أعضاء المنتدى على الكرسى الساخن - الكرسى رقم (1) هيثم عبدالقادر

العزيز مجدى سلامات والله شفت الكرسى الساخن بتاعك يا داب وهيثم شخصية جديره
بان تبتدى بيها ومنتظرينك يا هيثم واتمنى يكون دا ضل الضحى والمتكأ لاهل
المنتدى للتسامر والفرفشه والونسه وللغوص فى الاعماق
تسلم ومنتظرنك يا هيثم

[b][justify]
بسم الله الرحمن الرحيم
العزيز م. مجدي والأخوة الكرام
أشكر لكم حفاوتكم وان شاء الله أحاول أجيب على الأسئلة الواردة بما تيسر

نبدأ في الأول بالبطاقة الشخصية كما طلب الباشمهندس مجدي
سبق أن قدمت بطاقة مفصلة في منتدى التعارف وأدعو الجميع لتقديم تعريف مماثل -
الميلاد بمراغة في 12-12-1971م
الوالدين : الوالدة الحبيبة سمبا أو فاطنة محمد فضل درنتود- الله يحفظها
والوالد الكريم عبد القادر عثمان محمد على فضل شهلي- حفظه الله
الروضة في الدندر حيث كان يعمل الوالد موظفا بالصحة هناك
وأما المرحلة المدرسية : الإبتدائية بمراغة والمتوسطة في دنقلا شرق والثانوي بدنقلا الثانوية
الجامعة : كلية الإقتصاد بجامعة الخرطوم تخصص إقتصاد قياسي وأحصاء زي الخال الأستاذ بكري (بعض من أسباب الود)

أيام الصبا والرعية كلها بمراغة وبس في الرعية كنت برعى أغنام الحبوبة الغالية نورالنور بتحانيس مني لأنو باعتبار الوالد موظف وما عندنا زراعة لم تكن لدينا أغنام إلا متأخرا وللبن بس- يعني كنت بمشي للرعية فقط عشان أكون مع الأقران وليس بتكليف حقيقي من البيت.
شلة الصبا والصحاب بمراغة بدأت بعد عودتنا من الدندر حوالي 1976م تقريبا وكنا نسكن مع ناس الحبوبة الغالية نورالنور(الله يديها العافية) وبالمناسبة حبوبتي دي بمثابة الأم لأنو أولا هي تعتبر أمي لسة صغيرة على التربية فكانت تقوم بكل ما يلزم تجاهي منذ مولدي ومع السكنى معاها اكتملت الرعاية الكاملة الرؤوفة بس بدون دلع زايد ، ونعود لشلة اصحاب الطفولة في حلة الدرنتوني أولا منهم الفاضل عكاشة ود عم الوالد ونديدي في العمر والأخ عامر عبد الحي ومالك أبو زيد.
وانتقلنا لبيتنا في حلة فوق سنة 1980م وهناك توطدت صلتي بناس عوض مصطفى والمرحوم صبري نقد الله ثم شلة الأصدقاء خلال المدرسة المتوسطة الثانوية وهم على سبيل المثال: تاج الدين عبد الحميد وسيف اليزل برسي وخليفة عبد المطلب وسيف الدين أحمد ومتوكل سرور وعادل محمد وفيصل أحمد وآخرين كرام قد لا يتسع المقام لذكرهم أجمعين
وكنا نلعب بميدان الوحدة-لكني لم أكن ماهرا في اللعب بالشكل المطلوب- ثم نجتمع في مكان المسجد الجديد في الركن الشمالي الشرقي لجنينة الشيخ عبد الحميد ،كما جمعتنا حلقة تلاوة طيبة بدكان تاج السر عبد الجليل بمبادرة من الأخوان عمار ابراهيم ومعتصم نصر الدين ومنهما تعلمنا مبادئ التجويد وحب التلاوة.

