الشوق للبلد

عدد المساهمات : 1064 تاريخ التسجيل : 01/09/2010

بات قريبا يا ابى ..بات قريبا ان اقر برؤيتك الحبيبة ..الى الصباح المشرق على صوتك والى سماع ضحكتك المميزة ...اشتقت الى اتكائتى بجانبك ..الى انحشارى امامك فى السرير ورائحة سيجارتك تذكم انفى وانا احتج فتستجيب باسما ..واجمل لحظاتى وانا آتى على اطراف اصابعى استمتع بمنظرك وانت كلك حضور مع عبدالحليم حافظ تترنم بى سواح ..او غيابك عن الحضور انصهارا مع ام كلثوم..الله عليك..يا ضل الضحى..يا نسمة سلام...ولكم سالنى عنك رمل الطريق ولكم اوحشته خطاك مرارا..وانت اقرب الى من حبل الوريد وحضورك ساكن خلايا الروح
لا ادرى لماذا يتجهجه ثباتى وصبرى وينماث قلبى كما تنماث الطير هل هى لحظات ما قبل اللقاء؟؟؟؟غدا نلتقى باذن الله وامتع ناظرى بالبلد واهل قريتى الحبيبة ..وياااااااااااااالله على الليل فى البلد ...ويا سلام على الشوق للبلد

عدد المساهمات : 604 تاريخ التسجيل : 16/01/2011

يـا قمـره ... صبـي السنسنـي الحمـره
شوفي أبوي أنا الراجاهو كلـو صبـاح
يا زينوبه أبوكي هو أصلو حالـو بـره
لو قاري العلم هـو ولاهـو سيـد خبـره
ومو زول غربه لكن الظروف جابـره
مالو إن كان صبر كل الخلوق صابره
والصابـرات روابـح لــو يـجـن قـمـاح

هو أصلو متين نساكم يُمة شان يطـره
بيـتـنـفـس هــــوا ذكــراكــم الـعــطــره
رهيـف إحسـاس حنيـن قلبـو بالفطـره
نديمـو بقـت دمـوعـو الديـمـه منقـطـره
وأصلـو إن مـا قعـد بينكـم ولا بيرتـاح

جاهـو العيـد كمـان زاد القليـب حسـره
سـاد العـبـره حلـقـو ونفـسـو منكـسـره
هـو لا لـمّ القـروش لا حصـل المسـره
بلد ما فيها زول مات مـن عـدم كسـره
فراقكم ليها يا أحبـاب ولا كـان صـاح

يــا أمـارتــي الـمــا طـاعــت الأمـــره
ندمـانـي وبـقـت محـتـاره فـــي أمـــره
بـعـد قـسـن الــدرادر قـصـرن عـمــره
الشـوق فـاض وعماهـا الحنيـن غمـره
الـشـوق للبـلـد لـــي بهـجـتـه وسـمــره
الشـوق لــي مقـيـلا ضــم ضــم تـمـره
الشـوق لـي حديـثـا ضــم ضــو قـمـره
الــشــوق لـلـبـلـد جـابـريـتـا وكــكـــره
كان الشوق يخفـف والله يبـرى جـراح

مـشـتـاق للحسـيـنـاب أسـقــه وبــكــره
مشـتـاق للقبـيـل إتـربـوا فــوق حـكـره
مشـتـاق للـدمـيـري ومـويـتـه الـعـكـره
مشـتـاق للجـزيـري وتـشـقـه وهـكــره
مشتاق لي قطع بحـره ودخـول وكـره
مشتـاق لـلأبـي يـفـارق الـفـؤاد ذكــره
مشـتـاق للعـلـى مـشـغـول دوام فـكــره
مشتـاق للصبـاح ديـدن غنـاي شـكـره
وياريت كت بقدر أسوي شوقي جناح

أمانة : سلامي كتير لابن عمي العزيز عبدالكريم
وقولي ليهو أمين بقول ليك تذكر العصرية ديك .. لما دخلتو في أضافري ؟؟؟؟؟؟؟؟؟؟؟؟؟؟؟؟

عدد المساهمات : 719 تاريخ التسجيل : 25/05/2010

[ لك التحية الاخت الدكتورة علي هذه الكلمات والاغنية الرائعة وربنا يلم الشمل عن قريب والله كويس الاخ الامين طلعت شاعر وانحنا ما عارفين والله قلوبنا معكم وربنا يلم الشمل بالاهل عن قريب
with

