سلوكيات سفاف

موضوع: سلوكيات سفاف الخميس 27 مايو 2010, 10:29 am

سلوكيات سفاف

طقطق الكمساري للزول دا وحاسبه واستلم الباقي وادخله في جيبه واخرج يده من جيبه حاملاً كيس صاعوت به لزوجة ، بدأ يضع السفة في شفته العليا بعد أن كورها ودورها جيدا وتفوح رائحة نفاذة من الكيس تملأ المحيط وويلُ لغير الكييفين.

هو يجلس في مركبة عامة ولحسن الحظ او لسوءه كان في الوسط بعيداً عن الشباك .. يحاول التخلص مما علق بيده من فتات الصاعوت ويمسح يديه ببعضهما ولكن يبقى منه شيء عالق بين الأصابع وكمان تحت الأظافر ، اما ما بين الأصابع فيقوم بمسحه بجانبي مقعده حيث يجلس وهو يتشاغل بالنظر بعيدا حتى لا تقع عيناه حيث يوسخ .. وتشقى أعين الآخرين لما ينظرون ويزح كل منهم ويبعد عن اطراف المقاعد خوفاً مما سبق قبل ركوبهم الحافلة تلك ومما علق بها في رحلات سابقة.

ويريح صاحبنا ظهره على المقعد بعد أن يمتد الكيف فيملأ فراغاته ولذا يتزحزح ويتحكر على كرسيه تاني وفجأة يميل إلى جانبه و.... وتفتح النوافذ المغلقة للحافلة ، وشعر البعض منا بالطمام والغثيان كله.

عدد المساهمات : 81 تاريخ التسجيل : 17/01/2010

بعد التحية
موضوعك ذكرني بمقال منشور في النت قمت بنقله للفائدة
ويحكي صاحب الموضوع

كنت ...اتعاطى التمباك ( الصعوط ) ... لفترة طويلة ... و الحمد لله هدانى و تركت تعاطيه ...ساحكى عن هذا ( الكابوس ) فقد يكون فى كلماتى ... دافع .. لمن يريد الاقلاع عن تعاطيه ...
هنالك سؤال ... كنت اطرحه على نفسى مرارا ... اخوانا ابناء غرب السودان .. لماذا لا يتعاطون الصعوط ..؟؟؟ علما بان غرب السودان هو موطن زراعته و انتاجه ..!!! الحكاية مش حكاية ان الصعوط .. مش كويس .. لا .. هنالك حاجات كثيرة مش كويسة ... بينها الخمر و السجائر و حتى البنقو ...و كثير منهم يتعاطونها .. اما الصعوط فهو بالنسبة لهم ( غول ) يمنع الاغتراب منه ... طيب ليه ؟؟؟ ليه دى ...خلتنى اسافر الى الابيض .. و من هناك للفاشر ...بالطبع لم اسافر من اجل الصعوط .. فقد كنت فى مهمة عمل ..لكن وجدتها فرصة لمشاهدة انتاج ( حبيبى ) الذى قضيت معه سنوات من عمرى ..كيف تتم زراعته ؟ و كيف يحصد ؟ و كيف ؟؟ و كيف ....؟؟؟ حتى يصل الينا فى (شكله المعروف) .
قادتنى قدماى الى مكان تخميره و تجهيزه للتسويق .. كان برفقتى زميل من المنطقة كان يعرف كل شىء .. و لكن ( الكل ) هذا شىء هذا لايريدنى ان اعرفه ..على كل حال يتم تجهيز (الصعوط ) كالاتى :
.تقطف اوراق التمباك الكبيرة الحجم وهى اقرب للون الاصفر .بعد ان تلاشت خضرتها المميزة .. توضع فى مكان جاف جيد التهوية ..فى رواكيب كبيرة .. تحجب عنها اشعة الشمس .
*بعد ايام .. وبعد التاكد من شبه جفافها ... تجمع فى شكل ( كوم ) دائرى ... تغطى باوراق ( العشر ) الخضراء الطازجة , كطبقة اولى ومن ثم يجمع ( روث ) الحمير .. يعنى ( بعر ) الحمير الجاف
( عشان كدا لايمكن ان تجد بعر حمير فى شوارع الفاشر ) يوضع هذا الروث فوق طبقة صفق العشر , ثم توضع عليه طبقة اخرى من هذا الصفق و تغطيه تماما .( يُمطر ) الكوم بالماء يوميا لمدة ثلاثة ايام , صباحا و مساء , و فى اليوم الرابع يطلع عليه مجموعة من الاطفال فى حركة دائرية معروفة لهم , كل هذا لكى تنزل عصارة البعر الممتلىء بالماء على اوراق التمباك ...و الهدف من كل هذا هو تخمير هذه الاوراق ... فى اليوم الخامس عادة ... تزاح اوراق العشر و بقايا الروث جانبا ...و توخذ اوراق التمباك المخمرة لتوضع فى الشمس حتى يكتمل جفافها و بعدها تجمع لكى تطحن بطواحين اعدت خصيصا لذلك ..... من هنا عرفت لماذا يتجنب اهلنا فى الغرب تعاطى الصعوط .
* بعد وصول الصعوط الينا فى جوالات ..نصل لمرحلة ماقبل تسويقه كمادة توضع فى الفم ...طبعا مايرد الى الاسواق عادة ما يكون نمرة ثلاثة او اربعة .. طبعا نمرة واحد نادر الوجود ...عشان كدا ولكى يكون لهذا الصعوط (الفالصو ) نكهة تساعد فى تسويقه ..يقوموا الجماعة يخلطوا معه حاجات عجيبة جدا ...احيانا يتم تجهيزه و عجنه بالعرقى الواحد دا ...و مرات يضيفوا اليه( بنج الحصين ) و كمان مرات يخلطوا معه ( بدرة حجارة البطارية القديمة) بعد طحنها ... وفى اغلب الاحيان يضيفوا عليه ( الاسمنت ) لزيادة الكمية ... و الما مصدق يمشى يسال جماعة الصعوط .
وما عايزين نتكلم عن الامراض التى يسببها تعاطى الصعوط دى طبعا معروفة للجميع .
بس سؤال لاى واحد بسف الصعوط ...الم تجد علاقة وثيقة بين رائحة الصعوط و رائحة ( بعر الحمير ...!!!!!)
و حمانا الله و اياكم من هذا ( الصعوط ) الكريه .. الوسخ .. الذى تشمئز من تعاطيه النفوس .. و مسكينات بنات حواء المتزوجات، ربنا يعينن و يهدى أزوآجهم (ويقلعوا من تعاطى الصعوط) !!!!

