مناي في الدنيا..... سترة وبيت
وأصل البيت حنان وأمان ...مودة وريد
محال البيت يكون بس طين ...وزنكي وحيط
ولا ممكن يكون سكر وصلصة وزيت
كلام البيت كلام تاني ....
... ...
كلام إحساس مقدس وشرع رباني ...
وريد إنسان , عزم وإختار
فتح باب قلبو .. لمّاني
بني العش الصغير ....طمّنّي آواني
****** *********
وبيوت الدنيا مختلفات ... ما كل البيوت واحد
في بيت داااافي , وبيت باااارد
وبيت عمران هوي وتحنان ... وبيت جااااامد ...
بيوت مليانة فرحة وحب ... وخير وأمان
بيوت عدمانة من الود ... زمن مسكونة بالأحزان
بيوت زاهية.. وبيوت واهية
بيوت تديك سلام ووئام
عشان فيها النفوس صافية
وفيها التقوى والإيمان..
***********
بيوت متروسة مال وأثاث
وخالية من الأمل والناس
بيوت لا لمبة لا بوتوجاز
وناسا لطاف حنان ولذاذ
في بيت عالي ... وحوشو كبير ... وليهو غفير
وسيدو وزير
وبيت من طين وفي راكوبتو بس فد زير
ورغم الساكنو زول مسكين
بس حقاني ... عندو ضمير
**************
بيوت البهجة عنوانا ... وطول اليوم ضحك وهزار
بيوت طوالي حرقانة
مولعة زي تقول من نار
بيوت بتراعي حق الجار
وفيها من الخيار أخيار
بيوت لا بتعرف الجيران ولا بتستطلع الأخبار
بيوت تمليك .. بيوت إيجار
وما بتلقاها بالهين.. ولازم تكرم السمسار
وشوف في سكة كم بيت ؟ ... في كل البيوت أسرار
************
في بيت مسكون ... وبيت فاضي
وبيت جاحد ... وبيت راضي
وبيت مشكلتو معروفة , ووصلت محكمة وقاضي
عشان عشرة سنين هانت ...وكل واحد بقى في وادي
**********
في بيت حداي مدادي ...
بس ما فيهو غير اثنين
وبيت مليان ... تقول نادي
*************
في بيت سكانو متآلفين علي الحلوة وعلي المرة
وبيت سكانو مختلفين وما بتفقوا بالمرة
فى بيت ستو مرة ضيفان ... مرة سترة
ما بتستاهل الهجران , ولا بتستاهل الضرة
وبيت ستو دوام بتباري في النسوان
لا بتعرف تكرم الضيف ولا بتورق الخدرة
***********
في بيت محروم من الأطفال ...
ومن ضحكة عيون حلوين
وكل يوم ناسو عند دكتور اتعابو مليونين
وبيت أطفالو زي عشرين ومحتاجيين
وحق كراسة ما لاقيين
بس عايشين علي الله ...
وما قادرين يسدوا الدين..
وناس تانين مرتاحين
وهم في الدنيا ما شايلين
**********
وياما ... وياما ... تلقي بيوت
بيوت صاخبة ... وبيوت لا ليها حس لا صوت..
وكل ناس البيوت بتموت..
ويبقي البيت شبر واااااااااحد..
وبكرة تكون بيوتنا قبور..
لا هم موية لا هم نور..
وبيقي منانا في الجنة..
وننسي حكاية السترة وحكاية الريد..
كأننا لحظة مااا كنا ...
ولا فتشنا يوم عن بيت..
حليل البيت ... وهم البيت..
وناس البيت..
حليل الدنيا بالفيها وكل الفيها..
لا ماليها لا مكفيها !
الأحد 23 ديسمبر 2012, 10:55 am
