شبكة مراغه الأصاله والتاريخ
حنة العروس Welcom11
شبكة مراغه الأصاله والتاريخ
حنة العروس Welcom11
شبكة مراغه الأصاله والتاريخ
هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.



 
الرئيسيةالموقع الرئيسى للشبكةصفحتنا على الفيس بوكالصفحه الرئيسيهالصحف السودانيهالمصحف الشريفالتسجيلدخول

إدارة شبكة ومنتديات مراغه : ترحب بكل أعضائها الجدد وتتمنى لهم أسعد الأوقات بيننا شرفتونا بإنضمامكم لنا ونتمنى مشاهدة نشاطكم ومساهماتكم التي سوف تكون محل تقديرنا واهتمامنا أهلا وسهلا وحبابكم عشرة بين اخوانكم وأخواتكم

شبكة مراغه الأصاله والتاريخ نحو سعيها للتواصل مع أعضائها الكرام فى كل مكان وزمان تقدم لكم تطبيق شبكة مراغه للهواتف الذكيه فقط قم بالضغط على الرابط وسيتم تنزيل التطبيق على جهازك وبعد ذلك قم بتثبيته لتكون فى تواصل مستمر ومباشر مع إخوانك وأخواتك على شبكتنا.

 

 حنة العروس

اذهب الى الأسفل 
+11
شهاب سعيد
هناءعبد الكريم
قرشى شيخ ادريس
ابو الديب
هيثم شهلي
الجعلي
مشيرة
ماهر عابدين دياب
صفاء العمدة
مجدى حسن
قدورة الاصلي
15 مشترك
انتقل الى الصفحة : 1, 2  الصفحة التالية
كاتب الموضوعرسالة
قدورة الاصلي
 
 
قدورة الاصلي


عدد المساهمات : 200
تاريخ التسجيل : 10/02/2010

حنة العروس Empty
مُساهمةموضوع: حنة العروس   حنة العروس I_icon_minitimeالخميس 21 أكتوبر 2010, 8:25 am


الاخوة بالمنتدي \ السلام عليكم ورحمة الله

سعدنا كثيرا بهمه الاخ الجعلي والمشاريع القوية ومنها مشروع الزواج الجماعي لشباب مراغة ........ يعني خلاص تقول المشكلة كلها انحصرت في يوم العرس ........ مع انه الجوطة كلها قبل العرس ....... يعني يوم العرس دا بقي اسهل يوم الناس تتغدي بعد صلاة الجمعة والموضوع انتهي....... لكين يا اخوانا نحنا بقينا ذي ناس الديم (البوش) الحفلات مدورة من قبل اسبوع .......... ايوة من حق الناس تفرح لكن في حدود ....... يعني حنة العروس البقت موضة اليومين ديل انا شايفة زيادة اعباء فوق تكاليف العرس الكتيرة...... العروس الامورة تتحكر وتتمنجة وبعد ما تخلص كل الكريمات الفي السوق ........ ومعاها برضو الوزيرات وكدة ....... وبعد ما الجماعة يجيبو الفنانين (يعني بقولو فنانين) طبعا ما البمبي لانو دي عروس ............ تجي ومعاها الشلة تتقدل وهاك يا رقيص وجبجبة........ والغريبة الحفلة ليست حكرا علي البنات فقط وانما اشباه البنات وكل من هب ودب ........ المهم .... الناس هنا قبل كده قرو فاتحة انو ياخونا تاني مافي حنة عروس ..... ولكن الكلام شكلو ضربوهو عرض الحائط .... والحفلات لسه مدورة ........زمان البت كان يوم العرس تكون خجلانة ولا بتتكلم لكن اليومين ديل العروس ترقص العريس لو عامل فيها مختشي ...... وبعدينك يا خوانا بقت في مشكلة زيادة تاني يوم الضبيحة بالليل الناس كلها بتتلمه وتجي تجامل ما بقصرو لكين الصواني البتطلع في العشا تكفي يوم العرس عدييييييل......
هسه تجي مشيرة تقول ليك مالك ومال حنة العروس الدخللك شنو ........ يعني انتي لو بتقدري ما في ناس تاني ما بتقدر ولا شنو........يعني يا محمود خليك اقتصادي.......... انتة عارف يا قرشي شوال السكر بقي ب180ج ........ يامجدي كلم الجعلي يسجلني مع ناس الجماعي وفي ورقة العقد يخلو اسم العروس فاضي لحدي ما نشوف لينا حل للصلعة دي ............ ودمتم.......
الرجوع الى أعلى الصفحة اذهب الى الأسفل
مجدى حسن
 
 
مجدى حسن


الموقع : الدوحة - قطر
عدد المساهمات : 752
تاريخ التسجيل : 10/01/2010
العمر : 43

حنة العروس Empty
مُساهمةموضوع: رد: حنة العروس   حنة العروس I_icon_minitimeالخميس 21 أكتوبر 2010, 9:00 am

قدورة الاصلى انت والنور ادريس قبل يشاوروكم كملو بيكم العدد 20 بدل 18
حكاية يقرو فاتحة وقرارات وشروط حتى ولو جات من مجلس الامن لن تطبق صدقنى .... لكن الحكاية لو جات من قطاع المراة
فتاكد نجاح المشروع .... يعنى كلو وحدة تقنع صاحبتا وجارتا وقريبتا .... يعنى نشيل المبادرة دى برمتها والنساء يتبنوها ويقتنعو هم اولا ..... لانو كلو الزيطة الشايفا دى من فطور عريس .... دفار عريس يقو يزينو ... رقيص عروس .... حنة عروس .... كوفير صاحبات العروس ..... النادى .... سيرة النادى ..... جيرتق العروس .... وداع العروس وماخفى اعظم وحاجات تانى تهرى الفشفاش ..... كل دة من تحت راس و تفكير نون النسوة العميق فى الموضوع دة .... عشان كدة هم لو ما اقتنعو فعلى المشروع السلام لانو هم بياخدوها من باب البوبار والفشخرة وشوفونا يا.. ..... وحقو نوفر زمنا وتلفوناتنا لحاجة اخرى ....

وياما فى ناس كتار اشترطو الى خطابم ان تكون المراسم دى خطوات تسبق ليلة الزفاف الكبر والضجة

عشان كدة كل التحركات الجاية فى انو جمعيات وممثلات قاع المراة فى الخرطومخ ومراغة هم يلمو كل تفاصيل الموضوع والحل يكون جماعى ..... شايف حتى فى ناس كبار ايدو الحل دة بشدة الايام الماضية .....

