سيناريو اليابسة - رائعة الشاعر عاطف خيري

عاطف عوض خيرى
** شاعر متمرد علي كل الأنماط الشعرية السائدة في الوسط الشعري
له من المفردة غموضها ووضوحها في آن واحد.

1/ من مواليد مدينة كريمة فى العام 1969م بحى وسط جنوب .
وعرف باشتغاله بالهم العام والعمل التطوعى .
2/ درس جميع المراحل الدراسية بمدينة كريمة.
3/ تخرج من معهد الموسيقى والمسرح قسم الدراما.
4/ التحق بجامعة القاهرة بالخرطوم بقسم اللغة العربية كلية الاداب ، ودرس حتى السنة الثانية ولم يكملها وذلك لعشقه للدراما والمسرح فتفرغ للدراسة بالمعهد.
5/ كتب العديد من القصائد منذ ايم صباه الاولى فى مدينة كريمة وتنوع فى الكتابة من الفصيح والعامى والدارجى .
6/ تغنى باشعاره العديد من الفنانين كان اولهم الفنان عبدالعظيم منصور ثم الفنان صديق احمد والفنان مصطفى سيداحمد .
7/ هاجر الى استراليا وقام مع مجموعة من الموهبين السودانين هناك بانشاء وتأسيس اذاعة مازال يعمل بها.
8/ كون ثنائيا رائعا مع الفنان عبدالعظيم منصور ، ثم الفنان مصطفى سيداحمد.

سيناريو اليابسة رائعة الشاعر [ندعوك للتسجيل في المنتدى أو التعريف بنفسك لمعاينة هذا الرابط] [ندعوك للتسجيل في المنتدى أو التعريف بنفسك لمعاينة هذا الرابط]

