورة ولا الشئ دة لرطانة بس ههههههههههههههه المهندس منير ساعدنا فى الترجمة ااااااااااااااااااا

يا شريف, ويا محمود . الزول النزل الفيلم دا زاتو (عايز واحد يترجم ليهو).

شكرا ليكم على الاراء الحلوة...ويا عم الامين حمدلله طلعت برااءة بشهادة استاذ ماهر ..انا بفهم بدرجة 90 فى المية وبتكلم بدرجة 40 فى المية ..وبفهم محسى وسكوتاوى بنسبة 20 فى المية او اقل ..يعنى ما معاكم يا شريف ومنير ..اما حوته ابن عمى فهو رغم حداثة سنو وتربيتة بالمملكة العربية لكن يعرف رطانة احسن من اترابه بس عامل فيها دناقلة لندن.
حقيقة القصيدة رصية وقوية وجميلة وربنا يرد غربتنا جميعا لننعم بالوطن الام
دمتم بخير

الدكتوره /نضار
حاجه جميله جدا والتحيه عبرك لشاعرها الجميل وذكريات الذمن الجميل الذى بدا يتلاشى بمجريات الاحداث والظروف المعيشيه القاسيه فى هذا الذمان
مع خالص التحايا لكم ولكل المغتربين

مازلنا فى انتظار الترجمة ................... الظاهر شهادة الاستاذا ماهر مزورة و كلام العم الامين الياس فى محله حتي الدكتورة تسبت العكس .


و محمود الظاهر عليه قاعد يلعب علينا ... ما بنسجلك فى المعارضة ههههههههههههه

الأخت الدكتوره طالما قلتى محمود بعرف أكتر من غيرو ...يبقى مشكوك فى ال90%بتاعتك دى.
وماهر ذاتو طالما أداكى 90%مره واحده يبقى حقيقه دناقلة لندن .
انشاء الله نزولا لى رغبة الأخ شريف حأبدا الترجمه وأخونا الأمين يحكم على ذلك.

شريف وعم الامين وقرشى ..فى داعى للعصرة دى؟؟هههههه
رغم قضائى عمرى كله فى القرية وتربيتى فى اسرة رطانة لكن غلبتنى اللغه دى ليه ما عارفه..يمكن بحكم التصاقى الوثيق بابى وابى غلبت العربية على الرطانه لتدريسه اللغه العربية ..ربما يكون سبب..بس برضو مصرة على النسبة (وش ماادى لسانو)
ويا قرشى منتظره معاهم الترجمة بس هاك منى:يعنى كفاية الغربه المشئومه المرض عشعش جو بطنك تعال ازرع زراعتك ..تعال الحق البيحصلك بكرة (اى اعمل شئ يسندك بكرة)
اها لقيتنى كيف اترجم ولا تواصل

ووووو قرشي: سوتي:
(نضار تنين سربقي تن تبلو شقدآقي, منير كون تنيقي تنتبلو اسكرداقي, ترجمقي ارنجي داقرا).
شريف: ماااااا ..كتُو تيقسكو.

كلامك سلييييييييييييييييم يا الأمين
حد فاهم حاجة ولا أنا براى

اها ماقلتوا نوبة ما تنبز ياعمنا الياس فهمنا كدة ههههههههههههههههههه

الى نضار(التى تضع أصبعها على خدها)ومنير(الذى يضع يده على خده)(انتظارا للترجمه).
وشريف(الذى أضناه التعب)هذا ماقاله الأخ الأمين فى حق كل واحد منكم.
وأنا حأقول ليكم(Arti irgi dabirson).

أما الترجمه(يكفى غربة الشؤم هذه التى لم تستفد منها الا المرض...رجاءا العوده للمسهامه فى الزراعه والتعمير لضمان مستقبلك.
بعد سفرك أصبحت الأرض بورا ونبات العشر انتشر شرقا وغربا...تعال لرؤيتنا أم أنك نسيتنا...أم أن الكجور حبسك عنا.
أم أن غيبتك التى طالت تجعلك لا تتأقلم مع واقعنا الصاخب ...صنارتك وأدوات صيد السمك تنتظرك على سطح المنزل.
وطوريتك أسفل السويبه(القسيبه).....ومناجلك جاهزه لحش القش بعد أن تراجع النهر الى مجراه.
ونحن أقعدنا التعب والشقى وليس هناك من هو مجبور على رعايتنا غيرك).
ونواصل.


هذه ترجمه للنص أما الروح والأحساس فلا يمكن ترجمته ...فقط اجتهدوا فى تعلم هذه اللغه والتى هى مشاعر واحساس .
قبل أن تكون لغة مخاطبه.

يالله عليك ياقريبي تسلم و يسلموا كل الاخوة بهذا البوست حقيقي اول مرة الواحد سيسمع اغنية و يفهم معانيها طبعاً بالرطانة و كان اصراري على الترجمة من شقين الاول لفهم المقصود بالاغنية اكيد و الثاني تفعيل رغبة الاخ منير فى بوست بالعام يناشد المساعدة بتعلم كلمات من الرطانة و كل تقبل تقدير و احترامي و تحياتي للاسرة ................