قدورة الاصلى: حاجة خاصة الحمد لله عرسنا تم بدون الخزعبلات أعلاة .... عقد وغدا وكل زول ركب شارعو
الرجوع الى أعلى الصفحة اذهب الى الأسفل
صفاء العمدة
 
 
avatar


عدد المساهمات : 163
تاريخ التسجيل : 08/02/2010

حنة العروس Empty
مُساهمةموضوع: رد: حنة العروس   حنة العروس I_icon_minitimeالخميس 21 أكتوبر 2010, 9:31 am

هههههههههههههههههههه لا لا مشيرة اكبر من كدا وحنة العروس دي حاجة بين الطرفين اذا اتفقو ما يعملوها ما حيعملوها يعني ما شئ اساسي يعمل غلبة ش
الرجوع الى أعلى الصفحة اذهب الى الأسفل
ماهر عابدين دياب
 
 
ماهر عابدين دياب


الموقع : لندن
عدد المساهمات : 2905
تاريخ التسجيل : 02/05/2010

حنة العروس Empty
مُساهمةموضوع: رد: حنة العروس   حنة العروس I_icon_minitimeالخميس 21 أكتوبر 2010, 12:38 pm

n]]الاخ قدورة من الان ظهرت اعتراضات نون النسوة ... اذكر في يوم من الايام ايام ان كان كل الرجال رجال ومعظم النساء عاقلات...انشأنا لجان وقرارات مشت علي الكل بعد تنوير شديد للكل...لم اتابع بعد الرحيل كيف نقضت العهود.
المشكلة ياقدورة الزمن ده اختفي الرجال البقطعوا رقبة الكديسة...
الحل الامثل للمغتربين ان يعمل عرس بالمراسلة ويستلم الطرود من المطار ويادار مادخلك شر. واذا كان راجل كامل مالى هدومه - وهو نتدر في هذا الزمان - ينزل البلد ويفرح مع الاهل.
لكن مع ذالك ياقدورة انشاء الله نعيش ونشوف رجالتك
وقول يالطيف[/b]
الرجوع الى أعلى الصفحة اذهب الى الأسفل
مشيرة
 
 
مشيرة


الموقع : امدرمان
عدد المساهمات : 1276
تاريخ التسجيل : 27/01/2010
العمر : 34

حنة العروس Empty
مُساهمةموضوع: رد: حنة العروس   حنة العروس I_icon_minitimeالخميس 21 أكتوبر 2010, 3:34 pm

قدورة كيف انتا مالك ومال حنة العروس انتا الخير والبركة ههههههههههههههه

وتانيا زي صفاء ماقالت دا شئ بتفقو فيهو هم الاتنين يعني انتا برة

والحياة تفاهم قبل كل شئ
الرجوع الى أعلى الصفحة اذهب الى الأسفل
الجعلي
 
 
الجعلي


عدد المساهمات : 299
تاريخ التسجيل : 28/02/2010

حنة العروس Empty
مُساهمةموضوع: رد: حنة العروس   حنة العروس I_icon_minitimeالجمعة 22 أكتوبر 2010, 7:19 pm

الاخ العزيز قدوه الاصلى
[u][b] طبعا ياقدوره اصعب حاجه تقنع مجتمع النساء بحاجه حسع فى قله من الحريم مطلعين ان الرجال عاوزين يرخصوا العرس عشان يدبلوا تقولى حنه العروس طبعا لدينا تحركات مسائيه شخصى ومع الدينمو صاحب الافكار اخى مجدى حسن لعدد من جمعيات نساء مراغه بالخرطوم لتنويرهم حول تبسيط الزواج
اخى قدوره نامل الانضمام الى المجموعه التى تقوم فى الحى بتنوير النساء لتبسسط اعباء الزواج
الاخ الاكبر استاذنا ماهر نامل عوده جماعتك المالين هدومن لقد اضحتكنى كثيرا حياك الله يارجل يافارس
الرجوع الى أعلى الصفحة اذهب الى الأسفل
ماهر عابدين دياب
 
 
ماهر عابدين دياب


الموقع : لندن
عدد المساهمات : 2905
تاريخ التسجيل : 02/05/2010

حنة العروس Empty
مُساهمةموضوع: رد: حنة العروس   حنة العروس I_icon_minitimeالجمعة 22 أكتوبر 2010, 8:25 pm



الاخ الجعلي... مدة طويلة ولم التقيك... لكن متابع نشاطاتك

وفقكم الله

لكن اذا الامور عاكست نحن جاهزين

تلفونات لقدامي المحاربين ونخلي كل واحد في علبه...

وعندك اقرب محارب اخونا قرشي.... شن قولك فيهو؟

ياراجل قول يالطيف
الرجوع الى أعلى الصفحة اذهب الى الأسفل
قدورة الاصلي
 
 
قدورة الاصلي


عدد المساهمات : 200
تاريخ التسجيل : 10/02/2010

حنة العروس Empty
مُساهمةموضوع: رد: حنة العروس   حنة العروس I_icon_minitimeالسبت 23 أكتوبر 2010, 7:22 am


الاخوة بالمنتدي \ السلام عليكم
\

الاخ ماهر زمان كان الراجل لمن يكون ماشي مع مرتو في الشارع يكون ماشي قدام علي بعد خمسة امتار ........ ويكورك ياولية ما تمشي الله يحرقك ......... هسه كدي واحد يحاول ينهر ساكت ......... طبعا هسه حتقولو حقوق الزوجية وبالمعروف والزمن اتغير وما بعرف شنو .......... نحنا قايتو لمن نكبر شوية ونبقي للعرس........... الشيلة حتمشي عن طريق الايميل ...... وقولة خير عن طريق الشات........ والحفلة اذا وجدت احتمال تكون في المنتدي........ وبعدينك يامشيرة وصفاء اتفاقية بين الطرفين دي شنو نيفاشا ولا شنو ........ يا مجدي والجعلي احمدو الله بس انا ما حضرت عرسكم ........ لكين حاسي انو ضبحو ليكم الكديسة ........ يا سموءل ايمن ساكت عامل فيها صغير الزول ده بس قصير ساكت...... محمود ياخوي لو ما حصلت نفسك سريع ولا بعدين حأرسل ليك شفعي احتمال اكون ما فاضي........
الرجوع الى أعلى الصفحة اذهب الى الأسفل
مشيرة
 
 
مشيرة


الموقع : امدرمان
عدد المساهمات : 1276
تاريخ التسجيل : 27/01/2010
العمر : 34

حنة العروس Empty
مُساهمةموضوع: رد: حنة العروس   حنة العروس I_icon_minitimeالسبت 23 أكتوبر 2010, 8:20 am

يعني الليلة انتا ياقدورة دايرة تعرس وقعدة مع عروستك كدا وقلتا ليها انا الحنة ما بقدر عليها والعرس كلو على

ممكن تقول ليك جدا ماعندك مشكلة
وممكن تقول انا بعمل الحنة على ولا يهمك عيشنا في دقيقنا ولا دقيقنا في عيشنا ماعارفة
وممكن تقول ليك عرس شنو وانتا ماداير تعمل لي حنة هوووي يا قدورة من هسي داير تنط وحنة ماف كمان هههههههههههههههههه

يعني على حسب العروسة التختارة والظاهر حتقع ليك الاخيرة دي انتا هههههههههه
الرجوع الى أعلى الصفحة اذهب الى الأسفل
صفاء العمدة
 
 
avatar


عدد المساهمات : 163
تاريخ التسجيل : 08/02/2010

حنة العروس Empty
مُساهمةموضوع: رد: حنة العروس   حنة العروس I_icon_minitimeالسبت 23 أكتوبر 2010, 9:12 am

اخذ الامور بي بساطة ياقدورة الامور بتمشي
الرجوع الى أعلى الصفحة اذهب الى الأسفل
مجدى حسن
 
 
مجدى حسن


الموقع : الدوحة - قطر
عدد المساهمات : 752
تاريخ التسجيل : 10/01/2010
العمر : 43

حنة العروس Empty
مُساهمةموضوع: رد: حنة العروس   حنة العروس I_icon_minitimeالسبت 23 أكتوبر 2010, 10:48 am


الاخوة الكرام .... الامور ببساطة دة البنادو بيهو المجموعة الحركت الساكن دة ..... ودا لب الموضوع ببساطة وماف داعى لوجع الراس والصرف البزخى فى غير محلو حتى لو متفين الطرفين واسرهم كمان ..... يعنى لو اتفقو على الفارغة نقول نحن نسكت ..... طب لى نسك على انهم متفقين مع حاجة غلط والشرع ينادى باقلهن مهرا اكثرهن بركة ..... الموضوع اكبر من كدة ياجماعة ....
الرجوع الى أعلى الصفحة اذهب الى الأسفل
هيثم شهلي
 
 
هيثم شهلي


عدد المساهمات : 599
تاريخ التسجيل : 27/01/2010
العمر : 49

حنة العروس Empty
مُساهمةموضوع: عقبال ليك يا دكتور   حنة العروس I_icon_minitimeالأحد 24 أكتوبر 2010, 11:14 am


العزيز قدورة شكرا ليك وانت تثير الموضوع المهم دا
ويمكن لاك صاحب وجعة بهمك اكتر
وربنا يوفقك ويسهل ليك وتوريهم رجالتك وتعرس البتستاهلك...

