ملاح قرع وبامية مفروكة و كسرة و صحن سلطة و (ملاحة) ... ده كان الاكل في بيوت البكا قبل ان يصبح (البكاء ذاتو) مظهر اجتماعي ونوع من انواع (الفشخرة) بعد ان اجتاحت البلد اعداد مهولة من (المليارديرات الجدد) اصبحت تؤثر سلوكيا على بقية الطبقات الاخرى حتى صارت (الفاتحة) هي الفرق الوحيد بين الاتراح والافراح!
عندما توفي رجل الاعمال (حسن يورو) قامت اسرته بفتح ابواب (الفيلا) الفاخرة لافواج المعزين علاوة على (صيوان ) ضخم نصب بطول الشارع العريض مزود بعدد مهول من مكيفات الهواء تغطي ارضيته (السجاد) لزوم (عدم الغبار وكده)!
عند موعد الغداء انتشر افراد يرتدون زيا موحدا يحملون (صواني الاكل) النيكل الناصعة التى ترتاح بداخلها اطباق المشويات والمحمرات والمقبلات وقطع الرغيف الفاخر بينما وضعت امام كل صينية عدد من زجاجات المياه المعدنية الباااااااااااااردة!
في صالون النساء جلست سوسو (في الاصل ست البنات قبل ان يصبح حسن يورو رجل اعمال) جلست على سرير خشبي مستورد عليه ملاية قطيفة تتلقى التعازي من جاراتها وصويحباتها اللواتي جئن وهن في كامل زينتهن (ناقشات) الحنة الما خمج يرتدين ثياب (الشيفون) المطرزة و الشباشب ذات الكعب (البلية) تمتلئ اياديهن و رقابهن بآخر صيحات سوق الدهب في (دبي) وبقية العواصم الخليجية!
- كلمتي (عوضية ردحى)؟
همست (سوسو) لجارتها وصديقتها (نوسة) والتى مالت قريبا منها وهي تجيبها:
- والله (عوضية ردحى) دى قالو عندها مناسبة بكاء في (مدني) سافرت مشت ليها, قمت مشيت لى (هاجر حى ووب) قالو ليا عندها ارتباط خارجي في (دبي) في واحد من ناس الجالية مات هناك اها في الاخير مشيت كلمت ليكي (حنان سكليب) لقينا ما عندها ارتباط ووقعت مع مديرا اعمالا! واديتو مليون عربون مقدم.
- وشالت منك البيانات!
- اديتا ليها كووولها .. المرحوم كان شغال شنو؟ وعندو كم عمارة؟ وقاعد يتبرع لى ياتو (نادى) واشترى ليهم كم (لاعب)؟ وعربيتوالراكبا نوعا شنو؟ وموبايلو الشايلو موديلو كم؟
انتهت مجموعات النساء من تناول طعام الغداء الفندقي (الما خمج) ثم جئن لهن بالتحلية (باسطة وبسبوسة وكنافة وعين جمل وام علي) شئ باللوز وشئ بالجوز وشئ يالما بعرفو شنو داااك وبعد ان (ضربن) بدأن فى زحزحة الكراسى (البامبو) والجلوس كيمان كيمان (للشمارات) وهن يمسكن بثرامس الشاى (المذهبة) المتشابهة (الكبيرة حقت الشاى والصغيرة للجنبة) التى تفوح من (فناجينها) رائحة (المستكا)..
وفجأة دخلت الى الصالون شابة (آخر شياكة) ذات مظهر يطابق كثيرا مظهر مغنيات هذا الزمان يمشي خلفها ستة (شابات آخريات) من نفس الشاكلة يرتدون زيا موحدا وهن يرفعن اياديهن عاليا في حركات متتابعة ويصحن بصوت كالجرس يشق عنان السماء:
وووب ووووب وووووووووووووووووووووووووووووووووووووب ..
ثم تبدأ (حنان سكليب) فى السكلى و(الوصف) وهن يرددن خلفها:
ووووب عليا والله ليا يا حسن يورو يا البتدى البتدورو والما بتدورو
ووووب عليا والله يا صغير وجاهل يا البتجيب القروش بالساهل
يا ود امي.. هئ ئ ئ ئ ..
الكورس: وووب ...وووب...ووووووووووووووب
الليلة ياحليك يازين الرجال يا ملك الدولار يا البتستر الحال
الليلة يا حليلك يا البتشيل من البنوك وتشتت قبال ما يلحقوك
يا ود امي.. هيء يء يء يء ..
الكورس: وووب ... وووب ...وووووووووووب
الليلة وينك انتا يا الاسبليت هبوبك والهمر ركوبك
الليلة وينك انتا يا البنيت المقصورة وركبت النافورة
الليلة وينك انتا يا اب جيوب منفخة وأب عربية مصفحة
يا ود أمي.. هيء يء يء يء ...
الكورس: وووب ...وووب...ووووووووووووب
يا حليلك الليلة يا البتفك الصعيبة ويا البتسجل اللعيبة
يا حليلك الليلة يا جوكى البنوك يا التهريبك بالسنبوك
يا ود امي.. هيء يء يء يء ..
الكورس: وووب ... وووب ...ووووووووووووب
ثم تعدل (حنان سكليب) توبا الشفون (الترانسبيرنت) الكان واقع وتنظر للكورس خلفها نظرة الفنان الذى يود أن (يختم) الأغنية فيبدأن فى (تحرير) البكاء ويرفعن أصواتهن ويضربن بأيديهن ليبدين زينتهن (دهب دبي وكده) ...
وووووووووووب وب وب وووووب ثم يتوقفن فى لحظة واحدة بأشارة من (حنان سكليب)! التى تجلس على كرسي وتتناول علبة مناديل الورق وتخرج منديلهن تمسح بهما حبات العرق التى تساقطت بفعل المجهود رغم برودة التكييف ثم تلتفت الى النسوة اللواتى كن فى الصالون يتابعون (فاصل السكليب) قائلة:
قبلكن وحدكن.. جنس بخلكن عليكن .. أول مرة أمشى ليا (بيت بكا) ما ينقطوا ليا فيهو!!
منقول