مزكرات زول مطرطش
مبارك الذي بيده الملك(1)
من مذكرات زول مطرطش:-
بعد حوداث حداشر سبتمبر مباشرة ...ركت الطيارة في مطار الاسكندرية قادمة من الخليج.... كنت شايل شنطة شبه سامسونايت..... ما عامل تاشيرة دخول لمصر....حسب النضم البسمعو اننا نحن اخوانا ومصر والسودان حتة واحدة.... سالت قبال اقوم ناس السفارة المصرية بالتلفون رد علي موظف وقال لي(تاشيرة ايه يا عم.... دا انت البلد بتاعتك تدخل وقت ما تعوز وتطلع وقت ما تعوز)....ركبت الطيارة وانا احلم بشاطئ الاسكندرية... نزلت وعلي شلاقتي كابست عشان اكون اول زول قدام ناس الجوازات في المطار... وبكل ثقة قلت لضابط الجوازات(ازيك يا بيه)...واحاول ان اتكلم مصري من الطراز الاول.. اخد الجواز واتحمدل لي السلامة وهو يبتسم....ا..قلب الجواز صفحة صفحة.... وقرب يقول لي لو عندك ورقة في جيبك امرقها...عشان يشوف التاشيرة.... قال لي(فين التاشيرة؟)... سالتو تاشيرة شنو؟ انا سوداني.... قال لي انا عارف انك سوداني... بس التاشيرة المن السفارة وين؟.... قلت ليهو ما عملت تاشيرة.... عاين لي قوووووووي... وقال لي طيب دقيقة..دخل جوا... وانا منتظر جا وقال لي اتفضل معاي...اتفضلت معاهو... دخلني مكتب سلمني لي واحد معاهو اتنين طوال عراض.... دا مرق ورقة وقلم وقعد ينضم... ويسال فيني.... عمرك؟ اسمك؟ اسم امك؟ اسم؟ البلد الجايي منو؟... ساكن وين في الخرتوم...؟...بعد شوية جا واحد شايل شنطتي في ايد وهديماتي في الليد التانية.... ونضم في اضان الزول براحة.... داك عاين لي وقال لي( يا نهار ابوك اسود)...جدع قدامو الحجاب ابو طبلة(حجاب معمول في طبلة ومجلد بي جلد)...الطبلة كانت مقفولة ... قال لي (دا ايه دا؟)..قلت ليهو دا حجاب ابو طبلة.... يعني ايه حقاب ابو طبلة؟... قلت ليهو دا حجاب بيعملوهو وبيحفظوهو في الطبلة دي..... قال لي طيب ممكن تفتح الطبلة دي.... قلت ليهو جدا...في اللحظة دي الناس الكانو في المكتب كلهم جرو برا المكتب.... وسمعت واحد بيقول للناس البرا ابعدو بعيد ابعدو بعيد.....كست للمفتاح في جيوبي كلها ما لقيتها...فتشت الشنطة فوق تحت ما لقيتها.... قلت ليهو الظاهر انا نسيت المفتاح عند اهلي هناااااك(واشرت بيدي بعيد علي الخليج)......قال لي ممكن طيب نفتح نحن الطبلة ونفك الجلد منها.... قلت ليهو ممكن... كونو لجنة من اربعة تنفار وكتبو في ورقة نضم كتير...وشرطو الجلد.. وظهر الحجاب... وقعد يقرا... اول حاجة قراها(مبارك الذي بيده الملك).... وتبعها بنهار ابوي اسود...الفكي الكتب الحجاب اتاريهو كاتبها غلط بدل التاء كتب الميم... وتاني نجوم ومربعات وبعد شوية قراء( من بين ايدهم سدا)... تاني برضو نهار ابوي اسود....وسالني (دا انت قايي عِدل ع السد العالي)... انت علاقتك ايه ببن لادن؟.... رديت عليهو ( فعلا نهار ابوي إسود)......يا راجل والله والله ما عندي علاقة لا بي بن لادن ولا بالسد العالي.. ولا بسيادة الريس.. ..احكي لك القصة ..قال لي يا ريت !احكي عشان ح توفر علينا وعلى نفسك كتير...وبصراحة... قلت ليهو بصراحة كدي..انا عندي ابكباس....قال لي(عندك ايه يا روح امك؟)..... نواصل غدا
قفل الباب:-
في المشي ما بنيش يملا قدمو تراب
السدير عالي وحجابك هلالن غاب
مسكك ابتسعة ساكن الجبجاب
علمو اهلي يكتبو لي حجاب