زي ما بقولوا : الحرب أكبر من أن يترك أمرها للجيش فقط .. وكمان تسيير حركة المرور وضبطها اكبر من ان يترك لعساكر المرور وحدهم .. فإن ترتيبات العرس اكبر من تترك للنساء وحدهن ، بل وفي رأيي أنهن جديرات بالتنفيذ فقط على ان تتم كل الترتيبات اللازمة بين الرجال فقط حسب اتفاقهم وفهمهم لما يصلح
بتجارب عديدة فان انجح المناسبات للزواج تتم عندما يقرر تفاصيلها الرجال دون نسائهم.
مع ضرورة الاتفاق المسبق بين الزوجين فقط على تصور مقبول على الكيفية ،لانو لما تكون الخطيبة مع خطيبها فقط لوصع تصور فان الاتفاق سهل للغاية ومن ثم تحول أوراق الاتفاق لرجال الطرفين لوضع الترتيبات المناسبة لهم وتقوم النساء بالتنفيذ فقط.
والله الموفق.
الرجوع الى أعلى الصفحة اذهب الى الأسفل
ماهر عابدين دياب
 
 
ماهر عابدين دياب


الموقع : لندن
عدد المساهمات : 2905
تاريخ التسجيل : 02/05/2010

حنة العروس Empty
مُساهمةموضوع: رد: حنة العروس   حنة العروس I_icon_minitimeالأحد 24 أكتوبر 2010, 7:35 pm


الحمد لله ما انا لوحدي دقة قديمة وتفكير رجعي...
هيثم اخوي برضه من بحري الجدول
وهو شكله عايز يقول (شاوروهن وخالفوهن)
يديك العافية ياهيثم
وقولوا يالطيف
الرجوع الى أعلى الصفحة اذهب الى الأسفل
مجدى حسن
 
 
مجدى حسن


الموقع : الدوحة - قطر
عدد المساهمات : 752
تاريخ التسجيل : 10/01/2010
العمر : 43

حنة العروس Empty
مُساهمةموضوع: رد: حنة العروس   حنة العروس I_icon_minitimeالإثنين 25 أكتوبر 2010, 10:42 am

الاخوة الاعزاء ....... طبعا من السهولة بمكان انو الطرفين (العريس والعروس المتوقعين) انو يتفقو على اى شى حتى ولو تبسيط القصة كلها لابسط مايمكن على وزن تعال بالشايلو وتعال تعال بالكارو وتعال .... الى اخر المقطع .......

لكن المصيبة والمشكلة فى نون الكبيرة (الراقدة فى راكوبتها) تعرقل فى شى ولو بقت من النوع المعصلج ممكن تنسف الزيجة المتوقعة .... عشان كدة راينا انو نون الكبيرة دى تكون جزء من الحل .... واذا حتشاورم وتخليهم فمافى داعى تضيع زمنك فى الشورا ...........
الرجوع الى أعلى الصفحة اذهب الى الأسفل
قدورة الاصلي
 
 
قدورة الاصلي


عدد المساهمات : 200
تاريخ التسجيل : 10/02/2010

حنة العروس Empty
مُساهمةموضوع: رد: حنة العروس   حنة العروس I_icon_minitimeالثلاثاء 26 أكتوبر 2010, 6:43 am

يا مجدي زمان لمن كان الزمن جميل كانت هناك فرقة مسرحية رائعة في مراغة.......... بقيادة الاخ والاستاز نصار وعمرين ونزار خليل . وبقية العقد الفريد ......... وكانت بارعة في اداء المنولوج ........ ومن ابداعتهم ...ووووووووب نسيبتي يا شقاوتي ومصيبتي......
هل تقصد ذلك ........ وبعدين ياخوانا هي من هسي دايرة ومادايرة بعدين كيف ........عليكم الله يا بت حواء اتكسرو اقعدوا في واطة واحدة يعملو العرس بالفاتحة وخلاص . هو انتو لاقين .............
الرجوع الى أعلى الصفحة اذهب الى الأسفل
ماهر عابدين دياب
 
 
ماهر عابدين دياب


الموقع : لندن
عدد المساهمات : 2905
تاريخ التسجيل : 02/05/2010

حنة العروس Empty
مُساهمةموضوع: رد: حنة العروس   حنة العروس I_icon_minitimeالثلاثاء 26 أكتوبر 2010, 8:06 pm



وانت لاقي؟
الرجوع الى أعلى الصفحة اذهب الى الأسفل
مشيرة
 
 
مشيرة


الموقع : امدرمان
عدد المساهمات : 1276
تاريخ التسجيل : 27/01/2010
العمر : 34

حنة العروس Empty
مُساهمةموضوع: رد: حنة العروس   حنة العروس I_icon_minitimeالثلاثاء 26 أكتوبر 2010, 8:59 pm

تستاهل كل خير ياقدورة لكن بي طريقتك دي ............الله اعلم

وقول يالطيف
الرجوع الى أعلى الصفحة اذهب الى الأسفل
ابو الديب
 
 
avatar


عدد المساهمات : 43
تاريخ التسجيل : 15/01/2010

حنة العروس Empty
مُساهمةموضوع: رد: حنة العروس   حنة العروس I_icon_minitimeالأحد 31 أكتوبر 2010, 8:33 am

ياقدورة خلي العروسة تدفع الحساب وتعمل الحنة العاوزاها
والمشكلة انك من الرجال الذين لايحبون الكلام المايع
الرجوع الى أعلى الصفحة اذهب الى الأسفل
مشيرة
 
 
مشيرة


الموقع : امدرمان
عدد المساهمات : 1276
تاريخ التسجيل : 27/01/2010
العمر : 34

حنة العروس Empty
مُساهمةموضوع: رد: حنة العروس   حنة العروس I_icon_minitimeالأحد 31 أكتوبر 2010, 10:51 am

ومين اصلا بكون فاضي للكلام المايع


ووموضوع الناس يقتنعو قامت جمعية قريب في الخرطوم للاهل وفتحنا الموضوع كان التجاوب كبير جدا

ورحبو بالفكرة وبعض الامهات زكرو اسماء ابناءهم اللي ممكن يخشو معاكم او بالاصح حابين انهم يبقو معاكم

ولكم الود
الرجوع الى أعلى الصفحة اذهب الى الأسفل
مجدى حسن
 
 
مجدى حسن


الموقع : الدوحة - قطر
عدد المساهمات : 752
تاريخ التسجيل : 10/01/2010
العمر : 43

حنة العروس Empty
مُساهمةموضوع: رد: حنة العروس   حنة العروس I_icon_minitimeالأحد 31 أكتوبر 2010, 11:46 am