موضوع: رد: سلوكيات سفاف السبت 29 مايو 2010, 5:19 pm

بسم الله الرحمن الرحيم
لكم الشكر اخوتى الافاضل على هذا التوبيخ لناس الصعوط اللهم احمنا منه واحفظنا ويهدي كل من يتعاطاها .
ومن رايى سوف اقوم بفتح شريحه او عنوان بهذا الموضوع
ونسميه رايك شنو فى الزول البسف الصعوط
واذا كان ولد ولا بنت هى قصدى راجل ولا مره
ورايهن برضو عايزينو فى الموضوع دا عشان اذا اتقدم واحد بسف الصعوط
نشوف بتعمل شنو وانت يا ولدنا اذا ميشت واتقدمة لوحده بسف صعوط حتعمل شنو يلا عايز الراى الصريح ومن غير ما تفكر او ترمى الشنقة .
اسمع معاك شنقة بالله سريع كدا عشان راسنا قاعد يوجوج

موضوع: رد: سلوكيات سفاف الأحد 30 مايو 2010, 12:50 pm

الأخ أ. جمال
شكرا على المرور
وحقيقة وصفك لمراحل صناعة الصاعوت تسبب الازعاج حتى لغير المتعاطين

شكرا يا شهاب على المرور
وان شاء الله يتعافى الجميع من هذه العادة الضارة

ورد بصحيفة الرأي العام عدد اليوم الاثنين 13-12-2010م

أ]justify] أصْدر د. عبد الملك البرير معتمد محلية الخرطوم، قراراً منع بموجبه منح أيِّ تصاديق جديدة لمحلات بيع (التمباك)، فيما وجّه الجهات المختصة بضرورة منع التصديقات للأكشاك والطبالي العاملة في بيعه حتى نهاية العام الجاري.
وطالب البرير في الإجتماع الدوري للمحلية أمس، السلطات المختصة بمسح وإزالة أيّة كتابة تعلن وتُروِّج لتعاطي (التمباك) وإستبدالها بعبارة تحذيرية (التمباك ضار بالصحة ويسبب السرطان). [/justify]

كتر الله من امثالك يا هيثمو وجعلك من ابناء الوطن وحفظك لوطن مراغة الاصيل وموضوع مهم جدا بارك الله لك وجزاءك الله كل خير

شكرا هيثم لك الود

وطبعا لما امر باي مكان لبيع الصعود طوالي بصدع من الرائحة

عدد المساهمات : 34 تاريخ التسجيل : 24/11/2010

جزاك الله الف خير اخي هيثم وشكرا ليك الاخ \جمال لتوضيح ما كان غائبا عن اصحاب الشفة المهرودة بالصعود
ذي قلبي كان حاسي انو الشئ دا فيهو حاجة عفنة
زكرتني اخي جمال تخمير الزبالة في واحد فيكم شاف لون الموية الفي اطراف كيس التنباك عليك الله ما بيشبه الموية النازلة من اطراف الزبالة خاصة بتاعت الحمير
سألت واحد سفاف كبير انت بتشعر بي شنو لمن تسف الصعود؟ قال: بتكيف ولمن ما تلقي السفة؟ بي صداع شديد قلت ليهو اول مرة اعرف انو وجع الراس بيكيف .