المحطات :
شلة الأخ تاج الدين وخليفة وسيف اليزل وعادل وعوض مصطفى وآخرين جمعت بيننا إلفة جميلة وسمحة والحمد لله لسة مستمرة رغم تباعد الأماكن. والخوة زي دي زي الواحة التي نلجأ إليها لما تسخن بينا دواليب عجلة الحياة ونلقى عندا الراحة الإطمئنان وكل معاني الصداقة الطيبة فلهم كل التحايا ولكل المعارف والأحبة ..
أما مرحلة الجامعة فقد جئناها في ظروف صعبة شوية حيث طبقت علينا أول ناس حكاية دعم الطلاب ورفعت العمادة يدها عن الرعاية اللازمة للطلاب ، وبالتالي حدث خلل في معادلة الإتزان النفسي الأكاديمي والمعيشي لطالب الجامعة ولم تكن لنا سوابق ولا سابقين للمثل تلكم التجربة .. وعليه فقد اجتهدنا لنعبر تلك المرحلة وعقباتها فوقعنا في البداية من سحابات الأحلام الخاصة بالبرالمة إلى -ليس أرض الواقع الصلبة-بل بداخل حفر عديل ثم وفقنا الله للصعود للسطح لنصل إلى أرض الواقع ، وقلنا الحمد لله انو اخترنا كلية ودراسة نظرية لأربع سنوات فقط ... لها ايجابيات لبناء الشخصية ومعرفة الواقع من بدري بدون احلام وكمان جابت ليها تحديات حيث لم نكن واضحين بشكل تام مع الأهل حتى لا نحملهم همومنا فأتت الأخوات الكريمات للدراسة بالجامعة بكامل المسئوليات ونحنا مازلنا شبه طلاب مابين المنطقة الصناعية وغيرها.. وهنا حقيقة انقطعت الصلة مع الكلية إلا بالكاد بحيث نعرف مواعيد بعض المحاضرات الهامة والإمتحانات ... ولما خلصناها قلنا بس حمداً لله على السلامة ، وللأهل بالخرطوم أيادي علينا طيبة وكريمة سهلت لنا الكثير مما كنا نعانيه حينها.
وتحوي المرحلة الجامعية تجارب جميلة ومفيدة في التعارف مع زملاء في مراحل النضج العقلي وكونا صداقات كبيرة وممتدة لسة

نجي لمحطة النص وحكاية الاسلاميين دي .. من الثانوي بدأت محاولات التجنيد لصفوفهم ربما بسبب حسن ظنهم بنا حينها ولكن كلمة التجنيد دي كانت كافية لصد أي محاولات في باديتها رغم الاتفاق النسبي في الأهداف وبعض الوسائل.
ولم أكن عضو منظم مع أي جهة رغم ميلي للكيانات الاسلامية كلها (من كل شجرة ثمرة) من صوفيين وانصار سنة وجماعة بلاغ وغيرهم.
ولي علاقات طيبة مع الجميع وأظن أن الخيرية ليست مقصورة على جماعة بعينها ولا ناس محددين بل هي صفات تنتشر بين الجميع ومن تحلى بها او بعضها فهو في خير.. والله أعلم
وحاولت ولا أزال أن اكون مع ناس الخير .. والله يصلح النوايا.
وعلى كدة يا مجدي والله ما بعرف منو وزير الرياضة من زمن ابراهيم ايل ايدام.. ما اتذكرت ناس غاندي ديل؟
محطة أبو آدم .. بعد التخرج ووبداية الحياة العملية المنتظمة وهجرة ناس البيت للخرتوم بداية بالكلاكلة الوحدة ثم مرابيع أبو آدم لم تكن تعني لي لك هذه المناطق السكنية إلا محل ختت رأس فقط لأنو حقيقة كنا مشغولين بالمعايش أكتر من اللازم والشغل أخد كل الوقت وما لم يأخذه اعطينا إياه، عشان كدة لم اكاد أعرف حتى الجيران في مرحلة ما قبل الاغتراب. وأقول ليك حاجة ملاحظة ولحدي هسع ما حصل حلمت في نومي بأي شيء ولا ناس إلا وكان موقع وجودي بمراغة رغم انو الأحداث والناس ما بكون مروا بمراغة.. يعني لسع في غربة رغم الاستقرار الظاهري ..وبس تحصل لينا الفرحة لما نكون راجعيين للبلد وتبدأ من نخيل القولد ما تظهر ..