الاخت مشيرة ..... بعد مافضيت من الرحلات وماخليتى سمك فى خزان جبل اولياء جايه تجدعى لينا باقى شوك سمك الخزان صح ؟؟؟؟؟؟ ههههههههه واحتمال يكون الاستاذ والاخ الاكبر دياب عبدين (ابوالديب ... وبالمناسبة ماهر دة قوم المنتدى وماقعدو فى حكاية الاسماء المستعارة ماشف ابوالديب دى ولا لانو بيعرفا ماخطرت لى فى بالو ؟؟؟)
ويمكن ابوالديب كتب كدة لانو انتى وقدورة مرة تهظرو ومرة تبقو جادين فى موضوع تبسيط فكرة الزواج حسب تعليقاتكم السابقة عشان كدة يكون جدع ليكم كلمة وفات هههههههههه

وبعدين يا ابوالديب ياخ القروش بتاعت الحنة دى حتى لو دفعتا العروسة ما اولا بيها حاجة فيها فايدة غير الحنة ....على العموم حنشوف راى حسين ؟؟؟؟؟؟؟؟



الرجوع الى أعلى الصفحة اذهب الى الأسفل
ماهر عابدين دياب
 
 
ماهر عابدين دياب


الموقع : لندن
عدد المساهمات : 2905
تاريخ التسجيل : 02/05/2010

حنة العروس Empty
مُساهمةموضوع: رد: حنة العروس   حنة العروس I_icon_minitimeالأحد 31 أكتوبر 2010, 7:58 pm


الصغيرة مشيرة
غايتو اعتبرتك انك ماعافه ابو الديب ده منو
مع انو هناك خمسة رسائل منشورة لابو الديب طاهنتود
والا الموضوع كان يحتاج سفرة خاصة واستعدادات لجيوش الطاهنجي لابادة واحتلال كل مناطق العمد...

الاخ مجدي حسين عنده راي حتي فى الحنة ذاتها

وقولوا يالطيف
الرجوع الى أعلى الصفحة اذهب الى الأسفل
قرشى شيخ ادريس
 
 
قرشى شيخ ادريس


الموقع : الولايات المتحده
عدد المساهمات : 974
تاريخ التسجيل : 28/03/2010

حنة العروس Empty
مُساهمةموضوع: رد: حنة العروس   حنة العروس I_icon_minitimeالإثنين 01 نوفمبر 2010, 6:37 am

الأخ العزيز قدوره...لأول مره نسمع بى حاجه أسمها حنة عروس.
حنة عريس معليش ...سيرة عريس ممكن...أما حنة عروس ويحضروها رجال (تعيش كتير تشوف كتير).
أخونا مجدى (أبو الديب...الجعلى...الفنجرى...كباشى)هذه ليست أسماء مستعاره هذه كنيه مثلها مثل الفاروق.
أما الأسماء المستعاره فهى (عسوله وما أدراك ما عسوله) وقع ليك الفرق.
الرجوع الى أعلى الصفحة اذهب الى الأسفل
هناءعبد الكريم
 
 
avatar


عدد المساهمات : 12
تاريخ التسجيل : 05/06/2010

حنة العروس Empty
مُساهمةموضوع: رد: حنة العروس   حنة العروس I_icon_minitimeالإثنين 01 نوفمبر 2010, 4:26 pm



سلامات الأخ قدورة

فعلا موضوع مهم ونشكرك على طرحو . اولا موضوع الحنة دا يكاد يكون انتهى فى مراغة بالذات فى بحرى الجدول والقرار الطلع انو حنة عروس بالحفلة مافى اتطبق والحمد لله وشوية شوية الحنة بتاعت البنات الخاصة قاعدة تنتهى
ثانيا فى حاجات اهم زى عشا العريس الفيهو تكلفة فوق ما تتصور ( دجاج ما غايب حمام ماغايب خرفان وحلويات و حاجات جديدة فى كل عرس تطلع ) وبعدين حكاية الشيلة الرجعت تانى عربات ولمة ناس وعصاير ولم كراسى من الحلة وعشا الضبيحة (و الشوقار) إن صحت العبارة والله دجاجى الربيتو كلو اتوزع لا لميت فيهو لا............

الله يعين الناس وحقو يطلع قرار يقروا ليهو فاتحة كبيييييييييييييييييييييييرة لمنع هذة العادات الدخيلة على مجتمعنا

الاستاذ ماهر لمن الله يريد انت معزوم فى الحنة بس ماتجينا بي سوطك ههههههههههههههه

ليكم الشكر
الرجوع الى أعلى الصفحة اذهب الى الأسفل
مشيرة
 
 
مشيرة


الموقع : امدرمان
عدد المساهمات : 1276
تاريخ التسجيل : 27/01/2010
العمر : 34

حنة العروس Empty
مُساهمةموضوع: رد: حنة العروس   حنة العروس I_icon_minitimeالإثنين 01 نوفمبر 2010, 9:35 pm

هلا بالجميع

وشكرا ماهر -ابو الديب- قدورة -قرشي - هناء-مجدي-ولكم الود

ايه رايكم طيب بدل زفاف لبس بلدي وجلابية بدل كرفتة
الرجوع الى أعلى الصفحة اذهب الى الأسفل
شهاب سعيد
 
 
شهاب سعيد


الموقع : المملكة العربية السعودية
عدد المساهمات : 755
تاريخ التسجيل : 08/01/2010

حنة العروس Empty
مُساهمةموضوع: رد: حنة العروس   حنة العروس I_icon_minitimeالثلاثاء 02 نوفمبر 2010, 1:52 pm

يا ناس كدي صلوا على الحبيب وقولو خير و الله انا حياتي ما سمعت حنة عروس فى مراغة وبعدين يا قدورة الكلام دا جبتوا من وين
حنة عروس شنو يا زول على الطلاق كان الغداء وينطفى النار وقول ليك حاجة احتمال غدا زاتوا ما يكون فى خبر في مسجد عمنا عبد الحي عثمان وخبر فى مسيد حاج نصر وخبر فى مسجد انصار السنة وخبر اضافي فى مسجد اقجة وتبقى مارق هههههههههههههههههههه
لكم جميعا محبتي محبكم شهاب الشريف


عدل سابقا من قبل شهاب سعيد في الأربعاء 03 نوفمبر 2010, 9:08 am عدل 1 مرات
الرجوع الى أعلى الصفحة اذهب الى الأسفل
نضارعبدالكريم العمده
 
 
avatar


عدد المساهمات : 1064
تاريخ التسجيل : 01/09/2010

حنة العروس Empty
مُساهمةموضوع: رد: حنة العروس   حنة العروس I_icon_minitimeالأربعاء 03 نوفمبر 2010, 8:41 am

المجتمع الذكورى !!
مبروك عليك الليلة يا نعومة
يا حليل ناس ديل الزمان بيجونا
يوم حننوك والحنة شالت ويوم سرحوكي الدمعه سالت