عدد المساهمات : 1064 تاريخ التسجيل : 01/09/2010

تسلموا كتير عم الامين والاخت وصفية
راجين لليل الغربه ينتهى ويشرق نهار اللقيا
امانتك وصلت تب باذن الله
[ندعوك للتسجيل في المنتدى أو التعريف بنفسك لمعاينة هذا الرابط]

عدد المساهمات : 237 تاريخ التسجيل : 01/07/2010

العزيزة : نضار
وزي ما بيقولو دربك مرق والحمد لله وسترتاحين من ويلات الغربة في الأحضان الدافئة
الوالد والوالدة .. حفظهم الله لك .. وأمد في أعمارهم .. واليك نهدي الأبيات :

عامان قد مضيا فطال البعد والصد
وهاج الشوق في نفسي اليك اليوم يا أبتاه
**
دعتني غيرة الحب فجئتك لاهثا أعدو
ففي أحضانك آيات وسحر الرب لي يبدو
**
أجيب القلب يا أبتي كفاه الشوق والوجد
فكم في القلب آلام وريح الشوق تشتد
**
سنأتي نزرع الدرب فيكسو دربنا الورد
رحيق الحب يروينا يعود الود والعهد

***********************
ووقفا علي الأطلال .. وربوع مراغة والأهل
نقف علي رائعة أمير الشعراء :
يا جارة الوادي طربت وعادني ما يشبه الأحلام من ذكراك
مثلت في الذكري هواك وفي الكري والذكريات صدي السنين الحاكي
مراغة ردتني اليك من النوي أقدار سير للحياة ذراك
لا أمس من عمر الزمان ولا غدُ جمع الزمان فكان يوم لقاك
انت الخيال بديعه وغريبه الله صاغك والزمان رواك
وتحياتي

عدد المساهمات : 1064 تاريخ التسجيل : 01/09/2010

ابو احمد شاكرة ليك مرورك الانيق ومواساتك الجميله الدافئة وابياتك التى مست دواخلى..والحمدلله انى لم اعش غربة مثل غربة الاخرين اذ كنت لى نعم الاخ والمعين وكنت محظوظه اذ انعم عليا باختى الغاليه واخوانى النزير وعوض ومن الغاليين عليا اللذين ساندونى فى خلال اعوامى هنا وكانو خير معين وخير اخوة ولهم فضل عليا واود عبر هذا البوست ان اشكركهم جدا ومن لم يشكر الناس لم يشكر الله فلهم الود كله والتحية والاحترام الاخ العزيز عبدالله حمد الاخ الموقر وصديقى المقرب عبدالفتاح يعقوب والعزيز جدا قاضينا صابر واالاخ العزيز حيدر ابراهيم له تحية خاصه جدا منى والاخ الموقر الاب الروحى الذى دعمنى بسؤاله الدائم وتقديم يد العون مالك محمد حسين وابناء العمة الحنونين جدا يوسف وقوى جزار ...شكرا لكم جميعا على ما قدمتموه وربى يجمعنى بيكم فى ساعة خير ونتلاقى فى الخير وبالخير يارب ..وحقيقة كان دافعهم اكيد انهم محبون للخيرواخوتهم صادقة والجميع يذكر ابى بالخير ومساندته وصداقته معهم واظنى احمل شوقهم جميعا اليه والى البلد..[ندعوك للتسجيل في المنتدى أو التعريف بنفسك لمعاينة هذا الرابط]

عدد المساهمات : 466 تاريخ التسجيل : 24/01/2010

ما اروع الكتابه عن هؤلاء يا دكتوره

اكتبي عنهم ودعي الكلام يفرش لك طريق العوده من هنا حتي حله العمد

والدنيا عصاري والاستاذ العزيز يخرج الكرسي العتيق ويضعه ضهر بيتكم من جيهه شرقا والطربيزه وصباره المويه تلم كل الاحباب القاشي والماشي

يجلسون حول الاستاذ لتنطلق الحكايا و الضحاكات تملأ الشارع

والشمش من خلفهم تسقط حبه حبه حتي تختفي وسط الحلفا وتغيب ولكن الحكاوي لم تنتهي والصباره ما زالت بخير

ربنا يخليه عمي العزيز وابتسامته العذبة

عدد المساهمات : 1064 تاريخ التسجيل : 01/09/2010

ياسلام يا اديب ربى يديمك لينا وسردك الحبيب الى القلب...قعدة ابوى بره دى ليها طعم ومذاق خاص وفيها قيمة اجتماعية كبيرة جدا ولمتهم فى الجبنه والشاى والضحكات تتعالى ويكورك يا بت ارفعى كراسى ونمد ليهو الكراسى بى الحيطة وتلقى بعضهم قابع على برش الصلاة والاخر متكئ متوسد يده ياااااااااااااااا الله على البلد وناس البلد
.ميشو تشكراتى حبيبتى على كلماتك الطيبة ربى يطول فى عمرهم ويحفظهم

