غربة غشاشة ومودرة

يا غربة .. يا بكاية .. يا غشاشة .. يا مستهبله !!!!

يا غربة .. يا غشاشة .. يا بكاية .. يا مستهبلة
تغرينا بي درهم قروش وراه قنطار بهدله
جيناك سنة .. أو قول سنين بنكمله
نبني البيوت في العاصمة
وبي كوم أثاث بنجمله
وكرولا حاره نرسله أصلو التنقل مشكله
ونكمل الدين بي مهل والسمحة جاهزة نحصله
غير القروش اللي الأهل عبر الشهور حا نرسلا
والباقي يدخل في البنوك ونشوف دباره نشغله
ناس فكرت تجني العلم تبدأ الدراسة تواصلا
أحلام كتيره وشيقه وآمال كبيرة نأملا
لكن حساباتنا الغلط في كل عام بنرحله
مرت سنين من العمر بنعزها وبنفضله
والحسبة وصلت طاشرات يمكن نعيش وندبلا
وتعال نحاسبك يا وهم من غير رقم أو أمثله
كان للقروش نجري ونحوش لكن تقول بنشاكلا
ما راضية تقعد في الجيوب وتقول حرامي بينشلا
لكن بترقد في الضهور بديون تقيله متلتلا
ممحوقة ما بتقضي الغرض وأقل حاجة تكملا
كملانه سفرة وحق وزن ومجاملات مستفحله
ضرائب أبعاج المشي وإلزامي حمدي نحولا
وأحلامنا صبحت زي سراب نمشي ونجري ما نحصلا
يا ريت يكون هم القروش يا غربة فيك هو المعضله
لكن تعال شوف الهموم الما إفتكرنا نقابلا
ذلة ومهانة واحتقار خلو النفوس متململة
سجنا كبير فيهو الكفيل سجان قيوده مكبله
أشغالو شاقة ومؤلمه ودايما تكون مستعجله
ما عاد يكفيها النهار تحتاج ليالي مليله
أمراض كتيره بدت معاك عايزه الفحوص مستعجله
ناس الضغط والسكري ومرض القلب مع الكلى
ومصران وقرحة وإكتئاب ونفوسنا ما متحمله
وبنينا فيك كيمان لحم تحت الهدوم متندله
وأكيد يكون أكل المعلب والمجمد عاملا
عدم الرياضة والكونديشن لابد يكون ليهم صـلا
وكمان تعال لمعادلة ما قدرنا أصلا نعدلا
سجن العيال جوه الشقق وفراق الأهل والعائله
جيب العيال بي جيبنا مال وجيوبنا غيرو مميله
وصغارنا صبحت بالزهج متوحشة ومتجفله
لا قادرة تلعب في خلا ولا ضل شديره يضللا
لا قادرة تدرس بي نفس من الدروس المترهله
تلقي الولد غالبو الكلام والبت كبيرة ومريله
كل الضغوط سوا ما قدرنا حتى نقللا
في كل طرف تلقي القرف تلقي الخيوط مداخله
يا غربة أديناك كتير أدينا خاطرك يسهلا
خلينا نرجع بالفضل نلحق حياتنا نعدلا
آمالنا فيك بدري إتنست إلاّ الرجول متوحله
وبقينا زي أهل القبور لا البره عارف يدخلا
لا الجوه يرجع لي ورا يحكي الحقيقة يوصلا
لكن خلاص هان الخلاص عندك نزل مهما علا
وإن شاء الله نحيا نودعك وتكوني ذكرى نغازلا
يا غربة .. يا بكاية .. يا غشاشة .. يا مستهبله

منقووووووووووووووووووووووول

قصيده واقعيه بس عايزه شايقى يغانيها يلحنا

يرد الشاعر محمد الزبير على قصيدة الغربة غشاشه وبكاية ومستبهلا ليضع طريقا آخر لنكشف اسباب فشلنا ونعمل بأسباب النجاح ، التوفيق والنجاح بيد الله ومشيئته فقط ولكن علينا بذل الأسباب والكلام موجه خصوصا لصغار المغتربين سنا وخريجي الجامعات:

عذرا تمهل في الحكم الغربة لا غشاشة لا بكاية لا مستهبلة
شطر الكلام ماهو الصواب ما يستقيم دون تكملة
نصف الذكرتو كلام صحيح كانت ثقافة مرحلة
الغربة تخطيط منتظم ضبط الحكاية من اولا
الغربة زي موية المطر في الرملة ما بتحصلا
الغربة عايزة مؤهلات تطوير شديد دون ململة
الغربة كم ربت يتيم مسحت دميعات أرملة
في الغربة ناس تركوا الخمول عرفوا الصلاح و الصلاة
بالغربة ناس فتحت بيوت حفظت صغارها من البلا
بالغربة كم حجوا الكبار دفعوا التذاكر في الغلا
الغربة كم سندت ضعاف اضحت امورها مسهلة
بالغربة كم مديون مهان سدد ديونو وحلحلا
بالغربة ناس عملت بيوت مفروشة اثاث آخر حلا
في الغربة ناس حازت علم طب وإقتصاد مع صيدلة
في الغربة ناس درست فقه حفظوا المتون من اوّلا
الغربة كم دعمت إمام شيد مساجد للصلاة
الغربة كم رزعت حقول روت العطاشا الفي الخلا
قصة عيال جوة البيوت في دا الزمن ما مشكلة
ليه الولد غالبو الكلام والبت كبيرة مريلة
ليه مافي تربية وإهتمام ليه العيال متبهدلة
لو انت مشغول بالعمل دور الأمومة مكملة
تهوى السهر نوم النهار خلت عيالها مهملة
سوق الدهب ونسات حريم طبعا اكيد ليهم صلة
علم الشوارع ما بيفيد في البيت هوايتو بحصلا
ظل الشديرة دة كان زمان وقت البيوت مترهلة
كل البيوت صارت شقق مضروبه بوهية مقفلة
في البيت في انترنت بيجيب كل الخيوط متواصلة
البيت بيحفظو من الشرور ومخدرات ومن البلا
حتى اللعب بي إنتظام أوقاتو ما متداخلة
ليه للقروش تقعد تحوش بالأولويات نزلا
رتب حواجك بي عقل ما تسيبها ماشا سبهللة
طور معارفك بإنتظام أصلو المنافسة مذهلة
الواسطة قبل الإمتحان ما اظن تحل المسألة
خلى المجاملة في حدود والواجبات ما معضلة
والغربة منحة من الكريم تستاهلك وتستاهلا
بس أبدا بي تخطيط سليم من دون كلل دون ململة
حصل قطارك ما يفوت بى سرعة من غير فرملة
سيب إكتئابك والملل كتر دعاك وقت الصلاة
فارق الشلل لعب الورق سهر إستراحات بطلا
اصلو الزمن دوار شديد لحظاتو ماها مطولا
وادعو الكريم ساعة السحور للمعضلات بيسهلا
بس حسن اعمالك كمان بي نية صافية من اولا
تلقي المراد يوم الحصاد كل المحطات توصلا
وإن فاتت في الفانية دي يوم القيامة تحصلا

الغربة حااااااااارة ربنا يصبركم ويرجعكم بالسلامة

وياعمو الجرسة شنو هههههههههه

الابنة مشيرة

لك تحياتي وتقديري على مجهوداتك الرائعة ولوالديك اصدق تحياتي وامنياتي بتمام الصحة والعافية لهما.

يابتي الجرسة زمان اتعديناها ......... ونحن الان في مرحلة محمد الزبير ..................بس انا محتار شوية

الجابك لى ركن المغتربين شنو علشان تشوفي جرستنا ...............هههههههههههههههههههه

عدد المساهمات : 163 تاريخ التسجيل : 08/02/2010

الجابني ياعمو انو ماف رد في الغرف المحلية قلنا نجي نزوركم بي جاي يمكن نلقى رد هههههههههههه

شفتا ياعمو رديت بي حساب صفاء ونسيت امسحو ههههههه

وبرضو لازم نخفف عنكم عشان كدا بنجيكم بي جاي

شكرا لكما (عزيزاتي الرقيقات مشيرة وصفاء ) اجابتكم شافية ووافية

حقا يكفينا طلتكم ويجبر خواطرنا ويطفئ نيران غربتنا ويقرب المسافات....الخ

احيانا الحقيقة تكون مرة .....راجل يتجرس..... ويخجل لمن الناس تشوف دموعو وجرستو ....ههههههههههه.

اهليييييييييين عم بكري

لازم نخفف عنكم والغربة حارة لكن بالمنتدى والناس والاهل المتواصلين بتخفف عنكم

عدد المساهمات : 1 تاريخ التسجيل : 10/11/2010

غربة بكاية صحي وابقو مارقين خلاص كفاية

عدد المساهمات : 719 تاريخ التسجيل : 25/05/2010

ربنا يعينك الاخ بكري في الغربة عيون في الغربة بكاية
ربنا يصبركم عن نار الغربة ونحن معكم قلباً وغالباً

» ماذا تعني كلمة غربة