اخوي هيثم

السفافين اكثر ناس تعبونا وهجرونا... سامعك قلت لي كيف
لانه هناك نوعين من السفافين...النوع الاول صاحبك الي ذكرته بتاع الصاعوت...نعم مقرف ومقزز...لكن لو بقت علي القرف والقزز تبقي مشاكلنا بسيطة.
لكن السفافين السفوا قروش البلد ونهبوا المال العام ضحي ونصة نهار وملوا البنوك الغربية واستثمروا في ماليزيا والخرطوم ودبي ولندن وايران ديل يعملوا ليهم شنوا؟
سفاف الصاعوت تزح من جنبه الموضوع انتهي
سفاف قوت الشعب يعملوا ليه شنو؟
ياراجل قول يالطيف

[color=olive]العزيز عمرين..
والله طلتك اسعدتنا حتى نسينا ريحة الصاعوت ذاتو...
وفعلا تشبيه في محلو بين موية الزبالة بتاعت الحمير وتلك التي في اطراف ذلك الكيس المنتن.
والأستاذ جمال جابو من آخرو ببيان كيفية التصنيع المقزز داك
والسفاف الكبير المصدع دا ياريت لو ناس الطب يفيدونا بالحاصل ليهو شنو لحدي ما يفتش على علاجو في الزبالة دي

ويا مشيرة .. بالله كيف تجتمع نسمة وفاء مع (ودعماري داك) .. ما ممكن. واصنح باختيار الشوارع التي تخلو منه .. والصداع ممكن يجيك ليس فقط من الريحة ديك بل حتى لو قريتي اللافتة بس وشكل الناس الواقفين كلهم وبعد السفة كما هو موضح بأعلاه!

وشكرا ليك تاني يا ود الشريف .. والله يديك العافية ويحفظنا اجمعين من هذه العادة السيئة ويعافي المبتلين بها

الأستاذ مـاهر ..
قت ليا نوعين من السفافين بس
والله هناك انواع كتيرة خلاس
بس هنا نحنا معنين بالنوع المذكور دا
وعشان الانكار الاجتماعي للعادة الكعبة هو أول درجات تركها عشان كدا فتحنا البوست دا وزي ما جاء في تفاسير تحريم الخمر بالتحذير والتكريه ومن ثم لحدي التحريم كما فسرها بعضهم
ولو تلاحظ في فترات في البلد في ناس خلت الخمور لأنها اصبحت عيب ومنفرة اجتماعيا قبال موضوع الحرمة والمحكمة والآخرة هناك
وبنفس الطريقة هنا بنحاول خلق نفور عام من الصاعوت وما شابهه حتى يصبح عيب وغير مقبول اجتماعيا وبعداك تساعدنا الحيكومة بالتضييق عليهم ويقول الفقهاء بفتاوي التحريم وما شابه حتى نتخلص في النهاية من الصاعوت وأمراضه..

أما سؤالك : سفاف قوت الشعب يعملوا ليه شنو؟
قول يا لطيف وافتح لينا بست حول الموضوع دا ونشوف

ولما نزل الموضوع دا في سودانايل كانت في خاتمته بعض البهارات لزوم التسخين ... مثل
سؤال داخل النص : ما هي العلاقة يا ترى؟ هل نسمع رأي طبي في المسألة دي.
وسؤال خارجه : هل يعاني من عوارض الامساك من يتجنب تعاطي التمباك؟
في التنك : اعمل حسابك ... لما يطلع حقة الصعوت أو علبة السجاير فهنالك ريح خارج من تلك الجهة!