عشان تعيشوا اللحظة مرتاحين ونفسياتكم مستقرة وتخلونا انحنا برضه عايشين في حالنا بدون هموم وذكريات منغصة ... خلوا الذكريات الحلوة وخلونا نتناسي عشان نمشي حالنا

وقولوا يالطيف

والله يادكتوره بكيتينا

عدد المساهمات : 1064 تاريخ التسجيل : 01/09/2010

عزيزنا ماهر ..سبب كتابتى هذه الخاطرة انى حلمت بابى وهو يضحك ولم تفارقنى ضحكته حتى ساعات الصباح المتاخرة واتصلت اذا هم بخير وصحة والحمدلله ..وسرحت وتجولت بخيالى فى بيتنا والحلة واسترجعت اللحظات الجميلة وهى فعلا زكريات حلوة وطيبة ومحفورة فى الوجدان
شكرا لمرورك الانيق(عارفاك قربت تبكى بالحنين والشوق)
العزيز الباقر انها الغربه والاحتراق بعدا ..عندما شددت رحالى قبل 28 شهرا من بيتنا الحبيب بمراغه تركت روحى وقلبى وعقلى هناك ..سبحان الله واتيت ولم اكن ادرى بان مساحة كالطود تفصل بيينا ورغم ذلك هناك تواصل ولكم سرى طيفهم فى المنام يؤرقنى..والان وانا اشد رحالى اليهم ..يعذبنى فراق من كنت معهم هنا وبذات النار احترق وهاانذى اترك روحى وقلبى هنا ايضا واسافر على امل اللقاء ..هى الدنيا سبحان الله..هل كتب علينا الشوق اينما حللنا ؟ واينما ذهبنا ؟
ولكن نرجع نقول مافى احلى من البلد ولا حضن ابى الدافئ ..ساعات تحضرنى حادثة كانت تتكرر كل شهر تضحكنى وتبكينى فى نفس الوقت ..ابى ياتى الى وانا انتظر المواصلات ذاهبة الى العمل (موظفة براتب) ويخاطبنى نضار عندك حق المواصلات؟ ..ثم يبادر باعطائى نقودا ..هم الوالدين هكذا نظل عندهم صغارا ويظلوا يحملوا همنا
الدموع رحمة اخى الباقر وهى تنقى الدواخل كن بخير

عدد المساهمات : 43 تاريخ التسجيل : 25/05/2011

تصلي بالسلامه يادكتوره ونسال الله ان تجدي جميع الاهل بخير وتحياتي لعمي عبدالكريم

د. نضـار
والأهــل
سلامات
ونمشي ونرجع للبوست دا .. حيث بوح الدواخل الصادق
وان شاء الله تتلمي-ويتلموا- على الأهل وتشوفي الوالدين بخير وعافية ورضا

وواصلي السرد الجميل المعتق بتمنية وعشرين شهر ..
ولا تسمعي لشكاوي ماهر
ووصالي حتى ينسكب ما بدواخل ماهر من زمانات جدة ومرورا بكل المحطات ديك
وحتى متي .. الله اعلم
ودمتم بخير
والله يجيبك بالسلامة
وتعيشي مكرمة ومرتاحة مع الأهل

عدد المساهمات : 161 تاريخ التسجيل : 17/04/2011

كلام جميل جداً جداً ومعبر ويحكى عن حياة وعن اللفة واشتياق وكانت لحظة صدق منك الاخت نضار
وكلمات معبرة يمكن لاى رسام ان ياخذ ريشته ويرسم لوحة تجسد الموضوع من وحى الكلام لكى التحية
وللوالد كل الود والتقدير فهو اب للجميع وزعيم روحى للشباب وصاحب ضحكة مميزة سلاااام للبلد وللعمده