الله يعينكم وانتم تتابعون هذا السرد المباشر ...
بس عشان اتحكرنا وقعدنا في كرسي مجدي دا
ونواصل الحكي ...
اشتغلت اولا بعد التخرج بشركة دار النبوي وهي شركة خاصة ، وقد رفضت قبلها العمل الذي وفره لنا أخوة كرام في بنك فيصل وبنك السودان وجامعة الخرطوم وغيرها والسبب كان المقابل المادي حيث كانت المرتبات في هذه الوظائف مقنعة وكافية لخريج جديد ومبشرة بمخصصات تتعاظم مع فترة الخدمة ولكن ظرفي كان يتطلب دخل حار يعني هسع بس وعلى كدة وبعرفة أخ كريم التقيت به مصادفة قدمني لناس دار النبوي واشتغلت معاهم بمعاينة نظرية ودون تقديم شهادات وعملت معهم لمدة سنة تقريبا ورغم الراتب كان ضعف ما تقدهم الجهات الأخرى .. فقد كانت تلك السنة سنة فعلا بوجبة واحد في اليوم تقريبا .. والحمد لله عبرنا العقبة ولحدي اليوم صلتي بهم وثيقة للغاية وهسع بقدم لهم خدمات بمقابل كلما احتاجوا لي وصاحبها رجل كريم.
مطحة المنطقة الصناعية دي دايرة ليها كتاب براها وان شاء الله لبعدييين.... ومن بعدها فترة الهجرة والغربة بالسعودية والتي عرفنا خلالها أخوة كرام وعزاز في مقدمتهم الخال العزيز بكري الله يديهو العافية ويرجعوا لينا في السودان سالم وغانم بحق.. وطبعا معرفة الغربة دي تختلف لأنو الزوول بجي من آخرو والناس هناك وكنا معهم عايشين على أعصابهم والحمد لله انو اتحلينا من الغربة ورجعنا للبلد.. وبالسعودية تعرفت على الأخ الكريم عبد الله حمد أوراس وهو رجل يستحقه السودان والأهل كلهم وعبره عرفت الأخ الجميل محمد عبد المنعم (بركة) من عطبرة وبس.. وأخوان كثر آخرين من مراغة وغيرها
ولفترة الغربة تداعيات كبيرة تحتاج لوقفات في حينها ان شاء الله..


ونرجع لسؤالك عن الاقتصاد والصمغ .. نعمل على تشجيع الاستهلاك المباشر للصمغ العربي محليا وخارجيا لانو في الفترة الماضية كان في تعتيم مقصود وفعال على أهيمة تناوله وفايدته للصحة
ولما تتسع دائرة الاستهلاك للصمغ ويزداد الطلب عليهو ببيان بالعمل لكل مستهلك سوف يزداد الانتاج ليقابل الطلب ويتنفع المنتج والمستهلك وتحصل العافية للأبدان وللإقتصاد كمان..

عدم معرفة البعض بي سببه الأول والأخير والمابشر هي تقصير كبيير مني في التواصل الوجب معاهم وبدون اعذار كافية وان شاء الله نقدر نعوض جزء مما فاتنا بمعرفتهم عبر هذا المنتدى المفيد.. ولهم جميعا العتبى لحدى الرضا
دي بعض المحطات مرينا بيها وان شاء الله نكون قدمنا صورة غير مملة للتعريف بما كان يشغلنا ونشغله
الأخ العزيز ود الشريف .. سؤالك أحرجني لو قدر ما حاولت اتذكر اي انجازات قدمتها مراغة لم اجد شيء بالجد .. وان شاء الله يقدرنا ربنا نقدم شئ مستحق علينا قبال ما يجئ اليوم الموعود
ودمتم في رعاية الله
وآسف للإطالة المملة بس نعمل شنو ؟؟ باب وانفتح وان شاء الله يجيب الخير

الأخوة الكرام
الأخ م. مجدي
ان شاء الله بجيكم برواقة
لانو هسع مسافر لمأمورية عمل لمدة اسبوع
ونكون في الفاصل دا نجمع الأسئلة والمداخلات
ودمتم بخير وأمان

