الذمه الوااااااااااااااااااااااااااسعه

لم اجد عنوانا مناسبا للموضوع فعني لي يا احبتي ان اترك هذا الاختيار لكم
الا اني تذكرت كلام واحد مصري زميل لنا في العمل .. قائلا لي وهو يصف اخا له في مصر (ياخي ده واحد ذمتو واااااااااااااااااااااسعه)
احترت يومها في الوصف لكن بعد الاحداث الجايه ده عرفت جيدا كيف تكون الذمه بتلك بهذا الاتساع
الكلام ده يا احبتي في الوطن الحبيب
لعلها ظاهره عامه او لعل الامر لا يستحق لكنه عني لي الكثير من اوجه عديده
كدي احكي ليكم وانتو قرروا
بعد وصولي الي بورسودان اصر احد الاخوان علي توصيلي الي مكتب الحجز والتذاكر
وفي طريقنا تعرضنا الي مخالفه مروريه بسيطه الا ان الطرف الثاني كان شرطي برتبه لواء اصر علي اخذنا الي مكتب المرور وفتح بلاغ
حتي تلك اللحظه لم اكن افهم الاجراءات القانونيه في مثل تلك المواقف وفي بالي فقط مخالفه مروريه صغيره لم تتعرض فيها اطراف اخري لاي اضرار حتي الطرف الثاني كبير الرتبه
مخالفه مروريه يمكن حلها في مكانها بعبارات مثل (ياخي تاني مره خلي بالك ) (واستخدام الطريق لك ولغيرك)
او حتي تطبيق القانون واصدار مخالفه ماليه كما هو معروف وحاصل
ما ان وصلنا الي مكتب المرور برفقه حرس تلك الرتبه وعلم افراد الشرطه بالامر حتي تسارعت الاحداث
بصوره دراميه واصر افراد شرطه المرور علي ادخال صاحبي الي الزنزانه الملحقه بالمكتب واخذ جواله
وبطاقته الشخصيه والرخصه طبعا
ولا اريد احبتي ان آخذكم معي الي الزنزانه فهي مكان اجاركم الله لا يصلح مرقدا للبهائم
وهو في حد ذاته عقوبه قاسيه تتعتدي ضرر المخالفه الي ابعد مدي
تعرفوا انا لسه ما دخلت ليكم في الموضوع
المهم اعتبرنا الامر عادي في وطننا اعتاد فيه الناس ان يستأسدوا علي بعضهم بعضا ويظهروا عضلات مكانتهم متي ما سنحت لهم الفرص .. ففضيله الكلمه الطيبه والمعامله الراقيه نادره الوجود اذا لم تكن معدومه
ندخل في الموضوع العذبني والمربوط بي حبل قوي بالاحداث الفوق دي
قلت ليكم دخلوا صاحبي في الزنزانه حتي عرضه علي الضابط الاعلي وتسليم اوراق المخالفه او القضيه
(عملوها قضيه)تسليمها الي وكيل النيابه كما اخبرني عسكري الاستقبال
ومفترض انا الضيف الذي لا يعرف حته في بورسودان ان يقوم بتلك الاجراءات والجري لوكيل النيابه
وهمي انو الراجل ده يطلع من المكان داك فهو يستحق الشكر الكبير والتقدير وكتر خيرك وما عدمناك
وانتابني احساس (انت السبب !!!!!! انت السبب )
المهم تسارعت خطواتي وانفاسي للقيام بكل ما يساعد علي فك اسر صاحبي
- (اسمع يا اخونا ) حندخّل ليك الاوراق دي للضابط بعد داك حتوديها لي وكيل النيابه)
يقولها احد افراد شرطه المرور بالمكتب
- (طيب ما تدخلا لي الضابط عشان نكسب الوكت يا اخوانا والله انا ضيف وعلي سفر) اقول انا واضغط علي اسناني من المغصه
- ( جنابو لسه ما جا) يقفل العسكري باب الحوار
المهم ظللنا علي حالنا هذا قرابه الساعتين صاحبي في ذلك المكان الكلمتكم عنو وانا بجانبه في الخارج يفصل بيننا فقط السياج الحديدي
ونحن علي تلك الحال جاء عسكري مناديا ( يلا يا حبيب عشان تمشي للنيابه تخلص الاوراق دي)
قالها وهو يرمي الاوراق في يدي دون ان ينتظر ردي
وجريت وراهو ( يا جنابو يا جنابو... النيابه دي وين ؟؟؟؟ ومنو مفروض يودي الاوراق انا ولا انتو )؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
( يا عمك ممكن نوديها ليك بس اطلع لك بي عشرينايه كده !!!!!!!) قالها وهو يلتفت يمينا ويسارا
(العشرينايه دي كم بالظبط ولي شنو ؟؟؟ تساءلت انا بكل براءه الدنيا
(يا حبه انت عايز تخلص موضوعك وتطلّع زولك ده ولا عندك كلام تاني ؟؟؟ بعدين القروش دي لزوم المواصلات من للنيابه وبالعكس ) يقولها وهو مازال يلتفت
(وتلفت الي زولي داك وهو محبوس علي ذمه راجل مسعول كبير قرر في لحظه قرف او تسلط انو يحبس ليهو واحد لا يعرف عنه أي شئ ولم يتضرر منه في حاجه
(خلاص يا جنابو دي العشرينايه عشان تركب بيها المواصلات ) اقولها و انا امد اليه القروش
وعيني فيهو يا اخوانا اشار الي احد العربات الخاصه وركب فيها وشتت
وتركني متمحّن !!!!!!
هسه يا احبتي العشرينايه دي تستاهل بيع الذمه والضمير وتستاهل ان تقف معها امام الكاميرا وتتصور ولا يطرف لك جفن
مفترض انو العمل ده حقو وهو ما يتقاضي راتبا مقابله
طال انتظارنا ساعه اخري قبل ان ياتي ذلك العسكري وهو يحمل قرار النيابه ( ان ادفعوا الغرامه الماليه واخرجوا ذلك الرجل واعيدوا اليه حريته )
ودفعنا وطلعنا ،،،
وعسكري المرور ما زال خلفنا حتي باب السيارة ممنيا نفسه بي عشرينيه اخري
وقبل ان اقفل باب العربيه ادخل وجهه معنا داخل العربيه صائحا (يا عمك مل تطلع ليك بي عشرايه كده لزوم خروج صاحبك ده)
وخطر لي ان اقفل الباب في وشو الا اني تذكرت تلك الزنزانه وتلك الوجوه ومشوار النيابه والعشرينيات الاخري
ولعله لاحظ ضيقي وقرفي فاخرج وشو من العربيه وادار لنا ظهره وانطلق لوليمه اخري