شُـــوقـِـى أنـَـا لـِـى الـبـَـلـَــدْ بــِى حـَـالـَـه والــشُّـــوقْ لـِـى الـتـَّــرَابـْـلـَـه أهـَــلـِـى
مَــغـَـسْــتـِـى أنـَـا لـِـى شَـــقــَــاوْتـِـى رَحَــلـْــتَ سَـــاكـِــتْ مَــا قــَـعـَــدْ قــَـبــَـلـِـى
سَــاكـِـــتْ مَــا صَــبــَـــرْتَ قــَــعَــــدْتَ وسْـــــط أحـَــبــَــابـِـى وسْـــــط أهـَــــلـِـى
قــُـمْــتَ شَــــلاقــَــه بـَــسْ سَـــافــَــرْتَ جــِــيـــتْ لـِـى الــغـُــرْبــَـه والــهَــمَــلـِـى
أغـَــرَانـِـى الــسَّــفـَــرْ وأحْــوَالـُــو ...... كـَــانْ شَـــايــِـلـْــنـِـى عـَــادْ جـَــهـَــلـِـى
دَحـِـيــنْ أرْقـِـى الــشَّـــرقْ يـَـا حـِـلـِــيــلـَــه كـِــيــفْ الــشُّـــورَه كـِــيــفْ حـَـــلـِّـى
إتـْـذكـَّـرْ كـَـوَاريــكْ لـَـيـْــلـَى لــِـيــكْ يـَـا شَــادْيـَـه قــُـومـِى تـَـعَــالـِى مـِـنـْـسَــلـِّـى
شـِـقــِّـيــِـشْ كـُــتــِّى نـَــانْ ويــِـنْ طــِـرْتـِـى هـَـــاكْ شـِــيــلـِـى الــفـَــطـُــورْ دَلـِّـى
فـَــتـِّــشـِـى دَانْ صَــفــِــيـــحْ الــمُــويـَـــه شُـــوفـِـى بـَــكـَــانـُــو ويــنْ شــِـيــلـِـى
سَــــوِّى قــَــدُرْ قــُــدُرْتــِـكْ فـِــيـهُــو .......... نـَـاصـِـصـِـى إنـْــتـِـى لا تـَــمْــلـِـى
أوْعــِـى الــعــِــدِّى مَــا تـَــنـْــســِــيــهَـــا ...... والــوَاقــُـــودْ تـَــقــِــيــلْ خـَــلـِّـى
عَــشَــانْ أنـَـا مَــاشـِـى أخـَـرْتْ الـلـُّـوبــِى بـَـمْــشـِـى أغـْــشَــاهـُـو بــِى عـَـــدَلـِـى
نـَــضِّــفـِـى عـِــيــشْــنـَــا لـِـى الــطـَّـاحـُـونـَـه بـَــسْ لامَــنْ يـَـجــِـيــكـِـى عـَـــلـِـى
عَــشَــانْ هُــو أبـُـوكـِى مَـاسْــكْ الـمُــويـَـه قــَـالـُّــو أمـِـشْ الــطـَّحـِـيــنْ بـَـــدَلـِـى
مَـا شُــفـْــتـِــيــهُـــو كـِــيــفْ يـَا شَـــادْيـَـه قــَــالاهـُــو الــسَّـــمُـــومْ دِى قــَـــلـِـى
مـِـنْ قــُـومْــة الــصَّــبـَـاحْ لـِـى الـغــِــيــبـَـه صَــالاهـُــو الــهـَـجــِــيــرى صَـــلـِـى
مـِـنْ بـَــعـْــدْ الــتـَّـعَـــبْ يـَا الـلـَّــه ......... زيـــدُنْ فـِـى الــهَـــبـُــوبْ مَــهـَـــلـِـى
دِى سَــاقـْــة ً لا شـِـــدَرْ لا غـِــيـــمَـــه عـَـــدْمَـــانـِـى الــضِّـــلـِــيـــلْ سَـــهـَـــلـِـى
مــِـتــِــيــنْ أرْجـَــعْ وأعـُــودْ يـَا الـلـَّــه ........ لـِـى قــِـيــزَانـَّــا لـِـى هـَــجـَـــلـِـى
أنـْـــزلْ فــُــوقْ قــِــشــِــيـــشْ الـــسَّـــابْ أحـُــشُّــــو وأعـَـــدِّمُـــو الــسَّـــبـَـــلـِـى
وأشـِــيــلْ طـِـيــبـْـة الـجـُّـرُوفْ فـِـى إيــدَيْ أنـْــشَـــط ْوتـَــبْ يـَــرُوحْ كـَــسَـــلـِـى
وأزَغـْـردْ فـِى بـُـيـُــوتْ الــطـِّـيــنْ ......... والـكـُـونْ كـُــلـُّـو يـَـبْــقــَى أهـَــــلـِـى

عدد المساهمات : 237 تاريخ التسجيل : 01/07/2010

حمد الله الف علي السلامة
وكيف حالك ووجدت الأهل .. وهنئيا لك وجودك في أخضان الوالدين
ووسط الدفء والحنان .. وفرحة الأهل
*****
تحياتي والأسرة الكريمة والأشواق .. وحمد الله الف علي السلامة