ذوالنورين ابوعزام

ابو عزام ... لك التحية وانت تتابع هموم مراغة ولى سنة ماشفتك وانت تلاحقنى بالتلفونات وبالكتابة عبر المنتدى ....
انت ختيتية واضحة ... وحدة من اهداف الموضوع دة الخفية انو نعمل مسح لطبقة تجديدية بمراغة عشان نطلع بنخبة لكيانك االاقترحتو والسماها مالك هيئة شئون مراغة ... يومى بفكر وبحاول اطبق على ارض الواقع وربنا يقدرنا ونساهم ....
وحدة من الحاجات المرت ... قت النفلفل الناس دى ونترك الباقى للجمهور .... ذنو هيثم دة فى راى ان نضعة فى امانة التخطيط والدراسات لكيان مراغة ...

هيثم طبعا فلته ماف كلام وزيو كتار بس ماظاهرين .... قبل ايام سمعة بيحكى لى عن دنقلا والاذاعة والتلفزيون ... سالتو لى تستضيف هانى العمدة وفى اكبر منو كتار وتختو فى لقاء على الهواء مباشرة مع الاستاذ الخال / مختار احمد بخيت .؟؟؟
قال لى سوالك دة ريحنى شديد وكنت متمنى زول يسالنى ؟
قال لى تعرف هانى دة يعد من اعظم المثقفين لكين مدسوس .... عشان كدة استضفت وكان اللقاء التحفة ...
هانى لو ما مرا على كل الجرايد اليومية والعالمية مابنوم لو يساهر للصباح ....

وكان الاختيار الاول للعملاق هيثم للكرسى ....

ياسر ... انا من الناس البفتش تعليقاتك فى المنتدى قبل اى شى ... ولانك سلطة فواكهنا بعد الاكل ... طالبناك بالمداخلة ...
واعرف الود البيك وبين هيثم .... وشكرا على التعليق الرائع .... وحكاية الردا ومدرسة الشرقية ... ؟؟؟


هيثم ... ربنا يوفقك فى رحلتك ... وحتلقى الجمامة جمعت ليك كمية من الاسئلة فى الانتظار بس ماتنسى شى لانو انا عندى مدقق بشوف رديت على شنو وباقى شنو عشان مانكررو ليك ....

بمناسبة مدرسة الشرقية ... حصل استاذ سيف مرضز (مولانا حاليا) واستاذ عبدالرحمن .... ..... بتاع ارتدى اداك علقة قبل كدة ؟؟؟؟ ياريت تحلق بينا فى المدرسة وكيف كان شعورك وانت تشوف ناس ياسر راكبين حميرم ؟؟؟؟

فى الانتظار ....

هلا بالجميع

قلنا نطل طلة سريعة كدة عليكم

ونحنا ياجماعة الدكاترة منعونا الجلوس في كراسي ساخنة ههههههههههه


وهلا هيثم وربنا يعينك والله قلوبنا معاك وانا شايفة ياسر ومجدي بلفو المشنقة حوليك ههههههه

ربنا يعينك

باشمهندس مجدى
دائما من المبادرين بالجديد وفعلا نقلتنا من جوالى اخر
واختيارك لهيثم كان فى مكانو

ههههههههههههه ايوة يامجدي اسمع نصيحتك اخوك الصغير

لانو وقتها ماف زوغة ابدا [ندعوك للتسجيل في المنتدى أو التعريف بنفسك لمعاينة هذه الصورة]