حنة العروس من طقوس الزواج السوداني حنة العروس ، حيث تجتمع في منزل العروس اهل العروس وصديقاتها ، وتتم تجهيز صينية الجرتق وبها الحنة والشموع بمختلف الالوان والعطور من صندلية ومحلبية ومجموع والبخور
وتكون العروس في كامل زينتها وتعم الفرحة
منزل العروس وترتفع زغاريد النساء معبره عن الفرحة والبهجة ، وسط البخور واغاني صديقات العروس
ماعيب حنة العروس وليه بتلغو اى مظاهر بهجه او فرح ...بيت العروس مافى وليمه ..بيت العروس مافى لمه....بيت العروس مافى حنه....بيت العروس مافى زغاريد....وليه ما تلغوا حنة العريس؟؟؟ اللى بيصاحبها قلع سوط وسكر ومشاكل وطعن وموت ومحرمات اكثر...ليه انتو مجتمع ذكورى عايزين تطمسوا هوية المراة فى اى شئ حتى ابسط مظاهر الفرح فى عرسها ..وبالمقارنه فان حنة العريس تكلف ويصحبها عشرات التورتات والمظاهر الدخيله والجديده ونفس البنات ونفس الاولاد ونفس الاهل هم هم فى حنة العريس والعروس.صراحة عندى كلام كتير فى اهمية الاحتفال للطرفين وكمان عندى راى ايجابى جدا فى رقيص العروس
كسره على فكره كل امهاتكم رقصن وعملن حفلة حنة (بوكار)!!
الرجوع الى أعلى الصفحة اذهب الى الأسفل
ماهر عابدين دياب
 
 
ماهر عابدين دياب


الموقع : لندن
عدد المساهمات : 2905
تاريخ التسجيل : 02/05/2010

حنة العروس Empty
مُساهمةموضوع: رد: حنة العروس   حنة العروس I_icon_minitimeالأربعاء 03 نوفمبر 2010, 10:31 am



اسئلة الدكتورة نضار موجهة الي قدورة
نحن في انتظار هذه الاستفسارات
نرجو سرعة الرد لكن بعد ماتقولوا يالطيف
الرجوع الى أعلى الصفحة اذهب الى الأسفل
ياسرابراهيم
 
 
ياسرابراهيم


عدد المساهمات : 466
تاريخ التسجيل : 24/01/2010

حنة العروس Empty
مُساهمةموضوع: رد: حنة العروس   حنة العروس I_icon_minitimeالأربعاء 03 نوفمبر 2010, 4:13 pm

جرت الكرسي في آخر الصيوان تنظر الي رفيقتها وهي بفستانها الاحمر
تتلألأ فيه زركشات من الوان شتي وقد ارسلت جدائلها تلعب في الهواء
وخضبت يديها ورجليها بالحناء
واخذت تسأل نفسها متي ياتي ذلك اليوم وتتوشح فيه بكل هذا الجمال .
لا تحرمهم عزيزي قدوره من استثمار تلك الايام في انتزاع اقصي درجات الفرح
في حدود المعقول من ناحيه التكاليف
فكل منهم جلست في نفس الكرسي تنتظر ذلك اليوم
بس حنه عروس فيها رجااااااااااااال دي حجه غريبه ومظهر مرفوض 0

اسمع العروس دي تقول شنو !!!

اجيك حفيانة
لافحة النيل
هدم دافي

اجيك معجونة في الحنة
ملانة رويحتي بالعافي
ممسحة بي عُجَن صندل
محجّلة بي دهب صافي

انمق قولي في شوفك
وأبدع ليك في القافي
أعاين ليك قدح مليان
غنا وتحنان
أتبن فيهو مغرافي

تحياتي






ا
الرجوع الى أعلى الصفحة اذهب الى الأسفل
نضارعبدالكريم العمده
 
 
avatar


عدد المساهمات : 1064
تاريخ التسجيل : 01/09/2010

حنة العروس Empty
مُساهمةموضوع: رد: حنة العروس   حنة العروس I_icon_minitimeالأربعاء 03 نوفمبر 2010, 7:01 pm

اللول ..انا اللول انا سووا ليها اللول ..العروس ست الهنا..زينة ليها اللول
دى العروس ست البنات..لابسه توبها ورايقه جات سواا ليها اللول
العروس بت السرور ...سوا ليها اللول ..هيبه عاد كشف الحضور ..يا بنات جيبو البخور

ياسر يا رجل تنحنى لك رقاب الملوك قبل المواليا..شكر شكرا لكلماتك المتفردات .. المليئه بالفهم والتفهم.
نعم للفرح والاحتفال ونعم للتبسيط وعدم تضخيم الامور العروس عندها صاحباتها من مناطق نائيه والعروس عندها امنيات واحلام وتصور لايام عرسها وحنتها ..وحتى الان لم يثبت ان هناك تجاوزات حدثت فى حنة عروس اهلنا اهل ريف وبساطه والبت ود عمها وود حلتها وود جيرانها زى اخوها لو جاء ادى الشبال وطلع فيها شنو ولا شئ نحن اكلنا فى صحن واحد وقريتنا سوا ورعينا سوا يجى يوم الحنة يعامل معاملة الغريب ؟؟؟؟؟؟؟ممكن اتخاذ اجراءات معينه لحفظ النظام

####كسره....
يا قدورة يعنى اخوانى ما يشاركونى فرحى؟؟
وانا زاتى ليه مسموح لى احضر حفل حنة نزير وارقص وازغرد...مالفرق؟؟؟؟

**********
الاخ العزيز ياسر واستاذنا ماهرليكم كمتذوقين للتراث وتعشقون الكلمه الجميله (يعنى ما دعوة للتدبيل ) ولكل العرسان بقريتى الحبيبه وعلى راسهم قدوره
اهدى صحن الباشرى عبر هذ الرابط

[ندعوك للتسجيل في المنتدى أو التعريف بنفسك لمعاينة هذا الرابط]
الرجوع الى أعلى الصفحة اذهب الى الأسفل
قدورة الاصلي
 
 
قدورة الاصلي


عدد المساهمات : 200
تاريخ التسجيل : 10/02/2010

حنة العروس Empty
مُساهمةموضوع: رد: حنة العروس   حنة العروس I_icon_minitimeالجمعة 05 نوفمبر 2010, 12:17 pm


يا اخوانا كدي قولو يا لطيف .... تخيلو البكيات زمان قبل ما يعملو الصواني من الجيران والتقسيم المعروف .... بالله كيف كان يكون الحال .الناس تجي تتونس وتضرب الفتة ويبقو مارقين .. يعني ميتة وخراب ديار .... قبل حنة العروس دي شوفو الواحد عليهو شنو .......... عشة صغيرة + شيلة ما عارف كم كم + كفاية+ ضبيحة قدر الليلة وبكرة+ كروت ومعازيم وناس جايين من الخرتوم+كم خروف كدة قبل العرس + كم حفلة +ايجار صيوان وكراسي + ووو.... وتاني تقولو حنة عروس ........ شاحد ربي كده تتحننو بالشطة............... وبعدين يا دكتورة يعني النزير دا يلقط الريالات الزمن دا كلو وينتهي منها في يوم واحد ............. وبعد ما نخلص من قصة العروس نجي نشوف العريس الحزين........ وبعدين رقيص العروس دا شنو ......
الرجوع الى أعلى الصفحة اذهب الى الأسفل
عبدالكريم سعيد
 
 
عبدالكريم سعيد


عدد المساهمات : 174
تاريخ التسجيل : 13/10/2010

حنة العروس Empty
مُساهمةموضوع: كيف يارجل   حنة العروس I_icon_minitimeالجمعة 05 نوفمبر 2010, 4:20 pm

مساءالخير يااخي قدورة انت عارف انو حنة العروس عادة قديمة
وانت عايز تقيرو بعد الاف السنين اخي احسن تقير رايك فى
حنة العروس وتتكلم فى موضوع ثاني
الرجوع الى أعلى الصفحة اذهب الى الأسفل
مشيرة
 