معقوله بس يا قرشى تختنى مع الحناكيش ديل والله ما رضيتها لى نفسى
الرطانة بتجرى فى دمنا ..وبى مناسبة الدقسه دى ..انا ونفيسه قعدنا نتذكر اسم الشئ البيقفلو فيهو الدجاج بالليل (قبل الاقفاص طبعا) وتجى الصبرة وتابيدهم على اخرهم ..ماعرفنا لما امى وهناء وصلوا قمنا سالنا هناء لقيناها اضل سبيلا ..لما لجانا لامى ..رفضت وقالت لينا اتعبوا واجتهدوا ..كيف تضيعوا الرطانه ..المهم بعد تحنيس قالت لينا ..البحفظو فيهو القمح والعيش عموما اسمها(..............) والبقفلوا فيهو الدجاج اسمها(........) والاجابات حاخليها لمنير وشريف .اجتهدوا وتبقى حصة بالمجان هههههههه

شكراً د.نضار و عن السؤال البحفظو فيهو القمح والعيش عموما اسمها(..............) القسيبة هذا سؤال الحمد الله عارفة أما السؤال الثاني هو من نصيب منير ههههههههههه

الأخ شريف تحياتى ....السؤال مكشوف عموما مقبوله منك.

تحياتي ياقريبي : ماتشكك في الآجابة يقوم يبدل بسؤال اصعب حقيقة موضوع القسيبة عندي معه قصة ظريفة مع حبوبتي سكينة على رحمها الله فى ثاني زيارة لى لدنقلة عام 84 او 85 على ما اعتقد و كنت اذهب مع ابن عمتي سعيد حمد نبيع البرسيم فى السوق و فى الصباح قالت لى حبوبتى سكينة ياولد شيل المنجل من جنب القوسيبة معاك ... و طبعاً ان فتشت القسيبة فى البيت الكبير كلة و لم اجد القوسيبة ههههههههههه اخوك اصلاً ما عارف القسيبة دى شنوا ... المهم لقيت لى منجل شلته و نزلت تحت و بعدين جاءت الحبوبة و قالت لى ياولد وينو المنجل قلت ليها هناك - قالت لا منجلى و قعدت ترطن ترطن والجماعة قاعدين يضحكو و انا بضحك الناس قعدت اضحك علي نفسي و سعيد قال لى قلبك ميت هي قاعدة تقطع فيك و قالت انا ما عندي راس اتكلم معاك وووو زعلت و قلت ليها و الله انا فتشت البيت كلة مالقيت القسيبة انت و يت ختيتيها ما متذكرة و قاعدة تنبزي فيا و ماكان الا الضحك زاد و كانت حديث مراغة ذاك اليوم و من هذا اليوم هي فى الذاكرة ..... اخوك قايل القسيبة قفة ولا كيس .... هههههههههه الله يعين ... من عرف لغه قوماً امنا شرهم

سلامات شريف قلنا ليك حنكوش ما صدقتنا ههههههههه
عم الامين صعبتها لكن ..يخربنى نص الكلام ما عرفتو..
قرشى حصلنا بالترجمة
انديرقى ارحميرى انآنجلى جميرى

و الله مابقدر ارد عليك فى هذا البوست لانك الاقوي والمشكلة مافى فرصة لتعلم الان عندي مشكلة اتقان الايطالية حالياً و انت طلعتي لي بالرطانة ههههههههههه ...

الله يهديكي يا وصفية: كيف تضعي د. نضار مع الإخوة الرطانين؟ هذه مصنفة ضمن الحناكيش.. وبالمناسبة هناك مجموعة لا بأس بها من الحناكيش, ووجدت عندهم الرغبة الأكيدة في تعلم اللغة "النوبية - الرطانة". الحاجة تقتضي فتح معهد (لغير الناطقين بها) وحيكون "ماهر عابدين" من ضمن الطلاب.
علما بأن المعهد سوف يستخدم سياسة "الضرب ينفعكم ..." يشيلو شيلتم النادوا بسياسة اتباع الضرب في المدارس.

غايتو لقيتم فيا فرصة الله يعيني عليكم مالقينا واحد واقف معانا حتي الاستاذة وصفية ضد ما يسمي الحناكيش و المهندس منير زاغ من البوست مع ناس محمود و لكن اناقاعد ليكم ..........ههههههههههههه

الأخت نضار اترجمه هى (أرحم موتانا وأجمع أحياءنا).

سلامات قرشى ..انا ماقصدت جملتى دى انا قصدت كلام عم الامين لانى ماقدرت افهمو..لكن كلامى دا كان دعاء بسب الرطانة يعنى بتفسح على ناس شريف ديل

و الله ياقريبي قرشي الله يديك قدر نيتك ناس الدكتورة ديل الظاهر عليهم ذي ماقال العم الياس رطانة لندن مع الاعتذار لناس لندن و المثل قال المعاعندو ضهر بيقول اه يابطني وانت ظهري ياقريبي ...

شريف اها اعترفت بالحنكشة ام لسه وصفية جابته ليك فى رقبتك
والقرصنة مااااا بتفيدك يا صديق

تحياتي د. تعرفي انا مشكلتي الحقيقية شنوا !!!

أنو أنا براي هنا ما لأقي لي رطاني واحد ... كان بقيت ليهوا فى رقبتة على شان أنت و وصفية ما تلقوا فرصة ذي دي ولكن الله غالب ...