الأخوة والأخوات الكرام
الحمد لله عدت بالسلامة من رحلة عمل إلى أديس أبابا استمرت لأسبوع ، وان شاء الله نتفح ليها بوست مخصوص لأدب الرحلات للفائدة العامة ونتشارك فيه تجاربنا عن السفر والرحلات ولعل البعض منا لهم ذخيرة وافرة سوف تتحفنا بالمشاركة.
نعود لموضوعنا (لكرسينا) وفي البدء أشكركم على الاهتمام والسؤال .. ونبدأ في الاجابات لما ورد من الأسئلة
الأخ م. مجدي .. لك تحياتي وشكري
- بالنسبة لموضوع تغيير خدمة الموبايل من زين لسوداني بسبب التكلفة العالية بالنسبة لي من خط زين وكمان السبب التاني عشان جحا اولى بلحم تورو .. وكما قرأت لأحد الصحفيين بالوطن حكاية أهل القرية الذين يتداولون كتلة نقدية محددة بينهم في لتبادل المنافع من سلع وخدمات لحدي يوم حضرت لقريتهم غناية اطربتهم ليلة واحدة وخمت قروشم كلها وفاتت رجعت للخرتوم وصبحو الجماعة بدون سيولة نقدية ورجعوا تاني لموضوع المقايضة المحدودة جدا.. وعشان كدا قلنا يمكن لما نشارك بالتحول لمخدم محلي يمكن يحصل استقرار اقتصادي نسبي مع انو الصحفي صاحب الحكاية نفسو لسع (زين)!!
- محطة المنطقة الصناعية وليه ناس مراغة غادروها بس اقول ليك أظن السبب المنافسة التجارية البحتة وزي ما هم جوا في محل آخرين فقد حل آخرون محلهم (ولو تذكر منظر قواديس الساقية .. بس ياها تقلبات السوق) ولابد من المواكبة الفعالة للبقاء لوقت أطول.
- في فترة الجامعة طبعا لما جوا البرالمة حقيقة حسيت بالأنس الكبير لوجودهم حولنا.
- أخر زيارة لمراغة لم يمر عليها شهران لسع .. والشعور الأكيد بالراحة وتشيل نفسك لما ترجع بالسلامة للموطن.. لم أنزل لحلة تحت وحينها حصلت حادثة حريق للنخل قصاد حلة الدرنتوني وهل ممكن تشوف ليك نخلة تحترق .. والله كأنها انسان يتألم ويشعر وتحس بألمه وتكاد تسمع صوته وأنينه.. عشان كدة ما نزلت المرة ديك.
- في المنتدى دا لقيت فرصة للتلاقى معكم جميعا ولا سيما المعارف والزملاء والصحاب .. وريحة تراب البلد ونكهة الشوق لما نتواصل بهذه الحروف ونجدد الصلات ونجد آخرين لم نكن نعرفهم جيدا ولا يعرفونا .. وكمان نقدر نحقق اهداف المنتدى التي أوردها العزيز الخال بكري.-توقيع ود الشريف لا يعجبني و آمل أن يبسطه شوية اذا سمح. وكرفتة الخال أفضل لو جاءنا بصورة بوجهه الطلق البسام لأنها سوف تعبر أكتر عن سماحة نفسه الطيبة.. وفي كتابات د. نضار أجد أثر الغربة فيها واضح بجد وكذلك العفوية والتلقائية التي تميزها مع الصراحة العاجلة حقت أهلنا العمد.. وفعلا نسمة وفاء تكتب بخيال جميل ودافق بوالمناسبة فقط عبر هذا المنتدى عرفت اخوها محمود ولهم وللآخرين كل التحية والتقدير..
- العزيز (ذنو) شكرا على كلماتك الطيبة بحقي وان شاء الله نكون قدرها ... بس أن تشبهني بالخال بكري دي شوية بالغت فيها عديييل ولو مهنيا ولو تسعفني شاعرية الأخ هاني لرأيت هل من سبيل للثريا.