 
مشيرة


الموقع : امدرمان
عدد المساهمات : 1276
تاريخ التسجيل : 27/01/2010
العمر : 34

حنة العروس Empty
مُساهمةموضوع: رد: حنة العروس   حنة العروس I_icon_minitimeالجمعة 05 نوفمبر 2010, 6:34 pm

رقيص العروس : تعريف كامل لرقيص العروس وهو عبارة عن خرف مبكر ناتج من طفولة مكعوجة

ناتجة من تأثير خرطومي بحت لاوجود له في مراغة ياقدورة انا اشك انك ما قعد تحضر اعراس في مراغة حدك الخرطوم بس

اما حنة العروس دي ما فيها اي تكلفة للعريس

البعرفو عن حنة العروس هي عبارة عن مجموعة من صديقاتة وزميلاتة ولا وجود للاولاد ممكن الاخوان يسلمو ويفرحو بيها ويطلعو ويقدرو يحرسو الباب بعداك

وممكن تكون حفلة بي بت او دلوكة بينم ودي حاجات بسوهو اهل العروسة لي بتهم مادخل للعريس فيها انتا الصورة عندك مقلوبة ارجو تعديلها

وانزل واركب خط دنقلا مراغة خليك من الخرطوم بحري وام درمان

وتكاليف العرس بالجد بالجد كترت على العريس واهل العروس برضو

وبعد دا كلو يجو يتهابلو ويتزاعلو ويتخاصمو وان شاءالله يضربو ننساهم
الرجوع الى أعلى الصفحة اذهب الى الأسفل
قدورة الاصلي
 
 
قدورة الاصلي


عدد المساهمات : 200
تاريخ التسجيل : 10/02/2010

حنة العروس Empty
مُساهمةموضوع: رد: حنة العروس   حنة العروس I_icon_minitimeالأحد 07 نوفمبر 2010, 6:07 am


الاخ عبد الكريم (كرمة).... قلت حنة العروس كيف تغيرها موجودة منز اللاف السنين.....شوف ليك موضوع تاني..........

طيب يا اخوي ما كان نخلي حولية ساتي شريف مابرضو موجودة منز الالاف السنين ........ ونخلي الناس تحلف بسيدي الحسن والحسين وشيخ فلان وفلتكان ...... وعشان ترضي نخلي حنة العروس في الشارع وتجي تديك الشبال ...... ياخي منز الالاف السنين كانت توجد البساطة في كل شئ حتي في العيش فهل توجد اليوم ... هل تعلم انه توجد وزارة كامله طول وعرض تسمي وزارة الشئون الاجتماعية مهمتها محاربة العادات الضارة.. انا قدورة اعلن من هنا استطيع اعمل حفلة للعروس واخت العروس وام العروس وحبوبة العروس ولكني لا اتحدث عن نفسي فقط... كل الموضوع الذي نريده هو الاتفاق علي تبسيط الزواج ..... ان كان لايرضيك فالمنتدي ملان ببقية المواضيع ....... عموما عفوا لكل الذين تزوجو زواج الكرتونة ......وزواج الكرتونة هو ان تكون في الغربة وترسل الريالات ويرسلو لك العروس مقسطرة في كرتونة....................

الاخت نسمة وفاء والدكتورة نضال مداخلاتكم موزونة تنم عن فكر متقد ودفاع مستميت عن حقكم في الفرح .............
الرجوع الى أعلى الصفحة اذهب الى الأسفل
شهاب سعيد
 
 
شهاب سعيد


الموقع : المملكة العربية السعودية
عدد المساهمات : 755
تاريخ التسجيل : 08/01/2010

حنة العروس Empty
مُساهمةموضوع: رد: حنة العروس   حنة العروس I_icon_minitimeالأحد 07 نوفمبر 2010, 8:09 pm

الاخ / قدروة لك منا العتبى حتى ترى هذا بنفسك ووكل العتبى حتى ترضى وهو مجرد راي ولا حوله له ولا قوة
نعتزر لك نيابة عنه ولكن الكلام مقصود على العادات القديمة اذا لم يعجبك الكلام فى العادات القديمة فالنحتفظ به لانفسنا ونجعله زكري بالنسبة لنا واما بخوص زواج الكرتونة دي شوية كدا انت عارفها وما فى داعي له حتى وان كان غيره او اي عضوا من الاعضاء داخل الشبكة ولك العتبي ابن خالى / السيد / عبد القادر عابدين دياب . حرقتني والله لكن طبعا اخوكود الشريف بتاع ريالات وزواج الكرتونة دي قوية فى حقو ههههههههههه الله غالب يا ماهر وقول يالطيف
الرجوع الى أعلى الصفحة اذهب الى الأسفل
ماهر عابدين دياب
 
 
ماهر عابدين دياب


الموقع : لندن
عدد المساهمات : 2905
تاريخ التسجيل : 02/05/2010

حنة العروس Empty
مُساهمةموضوع: رد: حنة العروس   حنة العروس I_icon_minitimeالأحد 07 نوفمبر 2010, 10:07 pm


الاخت الدكتورة

حاولت ان اتناول من صحن الباشري بعد جوع شديد

لكن الرابط حال بيني وبين الوجبة الدسمة. لكن ساعاود الكرة بعد جوعة اخري

الاخ شهاب انا من ذكرت زواج الطرود مزاحا ...ولااحد غيري...

وعلي فكرة هي وسيلة جميلة ومعمول بها وهي عملية اكثر من غيرها في نظري

وانا شخصيا تزوجت بنفس الطريقة وقدورة خير العارفين ومازعلان من كلامه

ياجماعة قولوا يالطيف
الرجوع الى أعلى الصفحة اذهب الى الأسفل
مشيرة
 
 
مشيرة


الموقع : امدرمان
عدد المساهمات : 1276
تاريخ التسجيل : 27/01/2010
العمر : 34

حنة العروس Empty
مُساهمةموضوع: رد: حنة العروس   حنة العروس I_icon_minitimeالإثنين 08 نوفمبر 2010, 9:29 am

اهلين قدورة


وانا ما بتكلم عن حقي انا بتكلم عن حق اهلي في الفرح بي وانا لو ابوي قال نعمل ليك حنة والله لو ماعايزاها ما بقول لي لا

وربنا يديم البساطة والمودة اولا واخيرا بين الناس في الزواج وغير ذلك
الرجوع الى أعلى الصفحة اذهب الى الأسفل
مجدى حسن
 
 
مجدى حسن


الموقع : الدوحة - قطر
عدد المساهمات : 752
تاريخ التسجيل : 10/01/2010
العمر : 43

حنة العروس Empty
مُساهمةموضوع: رد: حنة العروس   حنة العروس I_icon_minitimeالإثنين 08 نوفمبر 2010, 11:59 am

الاخ ودالشريف وقدورة مشكورين والله لحظة قراتى للتعليق برضو حسيت انو قدورة مغيوظ فاتصلت به حتى اطمئن ونقلت ليهو غيظتى لتعليقو على كرمة ومن فوائد الاتصال دردرشنا مع اخونا عامر عبيدن ربنا يديهو الصحة والعافية ويديم التواصل وخلونا نقول دة استفزاز ايجابى .... والله اكتشفت انو قدورة الاصلى قاصد كل خير وبركة ولكم العتبى جميعا لو زول فهم غير المزاح ههههههههه ....