ومطلوب من ذوي الاختصاص الإفادة.. [/color

]

عدد المساهمات : 200 تاريخ التسجيل : 10/02/2010

شكرا اخي هيقم علي الموضوع الشيق....... احكي ليك قصه .... في السنة الاولي الجامعية كنا كعادة طلاب العلوم نقوم بتشريح ... الصراصير والضفادع والاسماك والارانب....... البنات الحناكيش طبعا كان بيتعبو تعب شديد .... واحدين ما شافو الصرصور زاتو ......... المهم صحبتنا الضفدعة مافي طريقة تخدير ليها سهلة الا الصعود ... حتي استاز العملي يخدرها بالصعود.....اها البنات الحناكيش يعملو شنو ... ما في طريقة ... سمهو الموبايل ... الواحدة تجي تقول ليك مع الصباح اديني موبايل عليك الله ... يابت الناس انا ما قعد اسف اديكي من وين .. تقول ليك عليك الله انا كلمته ود الجيران يجيب لي ضفدعة اشحد لي سفة طيب .....
سف الصعود عرفنا .... لكن زول يسف ولاية دي ما عرفتها...........

عزيزي الغالي هيثم
لعل الاخ قدورة اراد ان يوضح لماذا يستعمل الناس هذا التمباك الاقذر من الزبالة المخمرة وهو الوحيد الذي لايستسيغه دجاج حبوبتك نورالهدي...السبب الاول وجود النوع الثاني من السفافين في الكلية نشف المعمل من كل شئ حتي المخدر الرخيص,لذلك حتي الحسناوات صرن يبحثن عن السفة ,ومن سخرية القدر صارت للسفة فوائد.
السبب الثاني عندما يسف المسؤولين البلد وتنشف حتي من ابسط الاشياء,ويدفع المواطن الضحية الفاتورة بالضريبة في العليم والصحة والضرائب المختلفة ولايجد حتي حق الدواء...وفي لحظة ياس يفكر في وسيلة يعدل بيها دماغه وربما يكون في خاطره الابتعاد عن الانتحار والمخدرات والكحول والجنون. اعتقادي الشخصي ان العلاقة بين النوعين من السفافين قوية
نعم لاهمية الموضوع,عادة قبيحة,وسائل مقزز,وتجب المحاربة

شكرا الاخ هيثم علي هذه القصه العجيبه ان شاء الله يقراءها كل مستعملي الصعود ربنا يشفيهم حقيقة محتاجين ان ندعوا لهم و الشباب من قبلي ما خلو ليهم جنب ينوموا عليه

شكرا يا قدورة على مرورك المقدر
والفائدة العلمية بأن الصاعوت يصعق الضفدعة ويخدرها .. لكن السؤال ليه؟ واشمعني!
وقت ليا سموهو الموبايل.. والله مخارجة حتى من الاسم القزز دا

الأستاذ مـاهر .. عندما ترى الفساد يعم البلد ويوكل الأمر إلي غير أهله بالله بس ألزم (يا لطيــــــــــــف) فهي الكفيلة بأنها والله تعدل الدماغ وتفتح ليك (يجعل له مخرجا ويرزقه من حيث لا يحتسب) وبالتالي لا يأس ولا يحزنون .. (ولا يسفون)!.
ونسعى كلنا لنوضح ما نتفق عليه من أن تناول الصاعوت كما تفضلت : عادة قبيحة,وسائل مقزز,وتجب المحاربة

شكرا على مرورك الجميل يا شريف وان شاء الله يتعافى المبتلين بهذه العادة السيئة ... وبما أن (ثلث) الجالية السودانية لديكم من دارفور اريت تأتينا بإفادة منهم عن ما خفي من اضرار الصاعوت دة!