زي ما قلت كان الدخول للطب وقتها مقياس للشطارة دون النظر للقدرات ولا للطلبات والرغبات وأظن الناس هسع قد تخطت المرحلة دي وبقت واقيعية شوية..
الأخ الياسر .. ياخي شكرا ليك كتير على الكلام الجميل دا .. وللأسف تأخرت معرفتي بيك شوية ولكن وصلناك وقت الحصاد برضة ..
وكلامك صاح فعلا حول الانطباع عن الاستقراطية كما شبهت الحال وقتها ويمكن السبب عشان معظم الأهل والأقران كانوا مزارعين والناس تتأثر بالبيئة حقتهم ولم يكن وقتها الاهتمام بنظافة الملبس له كل هذه الأهمية ولا الضرورة حتى.. ولكني كنت ولا أزال آكل مما نأكل كلنا لسبب بسيط وهو انه هو المتوفر والمتاح والمعتاد ولكن الخيال قد يجنح بالبعض قليلا بسبب الانطباع الأولي غير الواقعي ذاك. وفي المتوسطة زي ما قلت قبال كدا كنت مع الأخوان سيف اليزل ومتوكل سرور وسيف الدين وغيرهم ونشترك في نفس الحال والطعام وهنا أذكر كنت لما اقعد من سيف الدين عشان نفطر في بوفيه المدرسة كان لديه شرط انو الفول يكون بدون زيت.. وبالنسبة للنظارة هي في الحقيقة (نقص) وليست وجاهة لانها علاج لمرض مستمر ..بس زي ما قلت ليك الانطباع مؤثر في الحكم في البداية ولا نخلو من الذنب والتسبب في خطأ الانطباع ايضا ربما للاختلاف في مهنة رب الاسرة.
وسؤالك عن نظرة الاستقراطي الذي درس في الروضة لأقرانه .. بالعكس كان ينظر إليهم باعتبارهم لهم الأفضلية عليه لأن امتلاك الحمير وقتها كان ميزة لا تتاح له اطلاقا .. وحتى ولو اختلف الرأي حول افضلية ولد الموظف على ولد المزارع في حاجات لكن تبقى الكفة ترجح لولد المزارع بسبب الأغلبية..
- في المتوسطة كام للمعلمين وقع خاص وأهمية لا تزال موجودة يمكن عشان مرحلة النضوج وقتها وهم يمثلون القدوة ويوجهون الطلاب نحو العلا.. وللأستاذين سيف الدين وعبد الرحمن مكانة خاصة مع أستاذة آخرين بسبب ما قدموه لنا من دعم في الوقت المناسب.. وطبعا للعارفين وقتها اشتهر أ.عبد الرحمن بالشدة (والعلقة) وأذكر مرة في سنة تالتة اختبرنا في مادة العلوم وكنت احبها وفي النتيجة للتلاتة فصول أظن عدد الناجحين فقط عشرة من صعوبة الاختبار وسموهم وقتها بالعشرة المبشرين ... وعند اعلان النتيجة أحرزت نتيجة متقدمة بس مع غلطتين لم يغلطها أي واحد من الفصول التلاتة وحينها اشتد غضب الاستاذ بالجد وفي الطابور عندمعاقبة الراسبين نادني أول زول وضربني بالسوط على ظهري لحد ما ابتل القميص بالدم .. ودي كانت اشد علقة اخدتها في المدرسة.
- واما عن شعوري يا مجدي واصحابي راكبين حميرهم فهو فقط الشعور بالغيرة منهم.
وفي محطة تحتاج لوقفة خاصة وهي مرحلة بيت الأخ الأكبر والعزيز جدا الأستاذ دياب عبدين خلال مرحلة الجامعة وبعد التخرج وان شاء الله نجيها في أوانها
وتاني آسف للإطالة
ودمتم بعافية