موضوع: رد: الشوق للبلد الخميس 14 يوليو 2011, 7:23 am

الدكتورة الغائبة في احضان الاهل
هنيئا للاهل بقدومك...وهنيئا لك بشوفة الاهل...وهنيئا للبلد بالزيارة التفقدية العملية من تمثيل عالي للمنتدي

ونحن في انتظار التقارير والمشروعات الخيرية المفيدة من الدكتورة

ونقول يالطيف

عدد المساهمات : 604 تاريخ التسجيل : 16/01/2011

حمدا لله على سلامتك وسط أهلك (مين زيك) حاسدك والله .
عشان كدا الله يرزقك بعقد عمل ممتاز وعاجل جدا لا يبقيكي أكتر من أسبوع في البلد.
قولوا آمين يا ناس المنتدى
.

عدد المساهمات : 719 تاريخ التسجيل : 25/05/2010

حمد الف علي سلامة الدكتورة وعقبال ليك الاخ الامين تجي وتصوم معانارمضان في هذا الجوء الحار عشان تكسب معانا اجر كثير لان رمضان عندكم ما زي رمضانا جوكم بارد وما بتحسوا بالتعب لذلك اجركم شوية تعالوا اتقاسموا معنا شوية ولكن اكيد ما بتتحملوا زينا لاننا خلاص اتعودناعلي جونا الحار وكل سنة وانت والاسرة طيبين

جانا الخبر شايلو النسيم
فى الليل يوشوش فى الخمائل
هش الزهر بكت الورود
وسالت مشاعر الناس جداول
رجع البلد
بعد السنين المره
يادوب العيون سهرن هجد
ياحليلو مارجع البلد
وعيونا ما سهرن هجد
فى عيونو شوق فاض
انهد لحب للناس للوطن
ماغيرت ريدتو السنين
ومابدل احساسو الزمن
شفنا المشاعر الحلوه
فى ساحاتنا بى الامال مشن
انت ما نسمه فى الهجير
انت ما راحة ضمير
انت ما بهجة مشاعر
انت ما رحلة عبير
انت ماياكا الامير
كيف نسيبك تمشى تانى
وانت نورة البلد
العذاب فارق طريقنا
والعيون سهرن هجد

1000 حمد لله علي سلامتك

موضوع: رد: الشوق للبلد الخميس 14 يوليو 2011, 1:11 pm

حمدلا علي سلامتكي يادكتوره وسط الاهل والله حاسدنك كما قال الاخ الامين
سلامي الحار للوالد وجميع الاهل وسلام خاص للاخ عماد عبد الفادر والاخ صالح عبد الحي وبالله طمنيتا عليه وسلام ايضا للقامه اشرف غبد القادر

موضوع: رد: الشوق للبلد السبت 16 يوليو 2011, 10:40 am

تحياتي
حمدلله على السلامة
وفى امان الله

عدد المساهمات : 161 تاريخ التسجيل : 17/04/2011

حمدلله الف على السلامة ... وبى شوق جيناك يا بلد

تلك أوطاني وهذا رسمها
في سويداء فؤادي محتفر
يتراءى لي على بهجتها
حيثما قلبت في الكون النظر
في ضياء الشمس في نور القمر
في النسيم العذب في ثغر الزهر
في خرير الجدول الصافي وفي
صخب النهر وأمواج البحر
في هتون الدمع من هول النوى
في لهيب الشوق في قلبي استعر
دقة الناقوس معنى لاسمها
واسمها ملء تسابيح السحر
...........................
يا بلادي أرشفيني قطرة
كل ماء غير ما فيك كدر
ليت من ذاك الثرى لي حفنة
أتملى من شذا الترب العطر

عدد المساهمات : 719 تاريخ التسجيل : 25/05/2010

الي كل اعضاء المنتدي وصلت الاخت الدكتورة نضار الي الديار بالف سلامة فهي بخير وصحة جيدة واتت الينا وهي ما بتقصر ربنا يديها الصحة والعافية ويلم شمل البقية

الاخت الدكتوره نضار تحياتى.
ألف حمدلله على السلامه ونتمنى لك اقامه طيبه بين الأهل.

يبدو ان الدكتورة طاب بيها المقام فأناخت حملها لاندري الي متي
مهما يكن واينما تكون نحن في انتظار تواصلها مع الحوش العامر

ونقل يالطيف

» الشوق للبلد