الهدهد:
مخدوش الفضا
طويل الحزن مفتول الحنين
مصاب بالديانات والشرود
نوح:
يبلغ من الطول مسافة يشتهى الغرقان شهيق
لونو زى سرك تكلمبو الصديق
أمو تتوحـّم على طين البحر
قبال تقابل والدو صدفة على الطريق
عمرو ستة شهور حِلِم
إنو الأرض مسجونة فى موية وكل الناس مراكبية
اليابسة فِركة مدخورة لى يوم فيهو ساير النيل
قطـّاع رحط كل الجزاير
والبنات البفتحوا الباب للمطر
وأنا جدولك شارف على كل الجداول الصاحية فيك
والغباش فى دمى منك
لو كسر ضلعين عذرتو
لكن نهر كل العصافير البتلعب فى الوريد
وفنـّاكى جواى زى حجر
والبينـّا ما فات الدوائر
الليل خِمار القمرة مجدوع فى الفراغ
والرقصة لى البت فينا
فوق كل المسامير الندقها فى البساط
والرياح حكـّامة بى دلوكة مرّقت الشياطين منها
إتجنن فقير الحلة دقيناهو بى نفس السياط
كل المجرات النيازك والشُهُب
ودع راميهو الله على السما
والدنيا زار
ويا هدهد هنا مرت مراكب نوح
محملة بالبخور
مين اللى شال من طاقة الطين البعيدة
قنديل حبيبتى وطيـّب الجرح المثير
مين السرق من بابا مفتاحو الملون والصرير
منهوبة مقبرة الفواكه فيكى
قولى معاى يا شرف القبايل جر
الشاف تباريح الطلح فى النار
شافنى مرقت من عندك ضرير
أنا ليه تجينى الموية حفيانة
وأدنقر ألبِّسا شبط أخضر
وأبيت مبلول وأصلِّح فى الرباط
أنا ليه شبابيك البيوت الواجمة والناس البُساط
وليه يرجانى النخل
فى السكة يفتح قلبى خمارة وخلاوى
وبيت بكا
تعبت من المساسقة والهتاف ياغيمة
أتبنى جبهة القمرة
السهر والحمى طول الليل تهضرب
ويا هدهد لقيت أمك
ترشرش فى السعف من عينها
وتجبر خاطرا المكسور عليك
ينكسر خاطر السعف فى إيدا
يا هدهد قيام
من السما الأول قيام
من السما السابع قيام
وأنزل مسافة تهبشك غنوة وأناولك كاس
ومرت مراكب نوح محملة بالملوك
ركعت على الموج الجنود
من كل جندى تفوح ضحية
ودم مشتت فى الأبد
دسيت جبهتى من السجود
بكى فى مخاض الخوف ولد
إشتبهوا فينى ورا الجبل
شافونى دسيت الهداهد بالزبد
صفا !
إنتباه !
وقعت من الهدهد بلد
نهبوها وإتقسموا الحدود
ومرت مراكب نوح محملة بالطيور
واقف مع نوح الغراب
ينضم ويأشر فى إتجاه
باقى الطيور يتوسوسوا
إلاّ الحمام إتوضا مارق للصلاة
القانقرد فى حزنو يغزل شاله من صوف
الطواويس شارّة قمصانا المزركشة فى الضحى
الزرازير بى عراريقا المغبشة جات على
أرجينى يا صالحة !
ومشيت فى الموج
يا النبى نوح أصل سالم
يا النبى نوح أصل
حجر الدُّغُش فى الموية يقلع ضُفرى
يادم !
ده ما وكت الرسم واللون
وجات المغارب حننت إيدا ومشت
سبحانك الأديتنا من حزنك فوانيس
ــ الغراب يا نوح طفش
واليابسة وين ؟
يا الله ما يابس سوى حلقى المجرح بالدعا
طير يا حمام !
ـ الحمام يا نوح يجامل فى السما
وبيّاع مناديل خضرا فى كل العصور
أنا ما خلقتك يا ظنون
شان تبيتى الليل معاى
وتجرى من فوقى الغُطا
ما تشُرّى فى حبلى الوساوس
والمعانى الداكنة والليل والشتا
الهدهد تميمة الموت
معلّق فى بيوت الناس نعش
من خرافاتن تعال
من دياناتن تعال
نفّض نعاسك من كل بيت
من كل حجوة حكوها عنك
فى الليالى الباردة والأطفال نيام
مين يشترينى من الملوك الخايدة فى الدم القديم
مين يوصف بيتنا لى هدهد يتيم
مين النبى القادم؟
من مكة !
أو من دكة !
فى شارع حميم
مين اليوصف للنحل ريق الحبيبة
وحبة القمح التقوم فوق محفضة حبوبة
فى الزمن اللئيم
مزيداً من الطين يا إله
أبنى خوفى عليك ومنك
أبنى آخر بيت حرام
ومرت مراكب نوح محملة بالحجيج
ــ وين ولدك ؟
ــ تركتو على الجبل .
ــ وين بلدك ؟
ــ ضربتها فى مثل .
ــ وين نحن ؟
ــ مرقت على عجل .
يا نوح تخلينا
زيتونك مخلل بالشمس
نار الله والرِجل الغريبة
نحن البلاد الشاكية جرحها للصديد
جاتنا القوافل بالضجيج
جرتنا من حلبة رقيص
ورتنا كيف صلبوا المسيح
ورتنا كيف كتلوا الحسين
وبكينا أكتر منها
ساقتنا فى الآخر عبيد
مين يشترينى من الملوك
الخايدة فى الدم القديم
مين البوصِّف بيتنا لى هدهد يتيم
يا هدهدى المهدود
مين هدهدك نمت
كل الطيور غنت منك يجينى سكوت
مين الهداك للناس
أو هدّ فيك الموت؟
يا أوسم الجايين أنا قلبى حِلّة حنين
والشوق فتحنى بيوت
يا صالحة
لا جنبك لا فتّ منك فوت
دايماً معلق بين
بين الحياة والموت
أدخل ضلام الناس
نورك يجينى خيوط
وقبّال أقع فى الضو
جوّاك سندنى خِفوت
أنا برضى حلة شوق
لكنى فى التابوت
ومرت مراكب نوح محملة بالعبيد
الجنة زى هدهد معلقة فى الكتاب
ونحن العبيد
باب الحياة السرِّى
حرير فى فكرة الدودة الموجعة بالنسيج
وصيوان عزا نوح
المكفّن بالوعود
هدهد يرك فوق دفــّة المركب يدندن
الريح سكن خيمة حريمو الأربعة
النيل رجع فى اللوحة
للوادى القديم
البحار مكتوفة الأيدى
الشموس فاقت
ونوح بعاين فى مفاتن اليابسة
تغسل فى حصا ومتبرجة
سبحانك الأديتنا من ملكك سلاطين وإختفيت
هاك أنبياءك سالمين
وأنزل مسافة توجعك غابة
رقيصنا الحى
طبولنا
وليك شبال
من اليابسة الممشّطة بالملح
وهدهد

» طائشة الضفائر رائعة الشاعر الكبير نزار قباني
» فى معية الشاعر المتفرد ود الرضى
» حكمة رائعة....لمن كان له قلب فقط؟
» قصــــة التفاحـــة (قصة رائعة جدا )
» قصة رائعة ومعاني اروع