سلامات هيثم وعودا حميد

واول مرة اعرف في زول مابعرف عرقلة ههههههههههههههههههههههههه

اقصد محمود اخوي ما يكون سمع بس



وتسلم يديك العافية

[ندعوك للتسجيل في المنتدى أو التعريف بنفسك لمعاينة هذا الرابط]

فضل يا هيثم جلس ماممكن تكون واقف كدا وتجاوب عيب ماف حد حس وجاب كرسي وجلسك ههههههههههههههههه


اجلس واطلب كل شئ موجود لانو هسي الناس ديل بجو خليك جاهز بس ههههههههههه

[ندعوك للتسجيل في المنتدى أو التعريف بنفسك لمعاينة هذا الرابط]

جينا من جديد

وعندي كم سؤال كدا

ماذا يعني لك كل من ؟

االوفاء --الحب --الامل--اليأس--الصداقة --الزواج--الاولاد--السياسة --مراغة

موقف طريف مرة بيك وبما انك معاشر ناس ياسر ومجدي والشلة الكريمة اكيد بتكون عندك طرائف ههههههههه

وتاني نمشي ونجي

بسم الله الرحمن الرحيم
شنوياجماعة منتظريييين الشخصية الحتجلس في الكرسي
والكرسي شكلوبرد عشان كدا عاوزين شخصية في
اقرب فرصة لانوبعد كدا الكرسي حيتلج
ياريت الشخصية القادمة تكون من اعمامنا اصحاب
الافكار النيرة والخبرة الطويلة عشان الواحد يستفيد
وياريت يكون في موضوع مختلف(الكرسي رقم (2))
مجاهد باشنتود

امممممممممممممم سريع مجدي وين دايرين الشخصية الجاية عشان الاسئلة حتروح مننا

[b]الاخ مجدي الفكره جميله،لكن اسئلتك بارده مما يجعل الكرسي بارد.اقترح ان تتكون الاسئله من اعضاء مهتمين بالموضوع وتكون اسئلة ساخنة فعلا

الاخ ماهر مرحب بيك وشكرا على تعليقك الى حيفيد كتير ...
انا طلبت من كل الاعضاء يسالو ما امكن من اسئلة ساخنة وغيرها وفى الانتظار لكن ماشايف فى تفاعل اللهم الا القليل ...

تحياتى

المشكلة انو زول الكرسي مافي تسال الكرسي بس يعني ههههههههههههههههه

[justify]
السلام عليكم ومرحبا بالجميع
ورمضان مبارك علينا وعلى العالمين
اتاخرت شويتين في الرد لانو سافرت لكردفان مع فريق عمل لمدينة الابيض والنهود والرهد
وطبعا مناطق كردفان في الفترة دي من السنة الجو جميل جدا والخضرة تغطي الرمال مع قطعان الابقار والابل والخرفان تملأ الامكنة وتنشر الجمال والراحة لمن يشاهدها والناس مبسوطة ومتفائلة بخريف سمح وخيرو كتير ... ورغم اننا سافرنا لقطاع الصمغ العربي ولكن لفت نظري أن هذا الموسم لديهم يصلح تماما للسياحة ولا سما وانه يتزامن مع اجازات المدارس لدى الخليجيين والمنظر مغري بالجد للبقاء هناك ويستمر من يونيو إلى سبتمبر كل سنة بس محتاجين لخدمات اضافية بشكل سياحي خارج المدن لتستقطب السياح وتزود البلاد بكم هائل من العملات الصعبة وتزدهر اقتصاديا ربما أكثر فعالية من شغل الصمغ نفسه.
.. نعود لموضوعنا و أظن أن الوقت حان لضيف جديد على الكرسي .. مش كدة؟
اشكر الأخ مجاهد على التواصل وتحياتي لأبو وضاح بكثرة
د. نضار العزيزة ان شاء الله تتم السعادة بالتعارف الذي وفره لنا هذا المنتدى والتحايا للقائمين على أمره.
يا نسمة دي شنو الكراسي المخيفة دي؟ .. لكن العصاير شكلها مغري جدا ورمضان كريم.. وشكرا ليك
وكلماتك دي إلا تدخليها في جمل مفيدة حتى تقع ليا لكن براها كدة مشكلة.
ويا مجدي انت لسة من زمن الحلو مر ... ياخي هسع شرابنا المفضل هو التبلدي بالصمغ وشوف وجرب وقارن.

حمدلله على السلامة هيثم
والله انا نفسي امشي ربك وكوستي وكردفان وجبال مرة وكسلا

لكن النية في والله الا امشي والداير يرفعو يدو فوق سريع لاتدع العرض يفوتك ههههههههههههههه

ومفردات الابتداء دي اجملها انت اي دخلة في جمل من عندك او لزها للزول البجي بعدك

والكراسي دي لزوم الراحة مع العصير

ورمضان كريم

الاخوة فى المنتدى تحياتنا الطيبة ........ سنعيد للكرسى سيرنة اليومين الجاية مع العم بكرى .... وياريت العم بكرى يقرب شوية