وهنا أنزل جزء من تحقيق عن الصاعوت بجريدة الرأي العام 4/1/2011م

يحتوى على (28) مادة مسرطنة

حسب الاحصائيات والدراسات فإن (25%) من المراهقين في السودان يتعاطون التمباك وينتشر بنسبة (32%) وسط البالغين وبنسبة (35%) في القرى و(24%) في المدن فأكثر من (6) ملايين يتعاطونه.. وتصل عائداته الى (108) ملايين جنيه سنوياً بانتاج يصل الى (30) ألف قنطار في الشهر وواقع التمباك في السودان مؤلم والأكثر ايلاماً ان الأمر في تفاقم مستمر ويومياً يفتتح محل جديد للتمباك أو العماري مما دعا الدكتور عبد الملك البرير معتمد محلية الخرطوم الى إصدار قرار بوقف التصاديق الجديدة لمحلات التمباك وتطبيق المواصفة بكتابة عبارة (التمباك ضار بالصحة ويسبب السرطان) فمتى ينفذ قانون الصحة العامة 1999م القابع بادراج المحليات؟.. (الرأي العام) تفتح ملف التمباك عبر التحقيق التالي:
واقع مؤلم
واقع التمباك في السودان مؤلم فهناك بعض المشاهد التي تقشعر منها الابدان كالشخص الذي يتعاطى التمباك وهو في سن (12) عاماً وأصيب بسرطان الفم في سن الـ (28) سنة وتم استئصال الورم والانسجة المحيطة مما ادى الى التشوه، والتمباك تبغ داكن اللون كريه الرائحة، مخمر ومطحون يوضع بين الشفاة واللثة ويسمى كذلك (بالسعوط)، أو (العماري) أو (السفة) وأكبر مناطق انتاجه بالسودان في دارفور، لكن الغريب ان أهل دارفور لا يتعاطونه الإ فئة قليلة منهم لكن أكبر نسبة استهلاك في الولاية الشمالية ويحتوى التمباك على (28) مادة مسرطنة أكثرها ضرراً هي نيترسامينات التبغ التي تشكل اثناء تحضير وتخمير التمباك، كذلك يحتوي على مادة النيكوتين وهي تؤدي الى الادمان واضطرابات في القلب وارتفاع ضغط الدم والاوعية الدموية.. والنيكوتين الذي يمتصه الجسم من التمباك يزيد بمرتين أو ثلاث من الممتص عند تدخين سيجارة كما يبقى النيكوتين في الدم لفترات اطول. ومن المواد المسرطنة الاخرى في التمباك (البينزوبيرين) الكورتونلديهيد، الفور مالديهيد (عنصر يستخدم في تحنيط الموتى)، والاسيتلد يهيد (مادة مهيجة)، هيدرازين (مادة كيميائية سامة)، النيكل، الكادميوم (عنصر يدخل في صناعة بطاريات السيارات)، والبولونيوم (عنصر مشع ذرياً) ويسبب التمباك العديد من انواع السرطانات منها سرطان الفم والحلق والبلعوم وتنتشر هذه السرطانات باستمرار الى الاعضاء المجاورة ما لم تتم معالجتها سواء كيميائياً أو بالاشعاع أو جراحياً (إزالة الاورام والانسجة المحيطة) ويؤدى ذلك في اغلب الاحيان الى تشوهات، فضلاً عن اصابة مستخدمه بالسرطان فان التمباك يسبب انواعاً عديدة من البقع الحمراء والصفراء والتقرحات الحميدة في بطانة الفم التي تحمل خطر التحول الى خبيثة بالاضافة الى انحسار اللثة عن الاسنان وامراض اللثة المؤدية الى تخلخل الاسنان والمشاكل الاجتماعية بسبب تقزز المحيطين بالمتعاطي.
وحسب بعض الدراسات فان (25%) من المراهقين في السودان يتعاطون التمباك و(32%) من البالغين فوق سن الـ (18) وفي المدن بنسبة (24%)، أما في القرى والمناطق الريفية بلغ نسبة (35%).
قرار دون تنفيذ
وزارة الصحة ولاية الخرطوم اصدرت مؤخراً قراراً بمنع تعاطي التبغ الذي يشمل كذلك التمباك في المؤسسات الصحية وفي بعض الاماكن العامة كالمطار والمدارس إلاّ أن مصدراً بادارة صحة البيئة بمحلية الخرطوم بحري يذهب الى ان القوانين لا تنفذ بل توضع على الرفوف فقط (حبراً على ورق)، ويرى د. كمال الدين حمد البروفيسور المشارك في كلية الطب جامعة الخرطوم ومستشفى الذرة ان القانون وحده لا يكفي ويقول: الاساس هو التوعية بمخاطر التبغ ليعرف المواطن حقوقه والسودان وافق على الاتفاقية الاطارية لمكافحة التبغ ووقع عليها وهي تلزم الدولة بعدم الاعلان عنه في أية وسيلة من الوسائل، ويضيف الدكتور حوالي أكثر من (6) ملايين في السودان يتعاطون التمباك، وهو يتسبب في (28%) من سرطانات الفم في السودان، ويقول من أهم الآليات للمكافحة التوعية وتفعيل القوانين وزيادة الضرائب على التبغ لتقليل استعماله ومنع الاعلان عنه ففي كل شوارع العاصمة تجد لافتات للعماري والتمباك بالاضافة الى عدم بيع التبغ لمن هم أقل من عمر (18) سنة بالقانون وان تكون هنالك قدوة (الاطباء والمعلمون وأهل الرأي).
وما زلنا في انتظار رأي أهل الطب....؟

تصحيح الاخ هيثم افراد الجالية بمدينة كريمونا فقط رقم 3 ممكن يكون خطاء املائي اسف .

شكـرا على مرورك اللطيف يا شريف
ولسة منتظرين منك حكايا عن الصاعوت في الخارج

والله يسلمك