لكن الغايظنى بجد يانون نسوة المنتدى انو تقولو ماسمعتو ولا شفتو بى البزخ الفى حنة ورقيص العروس .... ياخ حصل وفى مراغة كمان واسالو واتاكدو وشوفو الصرف البزخى الحصل وضياع الوقت فى الفارغة ..... ودة كلو من صاحبات العروسة البعشعشو ليها الافكار السيئة دى ويحولو الفرحة لنكد ..... ويادكتورة نضار نحن لاقين وين نفرح ؟؟؟؟؟؟؟ لكن العلة فى الصرف الغير مفيد....
الرجوع الى أعلى الصفحة اذهب الى الأسفل
عادل الفاضل
 
 
عادل الفاضل


الموقع : maragaarea.com
عدد المساهمات : 310
تاريخ التسجيل : 03/02/2010
العمر : 51

حنة العروس Empty
مُساهمةموضوع: السلام عليكم و رحمة الله   حنة العروس I_icon_minitimeالإثنين 08 نوفمبر 2010, 12:38 pm

الأخ/ قدورة الأصلى
تحية طيبة
و كل عام و انت بالف خير
انت يا اخى طرحت موضوع هام جدا بخصوص الزواج و تكاليفه و نحن كسودانيين عاداتنا و تقاليدنا شبيهة جدا بتقاليد الدول الافريقية فقط و ليس العرب و التكلفة زيادة عن اللزوم و فوق كل ذلك الأختلاط لاننا غير محافظين بسنن الأسلام و اين نجد هذا الأختلاط غير فى السودان و تشاد و النيجر و نيجيريا و الكنغوا و الدول الافريقية الاخرى.
كم هائل من سنن الأسلام لم تطبق فى مناسباتنا لاننا نرى و نشاهد الفرق الشاسع فى عاداتنا و تقاليدنا فى المناسبات من عادات الأسلام و تقاليده و لكنى اقول المقولة التى قالها العقيد معمر القذافى( ان الشعوب لا تنسجم الا بفنونها و تراثها) و هذه عادات من قبل اجدادنا تقريبا و من هذا المنطلق ما أود قوله ان مناسباتنا فى الأعراس مكلفة نظرا لاننا نعتبر السودان دولة فقيرة فى أوساط الدول الخليجية او الدول العربية مثل ليبيا التى تمتلك كما هائلا من النفط و لكنا اذا نظرنا للمناسبات فى ليبيا مثلا هى بأقل التكاليف من السودان و اليك احكى مناسبة الزواج مثلا:
هو ثلاثة أيام فقط يوم الزفة هو اليوم الذى يقوم فيه العريس بذبح الذبائح و تقديم الوجبات للضيوف و من ضمنها طعام العشاء الذى يبداء من الساعة السادسة مساء و لمدة ساعتين فقط بعد الطعام يحضر العريس و يقف فى الكوشة دون حضور العروس و يقوم المتواجدون بتهنئته وبعدها يستلم عروسه و يذهب للفندق او عش الزوجية لا هناك حفل و لا يحزنون و بهذا انتهى العرس و لا يوجد اى اختلاط بين الرجال و النساء مهما كلف الأمر.
و فى يوم العزاء يقوم اهل الميت بتقديم شربة بالصلصة مع الخبز دون لحم و دون ملح لا يوجد اى ذبح فى المأتم و بعد ثلاثة ايام ترفع الخيم و يذهب الناس لحالهم.
اما نحن فى السودان تكاليف زيادة عن اللزوم و اشياء لا لازمة لها.
نسال الله ان يكون مقترحك يجد من يهتم به و يطبق و لك التحية اخى و كل عام و انتم بخير.
الرجوع الى أعلى الصفحة اذهب الى الأسفل
عبدالكريم سعيد
 
 
عبدالكريم سعيد


عدد المساهمات : 174
تاريخ التسجيل : 13/10/2010

حنة العروس Empty
مُساهمةموضوع: رد: حنة العروس   حنة العروس I_icon_minitimeالإثنين 08 نوفمبر 2010, 1:44 pm

الاخ قدوره
اولا ردى ليك كان مجرد راى وفى الاصل انت تطرح موضوع والناس بتقول رايها
ثانيا اذا حتقابل اراء الناس بالا ساءات مافى داعى لطرح المواضيع من المفضترض
صىدرك يكون رحب لكل الاراء
ثالثا حولية ساتى شريف كانت عادة جميلة لانها بتجمع الناس مع بعضها البعض وكانت
الناس بتتقاسم الكسرة مع مرور الزمن انتهت من غير محاربة
رابعا السيرة زمان ايضا كانت عادة لان الناس كانت قلوبه نظيفة كنت برقص مع بنت

الجيران والخال والعم بس بقلب نظيف
خامسا زواج الكرت كرتون ذى ماانت بتقول دا شرف لى حافتخر بيهو امام كل الناس
واخيرا ياسيد قدورة برضوا خلى صىدرك واسع وانا عارف انو المنتدى ملئ بالمواضيع
لكنها شيقة ومفيدة
الرجوع الى أعلى الصفحة اذهب الى الأسفل
قدورة الاصلي
 
 
قدورة الاصلي


عدد المساهمات : 200
تاريخ التسجيل : 10/02/2010

حنة العروس Empty
مُساهمةموضوع: رد: حنة العروس   حنة العروس I_icon_minitimeالثلاثاء 09 نوفمبر 2010, 6:22 am


الاخ \ عبد الكريم ...........

تأكد ان صدري اوسع من شبكة زين وسوداني واريبا كمان ................... لم اقصد ان اسئ لاحد ..... وان طالتك بعض الروايش فلك العتبي حتي ترضي ....... فقط اود مناقشة موضوع اراه هام من نظري ......... وبعدين زواج الكرتونة ليس اساءة فو الله العظيم انا افكر فية بجدية ........ والاخ ماهر تزوج زواج كرتونة يعني اكون اسأت ليه .. حاشا والله...... عموما انت ايضا اخي الاكبر اعتزر بشدة ولك العتبي.............
الاخ شهاب لازم تجي وتعرس هنا دا ونشيلك فوق كتفي دي.........

يا جودة والناس الا نرسل ليهم حنة العروس وهي كلها موجودة بالمناسبة عند شاكر ابراهيم..........




الرجوع الى أعلى الصفحة اذهب الى الأسفل
مشيرة
 
 
مشيرة


الموقع : امدرمان
عدد المساهمات : 1276
تاريخ التسجيل : 27/01/2010
العمر : 34

حنة العروس Empty
مُساهمةموضوع: رد: حنة العروس   حنة العروس I_icon_minitimeالثلاثاء 09 نوفمبر 2010, 12:09 pm

ياجماعة انا صراحة الحنة والرقيص البتكلم عنها مجدي دي ماسمعتا بيها ابدا ودا سبب كلامي السبق قلتو

والموضوع صراحة شل تفكير كتير من الناس حتى بعيد من المنتدى والكل عايز حلول وليس مجرد نقد وكلام
الرجوع الى أعلى الصفحة اذهب الى الأسفل
صفاء العمدة
 
 
avatar


عدد المساهمات : 163
تاريخ التسجيل : 08/02/2010

حنة العروس Empty
مُساهمةموضوع: رد: حنة العروس   حنة العروس I_icon_minitimeالأربعاء 10 نوفمبر 2010, 9:02 am

السلام عليكم جميعا
ان شاء الله دايما نفوسكم واسعة وطيبة والموضوع دا يشوفو لي حل اي زول عندو اقتراح او فكرة للموضوع يقولو وان شاء الله المواضيع بتتبسط
الرجوع الى أعلى الصفحة اذهب الى الأسفل
قدورة الاصلي
 
 
قدورة الاصلي


عدد المساهمات : 200
تاريخ التسجيل : 10/02/2010

حنة العروس Empty
مُساهمةموضوع: رد: حنة العروس   حنة العروس I_icon_minitimeالخميس 02 ديسمبر 2010, 8:23 pm


نعود الي حنة العروس الله لا عرسا ........... يعني بعد العيد دا كمية من حنات العروسات .................


