الاخوة الكرام .....
بالامس وانا اطالع صحيفة التيار ليلا وبعد ان هرا فشفاشى مقال اوباما من الجانبين وتوقفت فى قولة (اننى اكرر العرض الذى تقدمت بة لزعماء السودان، اذا اوفيتم بالتزاماتكم واخترتم السلام ، هنالك مسارلعلاقات طبيعية مع الولايات المتحدة بما فى ذلك رفع العقوبات الاقتصادية وبداية عملية وفقا لقانون الولايات المتحدة الامريكية) اها لو ما الحكومة مشت حسب القانون الامريكى حتفعل شنو ؟؟؟ .... يعنى حتى لو انفصل الجنوب برضو مافى لينا علاقات حلوة مع سيدة العالم مالم يكون التعاون بين السودان وامريكا وفقا للقانون الامريكى !!!!!!!!!!!!!! سيك سيك يارب تلطف بنا
يعنى ماف حل ......... انسى وعيش ياولدى .........
ماعلينا كتير بالسياسة .......... المهم (والمهم دى تزكرنا زكريات حلوة ياسمعة) ....
انتقلت الى مقال اخر يحكى لنا عن الخرشة ....... مصطلح نيدو يواكب العولمة والانترنت والجنصصة ....
قديما سمعنا بالبنقو وكيف ان قندول البنقو الواحد ينتج 13 الى 15 سيجارة والسيجارة يعادلها الان 3 الى 4 خرشات .... وسمعنا ايضا بان هذا يولد احساس مرهف وابداع وجراة شديدة وسخرية شديدة فى الونسة والكلام يعنى بالعربى كدة يخليك حنكك سنين ....اللهم احفظنا واهلنا من التطريق بهذة الطريقة ....
وكنت اتوقف فى سابق العهد واتعجب وكنت حينها تويجر قديم وبقال اقدم (فى دكان الجد المرحوم سرور جوار الجزارة بسوق دنقلا) عند الشعار والعلم المرسوم بالاحمر فى ورق البرنسيس !!!!!!!!!! لى مايكون وردة ولا زهرة ؟؟؟؟؟؟؟؟
وحديثا قرات بان البنقو يولد الاحساس بالقلق والاكتئاب وسواد تحت العينين واحمرار العينين والاكل الكثير وحب العزلة والاحمرار فى اسنان الفك .... والضرر الاكبر ضمور المخ .... والله يجازيك يالبنقو السودانى .....
اما الخرشة فهى حبوب مهدئة للصرعة وسعرها فى الصيدليات حوالى 20 جنية للشريط 50 حبة اما داخل الجامعات حسب مازكر فى التيار فجنية واحد للحبة (قدر ظروفك وكدا) .... وماخفى اعظم فى الانتشار والبلاوى لهذة الافه والمتعارفة عموما بالمخدرات .... والجامعات اصبحت مكان خصب لهذا السرطان حسب ماينشر فى صحف الخرطوم وورش عمل الجامعات ....
الوزنة قديما كانت تعرف بانها حالة يمكن الوصول اليها بعد ان تضرب سيجارة خدرا واحدة اما الحالة فى الخرشة فتحتاج لثلاثة او اربعة خرشات .... وان شاء الله ونسال الله ان نكون فى حالة لايمكن الوصول اليها حاليا ومستقبلا كهذا .....
واخيرا يحدث السرطان القاتل (سرطان معدة او فم) بالخرشة والبنقو ولا حول ولا قوة الا بالله
ودة كلو بعد الناس من الدين والشرع الحنيف .........
اللهم ارحمنى ووالدى والمومنين والمومنات الاحياء منهم والاموات ...........
اللهم احفظ شبابنا وشاباتنا واهلنا من هذا الخطر .....
الأربعاء 12 يناير 2011, 1:39 pm