يعني نخلي العرس ولاشنو ........... غايتو يا انا يا حنتا بت اللزينا ........... طبعا حتقولو حنة بت اللزينا......... لكن والله بعدين الا يحنسوني........شدييييييييد كدة وبعدين ارفض .........حتقولو بعدين متين .................سألتوني .........طيب بعد نخلص من قصة انفصال الجنوب دي نشوف الحاصل شنو ............ احتمال ننفصل من بعض ................طبعا ماهر حيقول دي منو ..............حقول ليهو ..........بت اللزينا.......
الرجوع الى أعلى الصفحة اذهب الى الأسفل
ماهر عابدين دياب
 
 
ماهر عابدين دياب


الموقع : لندن
عدد المساهمات : 2905
تاريخ التسجيل : 02/05/2010

حنة العروس Empty
مُساهمةموضوع: رد: حنة العروس   حنة العروس I_icon_minitimeالخميس 02 ديسمبر 2010, 8:42 pm


الاخ قدورة
يابن الزينا ماتخلي بت الزينا تغلبك , شكلك عاملها وماقاعد ساكت
لو ماقدرت تحل حنة الزينا جماعي, انا حأوريك بت المالزينا العاقلة البتوفر ليك مالك يابن الزينا.
يعني عشان بنتين من بنات الزينا انتقدوك في طرحك لي حنة الزينا تقوم تستسلم.
ماكنت قايلك بكاي
وبعدين نتيجة الانفصال محتومة. تنتظر ليه؟
يابن الزينا فركو العدس... قول .........
الرجوع الى أعلى الصفحة اذهب الى الأسفل
صفاء العمدة
 
 
avatar


عدد المساهمات : 163
تاريخ التسجيل : 08/02/2010

حنة العروس Empty
مُساهمةموضوع: رد: حنة العروس   حنة العروس I_icon_minitimeالأحد 05 ديسمبر 2010, 9:02 am

ياقدوووووووووووووووورة حنة العروس دا شئ طبيعي انو العروس يعملو ليها حنة والبنات حولينها لكن علي قول عمرين عبد القادر انو الما طبيعي انو الاولاد بقو يدخلو فيها وبجيبو الفنان وتبقي هيصة وموضوع
الرجوع الى أعلى الصفحة اذهب الى الأسفل
مشيرة
 
 
مشيرة


الموقع : امدرمان
عدد المساهمات : 1276
تاريخ التسجيل : 27/01/2010
العمر : 34

حنة العروس Empty
مُساهمةموضوع: رد: حنة العروس   حنة العروس I_icon_minitimeالثلاثاء 07 ديسمبر 2010, 8:50 pm

معليش جيت اعدل في التعليق اتمسح ونسيت كنت كاتبة اية بالظبط ههههههههههه
سوري
الرجوع الى أعلى الصفحة اذهب الى الأسفل
مشيرة
 
 
مشيرة


الموقع : امدرمان
عدد المساهمات : 1276
تاريخ التسجيل : 27/01/2010
العمر : 34

حنة العروس Empty
مُساهمةموضوع: رد: حنة العروس   حنة العروس I_icon_minitimeالثلاثاء 07 ديسمبر 2010, 9:45 pm

عدنا من جديد وياود الذين فركو العدس زي ماقال ماهر
نتيجة الانفصال محتومة تنتظر ليه ؟؟

وياود الذين ما اظن في حد حيحنسك عشان ترفض ههههههههههههه
فعرس سريع سريع واخلص
الرجوع الى أعلى الصفحة اذهب الى الأسفل
ماهر عابدين دياب
 
 
ماهر عابدين دياب


الموقع : لندن
عدد المساهمات : 2905
تاريخ التسجيل : 02/05/2010

حنة العروس Empty
مُساهمةموضوع: رد: حنة العروس   حنة العروس I_icon_minitimeالثلاثاء 07 ديسمبر 2010, 11:23 pm



سعادة المشيرة بنت عبداللطيف العمدة

انا اذكرك بما كنت تنوي فعله وهو عمل احصاء كامل لتكاليف حنة العروس المتبعة في البلد. التكاليف المادية والعادات المصاحبة

للحنة العادية
ز
حينها سوف يسهل الحكم

نصيحة هامة: اذا اردت الاقلاع عن عادة النسيان فعليك ان تكثري من قول يالطيف.
الرجوع الى أعلى الصفحة اذهب الى الأسفل
مشيرة
 
 
مشيرة


الموقع : امدرمان
عدد المساهمات : 1276
تاريخ التسجيل : 27/01/2010
العمر : 34

حنة العروس Empty
مُساهمةموضوع: رد: حنة العروس   حنة العروس I_icon_minitimeالأربعاء 08 ديسمبر 2010, 11:38 am

جدا يا عم ماهر سيتم التنفيذ وعندنا عرس قريب هناك ونشوف البحصل وربنا يسهل

لكن في بعض الاحيان النسيان نعمة ولا شنو

وقول يالطيف
الرجوع الى أعلى الصفحة اذهب الى الأسفل
قدورة الاصلي
 
 
قدورة الاصلي


عدد المساهمات : 200
تاريخ التسجيل : 10/02/2010

حنة العروس Empty
مُساهمةموضوع: رد: حنة العروس   حنة العروس I_icon_minitimeالخميس 09 ديسمبر 2010, 8:17 pm


كدي يا اخوانا افهموني... وييييبيييييييييييييو......... ويبيوووووووووووووووووووو........

ماهر ومجدي وصفاء ومشيرة وكلكم ..... كدي قولو انا داير اعرس كدة لا قدر الله ........ وما عندي غير مليون جنية .............. حلوها معاي يا فالحين ....... قولو العزومة جابت تلاتة مليون ....... طيب بقت اربعة مليون داير اعرس ابدأ من وين ......... قولت الخير اصلو كم ..... يا زول قول مليون... طيب فضل تلاتة ..الشيلة قول بي مليون ونص ...فضل كم ..مليون ونص ..طيب التور قول بي مليون ..فضل خمسمية....طيب في صيوان.. يازوالنورين بي كم ... في حفلة ..في مهر الله يقصها كدة مع انو ما بتستاهل مهر ....في كوفير .. يجلبطوها كدة بالتراب انشاء الله........ اوضة النوم الدولاب + الحافلة+التسريحة+ السراير.... ترقدي في النار ... يازول قول شلتهم بالاقساط اها اختهم وين ... وهي الفالحة تجي شايلة ليها صحنين وكم معلقة وتقول جابت العدة وتجي تستلمك....وبعد كلو تجو تقولو حنة العروس ....... اقول ليكم حاجة ....... بعد عمر طويل انشاء الله..
الرجوع الى أعلى الصفحة اذهب الى الأسفل
 
حنة العروس
الرجوع الى أعلى الصفحة 
صفحة 1 من اصل 2انتقل الى الصفحة : 1, 2  الصفحة التالية

صلاحيات هذا المنتدى:لاتستطيع الرد على المواضيع في هذا المنتدى
شبكة مراغه الأصاله والتاريخ ::  قسم المرأة والأسرة والطفل -
انتقل الى: